پەرلەمانتارەک پەیامەکا ب لەز بۆ سەرۆک بارزانی دھنێریت
ئەڤرۆ نیوز، فاتما مزووری:
ئەندامەکا جڤاتا نوونەرێن عیراقێ پەیامەکا ب لەز ئاراستەی سەرکردێن کورد و سەرۆک بارزانی دکەت و ئاماژێ ب وێ چەندێ دکەت کو د ھەوارا سنورێن کاکەییان بچن.
ئەڤرۆ رۆژا چارشەمبی 27ی خزیرانا 2018ێ ئەمیرا کەریم ئەنداما جڤاتا نوونەرێن عیراقێ د پەیامەکا ب لەز دا ژبۆ سەرکردێن کورد و سەرۆک مەسعود بارزانی ئاماژە ب وێ چەندێ کریە کو خرابیا رەوشا دەڤەرێن کاکەییان ل باژێرکێ داقوق و ھندەک گوندێن سنورێ باژێرکێ دوبز د زێدەبوونێ دایە و پێدڤیە ل دووڤ گازیێ بھێن.
ئەمیرا کەریم گۆت: “پشتی 16ی ئوکتوبەرێ رەوشا سنورێ کەرکووک رۆژ بۆ رۆژێ بەر ب خرابیێ دچیت ب تایبەت رەوشا نھا یا سنورێ دەڤەرا حەفتەغار و دەڤەرێن کاکەییان و داعش ب رەنگەکێ ئاشکەرا ب وان دەڤەران ھەنە و زیانێ گیانی و ماددی دگەھیننە وەلاتیان”.
زێدەتر گۆت: “داخواز ژ لایەنێن کوردان دکەین کو بێدەنگیا خوە بشکێنن و د ھەوارا وەلاتیێن دەڤەرێ دا بھێن، ژ بەر کو ھەکە ھوسا بیت ئەمنیەتا کەرکووک نەیا ئارامە”.
داخواز ژی ژ سەرۆک بارزانی کریە کو کەرکووک و کەرکووکیان ژ زولم و ستەما تیرۆرستێن داعش و ھێزێن عیراقی ب پارێزن.
نێزیکی چەند حەفتیانە تیرۆرستێن داعش ب تەمانی کونترۆلا دەشتێن سنوری یێن دەوروبەرێن کەرکووک و دیالا و سەلاحەدین کرینە و ترسەکا مەزن ل دەڤەرێ پەیدا بوویە.
