چار لژنە بۆ دەڤەرێن کوردستانی یێن ژ دەرڤەی ئیدارا ھەرێما کوردستانێ ھاتینە پێک ئینان
ئەڤرۆ نیوز:
چار لژنێن جودا ژ لایێ لژنا دەڤەرێن کوردستانی یێن ژ دەرڤەی ئیدارا ھەرێما کوردستانێ ل پەرلەمانی بۆ وان دەڤەران ھاتینە پێکئینان و ئەڤ لژنە راپۆرتێن تەعریب و داگیرکرنێ و زیانێن دەڤەران دێ تۆمار کەن.
ناسر ئەحمەد، بڕیاردەرێ لژنا دەڤەرێن کوردستانی یێن ژ دەرڤەی ئیدارا ھەرێما کوردستانێ دیار کر کو ئەڤ لژنە ل سەر چار دەڤەران ھاتینە پێک ئینان کو لژنەک دێ چیتە سنوورێ خانەقین و لژنەک دێ چیتە سنوورێ کەرکووکێ و لژنەکا دی ژی دێ چیتە سنوورێ مەخموور و لژنەک ژی دێ چیتە سنوورێ شنگالێ.
ناڤھاتی بۆ باسنیۆز خویا کر کو ئەڤ لژنە دێ راپۆرتێن تەعریب و داگیرکرنا ئەردی و خانیێن چاندنێ یێن وەلاتیێن کورد تۆمارکەن و د ڕاپۆرتەکێ دا دێ ئامادەکەن بۆ قەرەبووکرنێ و ئاگەھداریا ھەموو نوونەراتی و قۆنسلخانێن وەلاتان و حوکمەتا عیراقێ و دامودەزگەھێن حوکمەتا ھەرێما کوردستانێ.
ل دووماھیێ بڕیاردەرێ لژنا دەڤەرێن کوردستانی یێن ژ دەرڤەی ئیدارا ھەرێما کوردستانێ ئاماژە دا وێ چەندێ کو ١٥ رۆژ ل بەر دەستێ وانە بۆ ئامادەکرنا ڕاپۆرتێ و پشتی ب دووماھی ھاتنا ڕاپۆرتێ دێ چنە بەغدا.
