چاڤدێره‌كێ سیاسی: ئیراق ژئالیێ وه‌لاتێن هه‌رێمی دهێته ب رێڤه‌برن
هه‌ولێر، قائید میرۆ
پرۆسا سیاسی ل ئیراقێ گه‌هشتیه رێیه‌كا گرتی و هنده‌ك ئالی داخوازا دوباره ئه‌نجامدانا هه‌لبژارتنان دكه‌ن چاڤدێره‌كێ سیاسی ژی دبێژیت، هه‌لبژارتن چاره‌سه‌ری نینه بۆ ره‌وشا ئالۆزا ئیراقێ و باشترین چاره‌سه‌ری گوهۆڕینا سیسته‌مێ رێڤه‌برنا ئیراقێ یه هه‌روه‌سا ئاشكراكر، ده‌ستهه‌لاتدارێن ئیراقێ شكه‌ستن ئینایه و ئیراق ژئالیێ وه‌لاتێن هه‌رێمی ڤه دهێته ب رێڤه‌برن.
رزگار كۆچه‌ر، چاڤدێرێ سیاسی بۆ رۆژناما (ئه‌ڤرۆ) گوت” ئالیێ سه‌ره‌كیێ هه‌لبژارتنێن بۆری یێن ئیراقێ خوه ژ پرۆسا سیاسی ڤه‌كێشایه و نوكه سه‌در دناڤ په‌رله‌مانی و پرۆسا سیاسی دا نه‌مایه، ئه‌ڤه‌ژی بۆ جارا ئێكێ یه ئالیێ سه‌ركه‌فتیێ هه‌لبژارتنان ل جیهانێ نه‌شێت حوكمه‌تێ پێك بینیت ئه‌ڤه تنێ ل ئیراقێ هه‌یه، ئه‌ڤه بۆ نێزیكی ساله‌كێ یه هه‌لبژارتنێن ئیراقێ هاتینه ئه‌نجامدان و حوكمه‌ت نه‌هاتیه پێكئینان، له‌وڕا دده‌مێ نوكه‌دا پرۆسا سیاسی ل ئیراقێ گه‌هشتیه رێیه‌كا گرتی و ره‌وش یا ئالۆزه، ب دیتنا من سیسته‌مێ نوكه یێ ئیراقێ سیسته‌مه‌كێ ئالۆزه و بۆ ره‌وشا ئیراقێ یێ گونجای نینه و ئالیێن شیعی بخوه‌ژی بڤی سیسته‌می د رازی نینن، ئه‌ز باوه‌رم باشترین چاره‌سه‌ری بۆ ره‌وشا ئیراقێ ئه‌وه سیسته‌مێ فیدڕالی و كۆنفیدڕالی پێشڤه‌بچیت، چونكه هه‌كه هه‌لبژارتن ژی ل ئیراقێ بهێنه دوباره‌كرن چو گوهۆڕینێن به‌رچاف په‌یدا ناكه‌ن، ئالیێن سیاسی یێن سه‌ردكه‌ڤن د چارچوڤێ پرۆسا هه‌لبژارتنان دا ددیارن و چه‌ند كۆرسیه‌ك كێم یان زێده دووماهیێ دێ هه‌ر هه‌مان ئه‌و ئالیێن نوكه سه‌ركه‌ڤن، ئالیێ حوكمڕان ل ئیراقێ ژ سالا ٢٠٠٥ێ هه‌تا نوكه ده‌ستهه‌لات هه‌یه و داگیرانێ ژ شكه‌ستنا خوه ناكه‌ت، ئه‌و ئالیه‌ژی ئالیه‌كێ له‌شكری یه و پێگه‌هه‌كێ له‌شكری یێ هێز ل ئیراقێ یێ هه‌ی”.
ڤی چاڤدێرێ سیاسی گوت ژی” ئه‌ز باوه‌رم پرۆسا سیاسی ل ئیراقێ هند پرۆسه‌كا هه‌رێمیه ژ پرۆسه‌كا ناڤخوه‌یی، ئالیێن ده‌ره‌كی و نێڤده‌وله‌تی دزالن لسه‌ر پرۆسا سیاسیا ئیراقێ، وه‌كو ئه‌م دزانین ئالیێ شكه‌ستن ئینای ل ئیراقێ نێزیكی ئیرانێ یه و ئیران ژی یا به‌رهه‌ڤ نینه دانپێدانێ ب شكه‌ستنا خوه بكه‌ت ل ئیراقێ، ئیراق وه‌ك ده‌وله‌ت نه‌مایه و چه‌ند ده‌وله‌تێن دی پرۆسا ئیراقێ بڕێڤه دبه‌ن، ژبلی هه‌رێما كوردستانێ، ل ئیراقێ هه‌موو بووینه ده‌ستودارێن ده‌وله‌تێن ده‌ره‌كی و پرۆسه‌كا جێگیر نینه ل ئیراقێ”.
رزگار كۆچه‌ر ئاماژه‌كر” دوباره‌كرنا هه‌لبژارتنان ل ئیراقێ چو ئه‌نجامه‌ك نابیت بۆ چاره‌سه‌ركرنا قه‌یرانێن نوكه ئیراق تێدا ده‌رباز دبیت، ژ به‌ر كو هیچ ئالیه‌ك یێ به‌رهه‌ڤ نینه ده‌ست ژ ده‌ستهه‌لاتێ به‌رده‌ت و دانپێدانێ ب شكه‌ستنا خوه بكه‌ت، پێدڤیه سیسته‌مێ ب رێڤه‌برنا ئیراقێ بهێته گۆهۆڕین و هیچ ئالیه‌ك یێ پێگیر نینه ب دستووری، به‌روڤاژی هه‌كه سیسته‌م بهێته گوهۆڕین بێگومان دێ گوهۆڕین ل ئیراقێ په‌یدابن، ژوان سیسته‌مێ فیدڕالی بهێته چه‌سپاندن، شیعه‌ژی گه‌هشتینه وێ باوه‌ریێ رێڤه‌برنا ئیراقێ ب سیسته‌مێ ناڤه‌ندی چو مفا نابیت بۆ خزمه‌تكرنا گه‌لێ ئیراقێ، هه‌رسێ پێكهاته‌یێن ئیراقێ باش دزانن ئیراق بڤی شێوه‌ی ناهێته بڕێڤه‌برن و دڤێت گوهۆڕین بهێنه‌كرن”.
خویاكر” پێدڤیه ئیراق لسه‌ر چه‌ند هه‌رێمان بهێته به‌لافكرن و ئیدی هه‌ر ئێك بشێت هه‌رێما خوه بڕێڤه‌ببه‌ت باشتره كه‌س كه‌سێ قه‌بوولنه‌كه‌ت، راسته نوكه داخوازا دوباره‌كرنا هه‌لبژارتنان دهێته‌كرن، به‌لێ ئه‌ز د وێ باوه‌ریێ دا نیننم هه‌لبژارتن چاره‌سه‌ریا ره‌وشا ئیراقێ بكه‌ت”.
