پەرلەمانێ ئورۆپا دێ کۆمبوونەکا تایبەت ل سەر رەوشا کوردان ساز کەت
ئەڤرۆ نیوز:
سەرۆکێ پەرلەمانێ ئورۆپا پشتی کۆمبوونا ل گەل شاندێ پەرلەمانتارێن دۆستێن کوردان داخۆیانیەک بەلاڤ کر و راگەھاند کو ئەو ھێرشێن دەولەتا تورکیا بۆ سەر وەلاتیێن کورد قەبوول ناکەن و گۆت: (دڤێت دەولەت و حوکمەتا تورکیا بەرێ خوە بدەنە ئورۆپا و بنگەھێن مافێن مرۆڤان بنپێ نەکەن ھەکە نا چو جوداھی د ناڤبەرا وان و رژێمێن رۆژھەلاتا ناڤین دا نامینیت).
مارتین شولز سەرۆکێ پەرلەمانێ ئورۆپا ل باژێرێ بروکسەلێ ل گەل شاندەکێ پەرلەمانتارێن ئورۆپا یێن دۆستێن کوردان جڤیا و د جڤینێ دا رەوشا باکور، رۆژئاڤا و باشورێ کوردستانێ گەنگەشە کرن و ھێرشێن دژوار یێن دەولەتا تورکیا بۆ سەر باژێر و وەلاتیێن کورد گەنگەشە کرن.
جانسۆ ئۆزدەمر ئەنداما پەرلەمانێ ئەلمانیا د داخویانیەکێ دا بۆ رۆژناما ئەڤرۆ راگەھاند کو وان ل گەل ھەفت پەرلەمانتارێن پەرلەمانێ ئورۆپا یێن دۆستێن کوردان سەرەدانا مارتین شولز سەرۆکێ پەرلەمانێ ئورۆپا کرینە و دۆسیەکا تایبەت ل دۆر رەوشا کوردان دانە وی و گۆت: (ل باشور و رۆژئاڤا ھێرشێن تیرۆرستان بۆ سەر کوردان بەردەوام دکەت و گەلێ کورد و ھێزێن کوردی بەرخوەدانەکا مەزن ل ھەمبەر تیرۆرێ دکەن و ل باکورێ کوردستانێ ژی دەولەتا تورکیا زۆرداریێ ل کوردان دکەت و باژێر و باژێرکێن کوردان ددەنە بەر تۆپان و سەرباز و تانکێن خوە دەربازی ناڤ باژێران دکەت و مە ژی ئەڤ پێشھاتە وەک دۆسیەکا بەرفرەە دا سەرۆکێ پەرلەمانێ ئورۆپا و سۆز دا ل پەرلەمانی بەحسێ ڤان بابەتان بکەت).
جانسۆیێ ھەروەسا راگەھاند ژی سەرۆکێ پەرلەمانێ ئورۆپا رەوشا باشور و رۆژئاڤا ژ نێزیک ڤە دشۆپینیت و بەرخوەدانا گەلێ کورد ل ھەمبەر تیرۆرێ ب بلندی دنرخینیت و گۆت: (پەیوەندیێن مارتین شولز راستەوخوە ل گەل سەرۆکێ ھەرێما کوردستانێ مەسعود بارزانی و سەلاحەدین دەمیرتاش ھەڤسەرۆکێ پارتیا دیوکراتیک یا گەلان ھەیە و بۆ مە راگەھاند کو ئەو ل گەل ڤێ چەندێنە گەلێ کورد ھەم ل باشور و رۆژئاڤا و ھەم ژی ل باکوری چارەنڤیسێ خوە ب دەستێ خوە دیار بکەن و کورد ژی وەک ھەر نەتەوەکا دی ل جیھانێ بریارا داوی ل سەر پاشەرۆژا خوە بدەن).
ل سەر روودانێن ل باژێرێن باکورێ کوردستانێ ژی جانسۆ ئۆزدەمیر ئەنداما پەرلەمانێ ئەلمانیا راگەھاند کو مخابن رۆژانە نووچەیێن کوشتنا وەلاتیێن کورد ژ ئالیێ ھێزێن ئێمناھیا تورکیا ڤە دھێنە بەر دەستێن وان و ئەو یەک وان گەلەک خەمگین دکەت و گۆت: (سەرۆک کۆمار و سەرۆک وەزیرێن تورکیا د دەمێ دەستپێکرنا شەرێ ناڤخوەیێ سووریێ دا دگۆتن رژێما ئەسەدی خەلکێ خوە دکوژیت و ب تانک و تۆپان باژێران وێران دکەت و ئەڤرۆکە ب ھەمان رەنگی حوکمەت و دەولەتا تورکیا ژی باژێرێن کوردان وێران دکەن و رۆژانە وەلاتیێن کورد د کوژن و مە د ھەڤدیتنا ل گەل بەرێز مارتین شولز سەرۆکێ پەرلەمانێ ئورۆپا دا بەحسێ ڤێ یەکێ ژی کر و بەرێز سەرۆکێ پەرلەمانی سۆز دا کو ل پەرلەمانێ ئورۆپا گەنگەشەکا تایبەت ل سەر رەوشا کوردان بھێتە کرن و ئەنجامێن گەنگەشەیان ژی وەک راپۆرتەکا رەخنەی بدەتە دەولەتا تورکیا و ژ وان بخوازیت ھێرشێن ل سەر وەلاتیێن سڤیل بدەتە راوەستاندن).
ناڤھاتیێ ئەو یەک ژی نەڤەشارت کو سەرۆکێ پەرلەمانێ ئورۆپا راگەھاندیە کو ئەو دێ د دەمەکی نێزیک دا شاندەکێ تایبەت رەوانەی باکورێ کوردستانێ و تورکیا کەت و دیسان دێ دو شاندێن جودا ژی بۆ ھەرێما کوردستانێ و رۆژئاڤایێ کوردستانێ ھنێریت و رەوشا کوردان تایبەت ب شۆپینیت. مارتین شولز سەرۆکێ پەرلەمانێ ئوروپا ھەروەسا د ھەڤدیتنێ دا ئاشکرا ژی کریە کو چ دبیت بلا ببیت مافێ دەستھەلاتدارێن تورکیا نینە وەلاتیێن سڤیل یێن کورد بکوژن و باژێرێن کوردان بکەن مەیدانا شەری.
ل ئالیێ دی بەری نھا ژی پارتا کەسک یا ئەلمانیا و چەندین پارتێن سیاسی ل ئورۆپا نەرازیبوونا خوە ل ھەمبەر تورکیا و حوکمەتا ناڤەندی یا عیراقێ دیار کربوون و داخواز ژ پەرلەمانێ ئورۆپا ژی کربوون کو ل ھەمبەر زۆلم و زۆرداریا کو ل کوردان دھێتە کرن بێدەنگ نەمینن و ھەلویستێ خوە نیشا بدەن، چەنکو کورد ل جھێ ھەموو جیھانێ شەرێ تیرۆرێ دکەن و دڤێت ئورۆپا ھاریکاری و پشتەڤانێ وان بیت.