چار سالە کەلەکچی بوویە ناحیە و فەرمانگەھێن میری لێ نەھاتینە ڤەکرن
شێخان، بارزان مزووری:
وەلاتیێن کەلەکچی دلگرانیا خوە ھەمبەر نەبوونا فەرماھەنگێن میری ل وێ ناحیێ دیار دکەن و ددەنە زانین کو ئەڤە چار سالە بوویە ناحیە و ھێشتا سیمایێ کۆمەلگەھێ یێ پێڤە دیارە. فەرمانگەھێن میری ژی لێ نەھاتینە دانان.
عەزیز محەمەد، ئێک ژ ئاکنجیێن ڤێ ناحیێ یە بۆ ئەڤرۆ نیوز دیار کر کو ئەڤە چار سالە کەلەکچی بوویە ناحیە، ھەتا نھا وەکو ناحیەک ل پارێزگەھا دھۆکێ سەرەدەری ل گەل ناھێتە کرن و فەرمانگەھێن میری لێ نەھاتینە ڤەکرن ژ بەر ڤەنەکرنا وان فەرمانگەھان ھێشتا سیمایێ کومەلگەھێ لێ ناھێتە دیتن، “راستە بوویە ناحیە، بەلێ کاروبارێن مە د ناڤ ناحیێ دا برێڤە ناچن، پتریا کارێن مە ل ناحیا قەسرۆک برێڤە دچن ژ بەر نەبوونا فەرمانگەھان”.
گوران سالح، ئێک ژ وەلاتیێن ناحیا کەلەکچی یە، بۆ ئەڤرۆ نیوز دیار کر کو پتریا کاروبارێن ناحیێ ل ناحیا قەسرۆک و شێخان ب رێڤە دچن وەکو پێدڤی فەرمانگەە نەھاتینە ڤەکرن ب تایبەت دادگەە، “ئەم گەلەک پێدڤی ب دادگەھێ ھەینە، دیسا چاندن ئەڤە ناحیا ئێکێ یە بۆ چاندنێ ھەتا نھا فەرمانگەھا چاندنێ نینە، بەرھەمێ پتاتا یێن ڤێ ناحیێ بۆ ھەموو پارێزگەھێن ھەرێمێ و عیراقێ دھێنە ڤەگوھاستن و شیان ھەنە بەرھەمێ چاندنێ بۆ ھەموو کوردستانێ دابین بکەت، ھێشتا یا بێ فەرمانگەھا چاندنێ یە پێدڤیە بەری ببیتە ناحیە، ئەڤ فەرمانگەھە لێ ھاتبانە ڤەکرن”.
شیمال عادل میرۆ، ئەندامێ جڤاتا پارێزگەھا دھۆک بۆ ئەڤرۆ نیوز دیارکر کو چەندین جارا د کۆمبوونێن فەرمی دا یێن جڤاتا پارێزگەھا دھۆک دا بەحس ل وێ چەندێ کریە ئەڤ ئاریشە خستیە د بەرنامێ کارێ خوە دا بۆ پارێزگەھا دھۆک رەوانە کرینە کو ئاگەھدار بن کو چەندین فەرمانگەە ھەتا نھا نەھاتینە ڤەکرن ئەگەرێن ڤێ چەندێ ژی دزڤریت بۆ وێ قەیرانا سەر ب ھەرێما کوردستانێ دا ھاتین و شەرێ داعش ژی”.
ھەڤال محەمەد، رێڤەبەرێ ناحیا کەلەکچی بۆ ئەڤرۆ نیوز دیار کر کو چەندین پێنگاڤ و بزاڤ ھاتینە کرن کو ئاستێ کارگێری و خزمەتگوزاری ل ڤێ دەڤەرێ بەر ب ئاستەکێ باشتر بچیت، ئەم بەردەوام ژی د بزاڤان داینە کا چ یا باشە بۆ ڤێ ناحیێ بھێتە کرن، ل نێزیک ژی ئەو کێماسی دێ ھێنە بجئینان.
ناحیا کەلەکچی ل سالا 2014ێ ب بڕیارا سەرۆکاتیا ھەرێما کوردستانێ بووینە ناحیە و مەزنترین ناحیا پارێزگەھا دھۆکێ دھۆکێ یە و ئاکنجیێن وێ دگەھنە نێزیکی 50 ھزار کەسان. ھێشتا فەرمانگەھێن دادگەھـ، ھاتنوچوون، چاندن و فەرمانگەھا ئاڤێ لێ نینن.
