پەرەمانتارەکێ پارتی: دڤێت ل 20ی تەباخێ ھەلبژارتن بھێنەکرن
ئەڤرۆ نیوز:
کۆمسیۆنا سەربخوەیا ھەلبژارتنان ل ھەرێما کوردستانێ ئاشکراکر، ھەکە کارمەند بۆ بھێنە دامەزراندن و بودجە ھەبیت دێ شێن ل رۆژا 20ی تەباخا 2015 ێ ھەلبژارتنێن سەرۆکاتیا ھەرێما کرودستانێ برێڤەببەن، پەرلەمانتارەکێ پارتی ژی رادگەھینیت، ھەکە کۆمسیۆنا ھەلبژارتنان ل ھەرێمێ شیان نەبن، بلا داخوازا ھاریکاریێ ژ کۆمسیۆنا بەغدا بکەت.
پشتی سەرۆکێ ھەرێما کوردستانێ، کۆمسیۆنا ھەلبژارتنان و راپرسیان ل ھەرێما کوردستانێ و لایەنێن پەیوەندیدار راسپاردین بۆ خوە بەرھەڤکرنێ ژبۆی برێڤەبرنا ھەلبژارتنێن سەرۆکاتیا ھەرێما کوردستانێ ل رۆژا 20ی تەباخا داھاتی، دوھی کۆمسیۆنێ کۆمبوونەک گرێدا و پشتی کۆمبوونێ راگەھاند، ھەکە ھاریکاریا وان بھێتە کرن دێ شێن ھەلبژارتنان ددەمێ دیارکریدا برێڤەبەن، ب تایبەتی دامەزراندنا کارمەندێن بەردەوام و گرێبەست و بودجەک ژی بۆ کۆمسیۆنێ بھێتە دابینکرن.
کۆمسیۆنا ھەلبژارتن و راپرسیێن ھەرێمێ دیارکریە، ھندەک پێدڤی ل دەرڤەی وەلاتی یێن ھەین کو پێدڤیە بۆ بھێنە دابینکرن، ل گەل ڤێ چەندێ دەمەکێ زوو ھاتیە دیارکرن، بەلێ ھەکە بەرھەڤی بۆ بھێنەکرن، دێ ددەمێ ٤٨ دەمژمێران بەرسڤا دووماھیێ دەن بۆ برێڤەبرنا ھەلبژارتنان.
ڤەمان فەیسەل، ئەندامێ لیژنا قانوونی یا پەرلەمانێ کوردستانێ ل سەر لیستا پارتی دیموکراتی کوردستان بۆ رۆژناما ئەڤرۆ گۆت” ئەم وەکی پارتی، پشتەڤانیا فەرمانا سەرۆک بارزانی دکەین، چونکی ل دووڤ قانوونا ھژمارە “1” یا سالا 2015ێ، سەرۆک بارزانی ئەرکێ خوە یێ قانوونی بجھئینایە بۆ رێڤەبرنا ھەلبژارتنان و سەرۆکایەتیا ھەرێما کوردستانێ بەری نوکە دیراسەتا قانوونێ کریە، ھەکە ھەلبژارتن نەھێنەکرن، ھەرێما کوردستانێ پشتی دووماھی ھاتنا ویلایەتا سەرۆک بارزانی دێ کەڤیتە د ڤالاتیەکا قانوونی و سیاسی یا مەزندا، لەوما باشترین چارە ئەنجامدانا ھەلبژارتنانە ل رۆژا 20ی تەباخا داھاتی”.
ل دۆر بەربژارکرنا مەسعود بارزانی بۆ پۆستێ سەرۆکێ ھەرێما کوردستانێ ڤی ئەندامێ لیژنا قانوونی یا پەرلەمانێ کوردستانێ دیارکر” لایەنێن سیاسی دو بابەت تێکھەلی ئێک کرینە و بابەتێ ھەلبژارتنان تشتەکە و خوە بەربژارکرنا سەرۆکی تشتەکێ دی یە، لایەنێن دی یێن دبێژن نابیت ھەلبژارتن بھێنە ئەنجامدان، کۆمسیۆنا ب خوە یا دبێژیت، ھەکە بەرھەڤی و ھاریکاریا مە بھێتەکرن، دبەرھەڤین بۆ برێڤەبرنا ڤان ھەلبژارتنان، جارێ بلا ھەلبژارتن ل ژڤانێ دیارکری بھێنەکرن، وی دەمی دێ مە ئاخفتنا خوە ھەبیت کا دێ چاوا و کی بەربژاربیت بۆ ڤی پۆستی، نابیت بابەت تێکھەلی لژنا بەرھەڤکرنا دستووری بھێتەکرن، ژ بەر کو لیژنە یا مژوولی بەرھەڤکرنا دستووریە و کەنگی و چاوا گەھشت وێ چەندێ کو سیستەمێ حوکمرانیێ دیاربکەت، کا ژلایێ پەرلەمانی ڤی دێ سەرۆکێ ھەرێمێ ھێتە ھەلبژارتن، یان ژ دەرڤەی پەرلەمانی ئەڤە بۆ وی دەمی یە ونابیت ھەردوویان پێکڤە گرێبدەین”.
ڤەمانی گۆت ژی” ھەکە بھێت و کۆمسیۆن بێژیت مە شیانێن رێڤەبرنا ھەلبژارتنان ل 20ی تەباخێ نینن، بلندترین دەستھەلاتا ھەلبژارتنان ل ھەرێما کوردستانێ کۆمسیۆنە و دڤێت ب نڤیسارەکا فەرمی داخوازێ ژ پەرلەمانی بکەت و پەرلەمان دێ بڕیارێ دەرکەت کو دەستھەلات تنێ بۆ ڤان ھەلبژارتنان ژ کۆمسیۆنا ھەرێمێ بھێتە وەرگرتن و داخوازێ ژ کۆمسیۆنا ھەلبژارتنان ل عیراقێ بکەت ڤان ھەلبژارتنان برێڤەببەت، یان ژی رێیەکا دی یا ھەی، ھەکە کۆمسیۆنا ھەرێمێ نەشیا خوە بەرھەڤ بکەت ب تایبەتی نەبوونا کارمەندێن پێدڤی، باشترە ل گەل کۆمسیۆنا بەغدا پێکڤە ھەلبژارتنێن سەرۆکێ ھەرێمێ برێڤەببەن، چونکی دشێت مفای ژ نڤیسینگەھێن کۆمسیۆنا بەغدا ل ھەرێما کوردستانێ وەربگریت و وان ئەزموون ژی د رێڤەبرنا ھەلبژارتنان دا یا ھەی”.
