پەرلەمانێ کوردستانێ دێ بێنڤەدانێ وەرگریت
ئەڤرۆ نيوز:
پەرلەمانێ کوردستانێ دوھی ٣٠-٦-٢٠١٥ دووماھی ب روونشتنێن خولا بھارێ ئینا و بێنڤەدانا ھاڤینێ بۆ ماوێ دوھەیڤان دێ وەرگریت، ھەر دوھی چەند مادە ژ پرۆژە قانوونا رێکخستن و چاندن و ڤەگوھاستنا ئەندامێن لەشێ مرۆڤی پەسەند کر.
د روونشتنا دوھی دا پەرلەمانی دانوستاندن ل پرۆژە قانوونا رێکخستن و چاندن و ڤەگوھاستنا ئەندامێن لەشێ مرۆڤی کر کو ل رۆژا ٢٩-٦ ژی ب ئامادەبوونا وەزیرێ ساخلەمیێ ھەشت مادە ژێ ھاتبوونە پەسەند کرن، دوھی ژی ١٠ مادە ھاتنە پەسەند کرن و مادێن دیتر بۆ پشتی بێنڤەدانا ھاڤینێ ھاتنە پاشخستن.
ھەر د روونشتنا دوھی دا چەند راسپارد و بریارەک ل دۆر چارەسەری و راگرتنا زێدەگاڤیان دانە دانگدانێ و پشتی ھاتینە پەسەند کرن ئاراستەیی جڤاتا وەزیران ھاتنە کرن، ھەروەسا د بەرنامەی دا بوو خواندنا ئێکێ بۆ سێ پرۆژە قانوونان بھێتە کرن، ئەو ژی ھەر ئێک ژ پرۆژە قانوونا راستڤەکرنا سیێ یا قانوونا پارێزەریێل ھەرێما کوردستانێ یا ھژمار ١٧ یا سالا ١٩٩٩، ھەروەسا پرۆژە قانوونا راستڤەکرنا سیێ یا سندوقا خانەنشینا پارێزەران یا ھژمار ١٨ یا سالا ١٩٩٩، ھەروەسا پرۆژە قانوونا پارێزەراتیێ ل ھەرێما کوردستانێ.
ل دووماھیا روونشتنا دوھی، پەرلەمانێ کوردستانێ ب دووماھی ھاتنا وەرزێ بھارێ یێ سالا دویێ ژ خولا چارێ یا پەرلەمانی راگەھاند و ھەتا ئێکێ ئیلۆنا بھێت پەرلەمان چو روونشتنێن دی یێن ئاسایی ئەنجام نادەت.