پەرلەمانتارەک: پێدڤیە سنورێن مە ل گەل ئیرانێ بهێنە توندکرن
ئەڤرۆ نیوز، عەلی حاجی:
ئەندامەکا پەرلەمانێ کوردستانێ د لژنەیا ساخلەمیێ و ژینگەهـ و مافێن بەکاربەر بۆ ئەڤرۆ نیوز دیار کر بەردەوام چاڤدێریێ ل سەر خالێن سنوری و فروکخانەیێن نێڤدەولەتی دکەین دا کو ئەو کێماسیێن د کەرتێ ساخلەمیێ دا هەین بهێنە چارەسەر کرن.
زێدەتر رۆژان ئیبراهیم گوت : پشتی مە سەرەدانا خالێن سنوریێن فەرمی و نەفەرمی و فروکخانەیێن نێڤدەولەتی کرین ل دور تیمێن ساخلەمیێ و چاوانیا ئەنجامدانا پشکنینان ل سەر وان کەسێن ب رێیا وان جهان سەرەدانا کوردستانێ دکەن دیار بوو هەتا رادەیەکێ باش کار د هاتە ب رێڤەبرن و ژ روویێ پێدڤیان دا چو کێماسی نەبون بەلێ کێماسی هەبون د میلاکێ وان دا پرانیا وان کەسان ژی خوەبەخش بون مە تێبینی ژی ل سەر وێ چەندێ هەبون،هەر دیسان ل خالا سنوریا ئیبراهیم خەلیل بتنێ پشکنین بۆ هاولاتیێن نەهـ وەلاتان دهاتە کرن و ڤێ چەندێ ژی مە داخاز ژ رێڤەبەریا گشتی یا ساخلەمیا پارێزگەها دهوکێ کر پێدڤی یە هەر کەسەکێ ب رێیا وان سنوران بهێتە کوردستانێ پشکنین بۆ بهێتە کرن و ئەڤ چەندە ژی ژ ئەڤرۆ پێڤە دێ هێتە ئەنجام دان.
زێدەتر ناڤهاتیێ گوت : مە سنورەکێ درێژ دگەل وەلاتێ ئیرانێ هەیە کونترول کرنا وان سنوران ژی یا ب زەحمەتە و گەلەک کەس ب رێیا رێکێن قاچاخ دخازن سنوران ببرن و وەکو ئەم هاتینە ئاگەهدار کرن ژی کەسەکێ ئیرانی ب رێیا رێکێن قاچاغ دخاست بچیتە وەلاتێ تورکیا بەلێ ژلایێ هێزێن ئاسایشێ ڤە هاتە دەستە سەرکرن و پێدڤی یە زێدەتر کار ل سەر توندکرنا خالێن سنوری بهێتە کرن ب تایبەتی ژی دگەل وەلاتێ ئیرانێ،مە داخاز کری یە ژی ئەڤ کێم و کاسیێن دناڤ تیمێن ساخلەمیێ د کەرتێ ساخلەمیێ دا هەین پێدڤی یە بهێنە چارەسەر کرن و ئەم بەردەوامین ژی دا کو ب شێوەیەکێ بلەز هەمی کێشە بهێنە چارەسەر کرن.