پەرلەمانتارەک: دەلیڤەیە ئەم مفايی ژ دەرزێن مالا شیعى وەربگرین
ئه‌ڤرۆ نيوز:
ب ئەگەرێ پەیدابوونا دو کۆتلەیێن مەزن و جودایێن شیعی و پەرتەوازەبوونا ناڤمالا شیعەیێن عیراقێ چاڤدێر وەسا دبینن دەلیڤەیە کورد مفای ل ئەڤان ئالۆزیێن نافمالا شیعەیان ببینن و پەرلەمانتارەکێ کوردژی لپەرلەمانێ عیراقێ دبێژیت، دەلیڤا ئەڤێ جارێ ھاتیە پێش بۆمە کوردان ل سالێن بۆری نەبوویە و پێدڤیە مفا لڤێ قۆناغێ بھێتە وەرگرتن.
پەرلەمانتارێن عیراقێ لسەر دوبەرەیان بەلافبووینە و ل شوونا کۆتلەکا مەزنا پەرلەمانی نوکە دو کۆتلە یێ ھەڤڕکیێ دکەن بۆ بدەستڤە ئینانا ناڤێ مەزنترین کۆتلا پەرلەمانی دکتۆر محەمەد شاکر، پەرلەمانتارێ پارتی ل پەرلەمانێ عیراقێ بۆ رۆژناما ئەڤرۆ دیارکر” ل خۆلێن بۆری ئەف دەلیڤا نوکە ھەی نەبو، پشتی پڕۆسا ئازادیا عیراقێ ئەڤە ئێکەم جارە دەلیڤە یا گونجای بۆ کوردان گورەی بەرژەوەندیێن خوە دانوستانان بکەن دگەل لایەنێن عیراقی، واتە ئەو دەلیڤە بەرێ نەبوویە، ژبەرکو لسالێن بۆری لایەنێن شیعی یەکڕێز بوون و ھەموویان پێکڤە کۆتلەیەکا مەزنا پێک دئینا، ھەموو خۆلەکا پەرلەمانی شیعە ب مەزنترین کۆتلە ھاتینە ناڤا پڕۆسا سیاسی و دوڤدا کورد و سونەژی چووینە ناڤا کۆتلا شیعی، بەلێ دیارە ڤێجارێ ئەوژی پرت و بەلافبووینە و نوکە دو کۆتلەیێن مەزن ھەنە ھەردوکژی شیعەنە و د بەرژەوەندیا ھەرێما کوردستانێ یە.
دکتۆر محەمەد شاکر گۆتژی” دڤێت کورد مفای ل شاشیێن شیعەو سونا وەربگریت، چونکە ئەوژی باش ئەڤێ راستیێ دزانن ھەگەر کورد ب ئێکڕێزی بچنە دانوستانێن بەغدا دێ دەستکەفتێن زێدەتر ھەبن، ژبەرکو مە چەندین ئاریشە ب ھەلاویستی دگەل بەغدا ماینە ژوانا بجە ئینانا دستووری و مادێ 140 یێ گرێدایی دەڤەرێن کوردستانێ و پرسا بودجە و پێشمەرگە و چەندین پرسێن دی یێن گرنگ، نوکە عەرەبێن سونەژی ھەتا رادەیەکی شیاینە خوە رێکپێخن و چەند خالەک کرینە مەرج بۆ بدەسڤەئینانا دەستکەفتێن خوە و پاراستنا بەرژەوەندیێن عەرەبێن سونە، خەلکێ ھەرێما کوردستانێ ژی ھەموو دگەل ڤێ چەندێ لایەنێن سیاسی ب ئێکگرتی بچنە بەغدا و دەنگدەرێ ئەڤێ داخوازێ دکەت یێ ھەموو لایەنان بێ جوداھی ئەڤرۆ چو کەسەک نینە لکوردستانێ دگەل ئێکڕێزیێ نەبیت، لەوڕا یا فەرە ئەم ھەموو پێکڤە ئێک ھەلویست و پڕۆژە بەرامبەری بەغدا مە ھەبیت و مفای ل سەربورا خوە و لایەنێن عیراقی ژی وەربگرین، چونکە دێ مە پتر دەستکەفت ھەبن بۆ مللەتێ خوە.
