پەیمانگەها واشنتۆن ژ ئەمەریكا دخوازیت قونسلخانەیا خوە ل هەولێرێ بهێز بكەت
پەیمانگەها «واشنتۆن» یا ئەمەریكی دیتنا وێ ئەوە كو ڕێكخراوا تیرۆرستییا داعشێ د «لاوازترین قووناغا» خوە دا یە، لێ هۆشداریێ د دەت ل سەر هەبوونا ئاماژەیەكێ كو دبیت ڕێكخراوا ناڤبری خوە بۆ هەوەكا نوو بەرهەڤ بكەت ب مفا وەرگرتن ژ ڤەكێشانا هێزێن ئەمەریكێ ژ ئیراقێ. هەروەسا پەیمانگەهێ ژ واشنتۆنێ داخواز كریە چەند پێشنیازان بۆ سەرەدەریكرنێ ل گەل مەترسییان بجهـ بینیت، ژ وان ژی پڕكرنا وێ ڤالاهیێ یا د ناڤبەرا حوكمەتا ناڤەندی ل بەغدایێ و هەرێما كوردستانێ دا هەی.
پەیمانگەهێ د ڕاپۆرتەكا خوە دا، ژ ئەمریكایێ داخواز كریە هەموو شیانێن خوە بێخیتە د كاری دا بۆ چالاككرنا «گرۆپێ سەربازی ل ئیراقێ» كو یەكەیەكا ئەمەریكی یا هەڤپشك یا مەدەنی و سەربازییە ل بالیۆزخانەیا ئەمەریكایێ ل بەغدایێ. هەروەسا بهێزكرنا قونسلخانەیا ئەمەریكا ل هەولێرێ كو پێدڤی ب بەردەوامیدان ب دابینكرنا ستافەكێ شارەزا هەیە، و یا سێیێ ژی چالاككرنا بالێ سیاسیێ هەڤپەیمانییا نێڤدەولەتی یا دژی داعشێ، كو هێشتا كارا یە و دشێت هاریكار بیت، سەرەرای وێ چەندێ كو ئەركێ وێ یێ سەربازی دووماهی هاتییە.
پەیمانگەهێ ڕۆهن كریە كو ئەڤ سێ پێنگاڤە دشێن هاریكارییا ئیدارەیا «دۆنالد ترەمپ»ی بكەن بۆ بجهـئینانا چەند ئارمانجێن پێدڤی، ژ وان ژی پاراستنا «شیانێن گەشەپێدانێ».
پەیمانگەها ئەمەریكی دیسان ئاماژە ب وێ چەندێ كریە، ئەو هێزێن ئەمەریكێ یێن ل 30 ئیلۆنێ ئیلۆنێ هاتینە ڤەكێشان، پێزانینێن هەوالگیری، چاڤدێری و پشتەڤانییا ئاەسمانی دابین دكرن، لەورا پێدڤییە بەرپرسێن ئەمەریكی و ئیراقی لێكگۆهارتنا پێزانینێن هەوالگیری ب فەرمی بكەن و هاریكارییا دیاركرنا ئارمانجان بكەن، ل گەل بژاردەیا ئەنجامدانا هێرشان بۆ سەر سەركردەیێن دیار یێن داعشێ.
ل گۆر دیتنا پەیمانگەهێ، ئێك ژ وان كارێن دی یێن ئیدارەیا ترەمپی دشێت بكەت، پێشینەدانە ب دۆسێیا دەستەسەركرییان، دڤێت سندووقا دژی داعشێ بۆ مەشق و پڕچەككرنێ (CTEF) بەردەوام بیت ل سەر دابینكرنا خەرجییێن دەستەسەركرنێ و دادگەهكرنا داعشییان ل ئیراقێ ب هەرێما كوردستانێ ژی ڤە.
ڕاپۆرتێ ئاماژە ب وێ چەندێ ژی كریە، كو هەڤپشكێن هەڤپەیمانییا نێڤدەولەتی د كۆمبوونا دووماهیێ یا ل ڕۆمایێ دابینكری، سۆز ب پتر ژ 75 ملیۆن دۆلاران داینە بۆ دابینكرنا شیانێن دەستەسەركرنێ و پێدڤییێن دی، داخواز ژ واشنتۆنێ ژی كریە وان پل بدەت وانسۆزا بگوهۆڕن بۆ پێگیریبوونا درێژخایەن بۆ چەند سالان.
سەبارەت ب پەیوەندییا د ناڤبەرا حوكمەتا ناڤەندی و حوكمەتا هەرێما كوردستانێ، ڕاپۆرت دبێژیت، پێدڤییە ئیدارەیا ترەمپی كار بكەت بۆ «پڕكرنا ڤالاهییا د ناڤبەرا بەغدایێ و هەولێرێ دا»، ژ بەر كو شانێن داعشێ مفای ژ وان ناكۆكییان وەردگرن یێن ل كەركووكێ و دیالە و سەلاحەدین و نەینەوایێ د ناڤبەرا هێزێن فیدرال و هێزێن كوردی دا هەنە. لەورا پێدڤییە واشنتۆن دانوستاندنێن ئەمنی بكار بینیت بۆ هێلانا سەنتەرێن هەڤپشك یێن هەماهەنگیێ و ب ساناهیئێخستنێ بۆ ئۆپەراسیۆنێن هەڤپشك یێن لەشكەرێ ئیراقێ و پێشمەرگەی ل دەڤەرێن كێشە ل سەر.
