چاڤدێره‌كێ سیاسی:ل جوانرۆ و مهابادێ ب ده‌هان وه‌لاتی شه‌هید بووینه و ره‌وش گه‌له‌ك خرابه
ئه‌ڤرۆ:
چاڤدێره‌كێ سیاسی یێ كورد ل رۆژهه‌لاتێ كوردستانێ دیار دكه‌ت كو چه‌ند رۆژن هێزێن ئیرانێ ب چه‌كێ سڤك و گران ل باژێرێن مهابادێ و جوانرۆ ته‌قه ل خوه‌نیشاده‌ران دكه‌ن و هه‌تا نها ب ده‌هان وه‌لاتی شه‌هید كه‌فتینه و ره‌وشا وان هه‌ر دو باژێران گه‌له‌ك خرابه.
خالد مورادی چاڤدێرێ سیاسی خه‌لكێ باژێرێ مهابادێ بۆ ئه‌ڤرۆ دیار كر كو مخابن كوردان شاشیه‌ك مه‌زن كر چونكی پێدڤی بوو خوه‌نیشادان ل گه‌ل باژێرێن دی یێن ئیرانێ ب هه‌ماهه‌نگی هاتبانه كرن، لێ توندوتیژی و شه‌هیدكرنا چه‌ند گه‌نجان وه‌سا كر كو ل هه‌ر دو باژێرێن مهابادێ و جوانرۆ ره‌وش خراب ببیت و گۆت: (چه‌ند رۆژن ل مهابادێ هێزێن ئێمناهیێ ب چه‌كێ گران و سڤك ئێرشی خوه‌نیشاده‌ران دكه‌ن، تنێ د ناڤ رۆژه‌كێ دا ٣٠ كه‌س هاتنه شه‌هید كرن و ب ده‌هان وه‌لاتی بریندارن، هژمارا برینداران گه‌له‌ك زێده یه كو د نه‌خوه‌شخانا باژێرێ جوانرۆ دا جه بۆ برینداران نه‌مابوو و خه‌لك بریندارێن خوه ره‌وانه‌ی باژێرێ كرماشان دكه‌ن، براستی ژی یا نها ل رۆژهه‌لاتێ كوردستانێ روو دده‌ت كاره‌ساته‌ك گه‌له‌ك مه‌زنه).
ناڤهاتی راگه‌هاند كو مخابن ل باژێرێن دی یێن ئیرانێ ره‌وش وه‌سا نینه، هێزێن ده‌وله‌تێ نها هه‌موو هێزا خوه ل دژی كوردان بكار دئینن و ژ به‌ر هندێ ژی هژمارا شه‌هید و برینداران رۆژ ب رۆژێ زێده‌تر دبیت و ل باژێرێن مه‌زن یێن ئیرانێ ژی خوه‌نیشادان وه‌كو پێدڤی برێڤه ناچن و ئه‌و یه‌ك ژی بوویه ئه‌گه‌ر كو هێزێن ئیرانێ ده‌ست ب كوشتنا كوردان بكه‌ن و گۆت: (دڤێت جڤاكێ نێڤده‌وله‌تی ل هه‌مبه‌ر شه‌هیدكرنا لاوێن كورد ب ده‌ستێ ده‌وله‌تا ئیرانێ بێده‌نگ نه‌بیت، چونكی ده‌وله‌تا ئیرانێ ل به‌ر چاڤێن هه‌موو جیهانێ ب چه‌كی وه‌لاتیێن خوه دكوژیت و دڤێت ئه‌مریكا و وه‌لاتێن ئێكه‌تیا ئۆرۆپا بله‌ز ل جڤاتا ئاسایشێ داخوازا سزادانا ئیرانێ بكه‌ن).
ل ئالیێ دی رێكخستنا مافێن مرۆڤی یا رۆژهه‌لاتێ كوردستانێ ژی راگه‌هاند كو ئیرانێ ب هزاران سه‌رباز و چه‌كێن گران ل پڕانیا باژێرێن رۆژهه‌لاتێ كوردستانێ بجه كرینه و ب ره‌نگه‌كێ راسته‌وه‌خوه ته‌قه ل خه‌لكی دهێته كرن، هژماره‌ك زێده لاوێن كورد شه‌هید كه‌فتینه و ب ده‌هان كه‌س ژی بریندارن و ب تایبه‌تی نها ره‌وشا هه‌ر دو باژێرێن مهاباد و جوانرۆ گه‌له‌ك خرابه، ل هه‌ر دو باژێران دوهی كۆپته‌رێن شه‌ری ژی ته‌قه ل خوه‌نیشاده‌ران كرینه و ژ به‌ر هندێ ژی هژمارا شه‌هیدان گه‌له‌ك زێده یه.
ئه‌و یه‌ك د ده‌مه‌كێ دایه كو دو رۆژان به‌ری نها ئانتۆنی بلینكن وه‌زیرێ ده‌رڤه یێ ئه‌مریكا ژی راگه‌هاند كو ره‌وشا باژێرێ مهابادێ گه‌له‌ك خرابه و دڤێت سنۆره‌ك بۆ زێده‌گاڤیێن ده‌وله‌تا ئیرانێ بهێته دانان، چونكی هێزێن ئیرانێ مهاباد كرینه مه‌یدانا شه‌ری و گه‌له‌ك كه‌سان جانێ خوه ژ ده‌ست داینه.
