پەکەکێ چەند ئەندام و لایەنگرێن پارتی دەستەسەرکرن
ئه‌ڤرۆ نيوز:
بەرپرسێ لقێ یازدە یێ پارتی دیمۆکراتی کوردستان ل دەڤەرا پشدەر و بتوێن گەفێن وێ چەندێ کرن، ھەکە چەکدارێن پەکەکێ ل ھەرێما کوردستانێ ئەندام و لایەنگرێن پارتی دەستەسەرکربن، پارتی ژی دێ ئەندام و لایەنگرێن وێ دەستەسەر کەت و بێ ھەلویست نابیت و گۆت:(پێدڤیە حوکمەتا ھەرێمێ ھەلویست ل دۆر دەستەسەرکرنا وەلاتیێن خوە ھەبیت).
نەجات حەسەن، بۆ رۆژناما ئەڤرۆ گۆت” ھەتا نوکە ئەم نەھاتینە پشتڕاستکرن کو پەکەکێ ئەندام و لایەنگرێن مە ل سنورێ چیایێ قەندیل دەستەسەرکربن، چونکو مە دڤێت بفەرمی ئەم ئاگەھداربین، لێ بۆچی و چاوا پەکەکە دێ خەلکێ پارتی دەستەسەرکەت، ھەر دەمێ بۆ مە خویابوو پەکەکێ ئەندام و لایەنگرێن پارتی دەستەسەرکرینە، بێگومان ئەم ژی بێدەنگ نابین و دێ مە ژی ھەلویستێ خوە ھەبیت، ھەتا دێ ئەندام و لایەنگرێن وێ دەستەسەرکەین).
بەرپرسێ لقێ یازدە یێ پارتی گۆت ژی:( پێدڤیە حوکمەتا ھەرێما کوردستانێ ھەلویست ل دۆر دەستەسەرکرنا وەلاتیێن ھەرێما کوردستانێ ھەبیت ، ژ بەر کو پەکەکە ل ھەرێمێ مێھڤانە و مافێ وێ چەندێ نینە وەلاتیێن ھەرێما کوردستانێ دەستەسەر کەت و سزا بدەت، حەقە حوکمەتا ھەرێمێ ئەڤان رەفتارێن پەکەکێ قەبول نەکەت و دووڤچوونێ بۆ بکەت).
