چارەنڤیسێ ب دەھان خوەنیشادەرێن کورد دیار نینە
ئەڤرۆ:
ئەکبەر ئەسەدی برایێ ئێک ژ گرتیێن ڤێ دووماھیێ ل خوەنیشادانێن رۆژھەلاتێ کوردستانێ بۆ رۆژناما ئەڤرۆ دیار کر کو ل باژارێ مھابادێ و چەندین باژارێن دی یێن رۆژھەلاتێ کوردستانێ ب دەھان خوەنیشادەر ژ ئالیێ ھێزێن ئێمناھیێ یێن ئیرانێ ڤە ھاتینە گرتن و ھەتا نھا ژی چارەنڤیسێ وان کەسان دیار نینە و گۆت: (ل گۆر ئاگاھیێن د دەستێ مە دا ب دەھان گرتیێن کورد ل مھابادێ ھاتبوونە گرتن بۆ زیندانێن باژارێن کرمانشان و ئورمیێ ھاتینە ڤەگۆھاستن و بێی کو بھێنە دادگەھکرن ژ ئالیێ بەرپرسێن زیندانێ ڤە تووشی ئەشکەنجەدانێ ھاتینە و مە گەلەک بزاڤ کرن دا کو ئەم بزانین برایێ مە ل کیڤە یە، بەس مخابن ھەتا نھا ژی ئەم چو ژ چارەنڤیسێ وی نزانین و بەرپرسێن ئیرانێ ژی ناھێلن ئەم سەرەدانا زیندان و جھێن پەیوەندیدار بکەین).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو ترسەکا مەزن ل دەف خەلکێ دروست بوویە کو گەلەک ژ خوەنیشادەران بھێنە کوشتن، چونکو بەری نھا ژی گەلەک جاران لاوێن کورد ژ ئالیێ سازیێن ئێمناھیێ یێن ئیرانێ ڤە ھاتینە گرتن و پاشێ ژی ھاتنە بێ سەروشوین کرن و ھەتا نھا ژی چارەنڤیسێ وان کەسان دیار نینە و نھا ژی ترسەکا مەزن ل دەف مە دروست بوویە کو گرتیێن خوەنیشادانێن ڤێ دووماھیێ ژی تووشی ھەمان چارەنڤیسێ ببن و گۆت: (نھا سازیا ھەوالگێریا ئیرانێ ل گەل ھێزێن ئێمناھیێ رێیێن گەلەک جودا جودا بکار دھینن دا نەھێلن خوەنیشادان ل رۆژھەلاتێ کوردستانێ بەردەوام بن، لێ خوەنیشادانێن نەرازیبوونێ ل پرانیا باژارێن رۆژھەلاتێ کوردستانێ بەردەوامن و رەنگە وەک رۆژێن یەکێ نەبن، بەس ھەتا گرتیێن ڤێ دووماھیێ نەھێنە ئازاد کرن و بەرپرسێن روودانا فەریناز خوسرەوانی ژی نەگەھنە سزایێن خوە خوەنیشادان دێ بەردەوام بن، چونکو ئەڤە ھەلویستەک نەتەوی یە و ئێدی خەلکێ نەڤێت ھێزێن رژێما ئیرانێ ل گۆر دلێ خوە سەرەدەریێ ل گەل کوردان بکەن).
ل ئالیێ دی ژێدەرەکێ ژ باژارێ ئورمیێ ژی بۆ رۆژناما ئەڤرۆ دیار کر کو دوھی ل ناڤەندا باژارێ ئورمیێ سێ گرتیێن سیاسی یێن کورد کو ئەڤە بۆ ماوەیێ چەندین سالان بۆ ل زیندانا ئورمیێ دا بوون، ل بەر چاڤێ خەلکێ ھاتنە سێدارەدان و ئەم وەسا دبینین کو ئەوە ژی بۆ چاڤترساندنان کوردان دھێتە کرن و پەیامەکا ئاشکرایە بۆ مە، چونکو بەرپرسێن ئیرانێ دخوازن بێژنە مە ھەکە ھوون خوەنیشادانان بکەن و ئالۆزیان بۆ مە دروست بکەن دێ چارەنڤیسێ ھەوە ژی وەسا بیت و گۆت: (ل گۆر تشتێ ئەز دزانم د ناڤا ھەفتیەکێ دا نێزیکی دەە کورد ل باژارێن جودا جودا یێن ئیرانێ ھاتینە سێدارەدان و گەفەکا مەزن ژی ل مالباتێن وان دھێتە کرن دا کو ئەو چو داخۆیانیان نەدەنە رایا گشتی).
ھەمان ژێدەری ئەو یەک ژی نەڤەشارت کو نھا مرۆڤ ھەست دکەت کو حوکمەتەکا سەربازی ل رۆژھەلاتێ کوردستانێ ھەیە، چونکو ل ناڤ باژار و دەرڤەیی باژارێن رۆژھەلاتێ کوردستانێ ب دەھان خالێن پشکنینێ ھاتینە دانان و ھاتن و چوونا خەلکێ بۆ ناڤ باژاری و دەرڤە دھێتە کۆنترۆل کرن و ناسنامە ژ وان دھێنە خواستن و سەرەدەریەکا گەلەک نەخوش ل گەل کوردان دھێتە کرن و گۆت: (پشتی خوەنیشادانێن ل مھاباد و باژارێن دی یێن رۆژھەلاتێ کوردستانێ ھەلویستێ خەلکێ ئازەری ژی ل ھەمبەر کوردان گەلەک دژوار بوویە و ل ئورمیێ، سەلماس و خوێ ئازەری گەفان دەرخستنا کوردان دکەن و دبێژن ھەوە دڤێت ب پشتەڤانیا سعوودیێ، ئەمریکا و ئیسرائیلێ ئالۆزیێن ناڤخوەیی ل وەلاتێ مە دروست بکەن).
