پەکەکە و حزبا دیموکرات رێگرن ل ئاڤاکرنا گوندێن سنوری
ئەڤرۆ نیوز:
ب ئەگەرێ ھەبوونا بنکە و بارەگایێن پەکەکە و ئاریشەیێن سنۆری پتری سەت گوندێن ناحیا سیدەکان نەھاتینە ئاڤاکرن، و دوھی ژی ب ئەگەرێ ھەبوونا چەکدارێن حزبا دیموکراتا ئیرانێ، کۆمارا ئیسلامیا ئیرانێ دەڤەرێن ناحیا سیدەکان و حاجی ئومەران تۆپبارانکرن، د ئەنجامێ تۆپبارانێ پێنج وەلاتیێن سڤیلێن ھەرێما کوردستانێ برینداربوون و زیانێن مەزن ژی بەر ب رەزو باغێن گوندیان کەفتن.
کاروان کەریمخان، رێڤەبەرێ ناحیا سیدەکان یا سەر ب قەزا سۆران بۆ رۆژناما ئەڤرۆ گۆت” پشتی سەرھەلدانێ وەرە نێزیکی 110 گوندێن سەر ب ناحیا سیدەکن ئاریشەیێن سنۆری ھەنە و ئێک ژوان ئاریشەیان ھەبوونا بنکە و بارەگایێن پەکەکێ نە ل دەڤەرێ و بۆیە ئەگەرێ ئاڤا نەبوونا ئەڤان گوندێن ھەرێما کوردستانێ، پشتی دەستپێکرنا پڕۆسا ئاڤاکرنا گوندان ھەموو ئاریشەیێن ھەین بۆنە رێگر ئەف گوندە نەھێنە ئاڤاکرن و ڤان سالێن دووماھیێ ژی پێلەکا ئاڤاکرنێ ھەرێما کوردستانێ ڤەگرت و مخابن ھەبوونا بنکە و بارەگایێن پارتا کرێکارێن کوردستانێ رێگربوون ل ئاڤا نەکرنا گوندێن دەڤەرێ، چونکی ھەبوونا بارەگایێن سەربازی بۆیە ئەگەرێ ڤێ چەندێ، بەردەوام دەڤەرا سیدەکان ژلایێ وەلاتێن تورکیا و ئیرانێ ڤە بھێنە تۆپبارانکرن و بۆمبە بارانکرن، ژبلی گوندێن نەھاتینە ئاڤاکرن، مەترسی ھەیە ھژمارەک گوندێن ئاڤاکری بھێنە ڤالاکرن و ئاکنجیێن وان ژبەر رەوشا سنۆری نەشێن بەردەوام زارۆیێن بەر تۆپبارانێ بھێلن و مەترسی بۆسەر گیانێ وان ھەیە، ئەڤە بۆدەمێ سالەکێ یە بوردۆمانا سەر ناحیا سیدەکان یا بەردەوامە و زیانێن زۆرێن ماددی گەھاندینە خەلکێ دەڤەرێ و ھژمارەک وەلاتی ئاوارەبووینە.
کاروانی گۆتژی” مە وەکی حوکمەتا ھەرێما کوردستانێ چو دانوستانێن راستەوخۆ دگەل چەکدارێن پەکەکێ نینە، بەلێ زۆرجارا ب رێیا خەلکێ گوندان و بەرنیاس مە ئەف داخواز ل پارتا کرێکارێن کوردستانێ ھەبوویە بنکە و بارەگایێن خوە ڤەکێشن ل دەڤەرێ و ھەر چ نەبیت وەک ھەلویستەکی نەتەوەیی چەکدارێن خوە ل سنورێ ناڤا گوندان ببنە دەر ھەتا نەبیتە ئارمانجا بوردۆمانێن وەلاتێن ئیران و تورکیا، بەلێ پەکەکێ ب ھەموو شێوەیەکی ئەف چەندە رەتکریە و رازینەبوویە ب چۆلکرنا گوندان، مە پێخۆش نینە چو جار مە ئاریشە دگەل پەکەکێ ھەبن، چونکە ھەرچ نەبیت کوردن و ژ نەتەوا مەنە، بەلێ چەکدارێن پەکەکێ رازینینە بڤێ داخوازامە، ھەرچەندە چەکدارێن حزبا دیموکراتا ئیرانێژی ل دەڤەرێن سنوری ھەنە، بەلێ ئەف زێدەتر رەوشا ھەرێما کوردستانێ بەرچاڤ دگرن و دزانن چالاکیێن وان ناف خاکا ھەرێما کوردستانێ چو زیان ھەنە.
