چاڤدێره‌كێ سیاسی: نه زڤرینا ئاواران د به‌رژوه‌ندیا گرۆپێن چه‌كدار دایه
ئه‌ڤرۆ، له‌زگین جوقی
چاڤدێره‌كی سیاسی ل شنگالێ راگه‌هاند، ل ژێر ده‌ستهه‌لاتا گرۆپێن چه‌كدار ره‌وشا شنگالێ گه‌له‌ك یا ئالۆز بووی.
حه‌سه‌ن مجی، چاڤدێری سیاسی ل شنگالێ، گۆت” نه زڤرینا ئاوارێن شنگالێ د به‌رژوه‌ندیا گرۆپێن چه‌كدار دایه چونكو وان نه‌ڤێت ره‌وشا شنگالێ خوه‌ش بیت داكو د ناڤ دا بمینن له‌ورا گرۆپێن چه‌كدار رێگریێ ل دابینكرنا ته‌ناهیێ دكه‌ن ونوكه گرۆپێن نه‌شه‌رعی بۆ حه‌شدا شه‌عبی و ئیرانێ كاردكه‌ن ژبه‌ركو ناهێلن سنورێ د ناڤبه‌را ئیراقێ و سووریێ دا بهێـته كونترۆلكرن “.
زێده‌تر گۆت” ره‌ڤاندن و بێ سه‌روشینكرنا زارۆیان ل شنگالێ یا به‌رده‌وامه و رۆژانه خه‌لكێ شنگالێ پرسیارا چاره‌نڤیسێ زارۆیێن خوه ژ گرۆپێن د ناڤ شنگالێ دا دكه‌ن لێ تشته‌كێ ژی نوزانن ئه‌ڤه ژی بوویه ئه‌گه‌ر ترس بۆ خه‌لكی دروست ببیت و ئاواره نه‌شێن ڤه‌گه‌رن و ب دیتنا من ل ده‌مه‌كێ نێزیك خه‌لكێ شنگالێ ژبه‌ر ره‌ڤاندنا زارۆیان دێ دژی گرۆپێن نه‌شه‌رعی راوه‌ستن چونكو یێن ژ ڤان ره‌فتاران بێ زاربووین”.
خویاكر ژی” پارتی دیموكراتی كوردستان به‌رده‌وام كاردكه‌ت ئاریشه‌یێن شنگالێ ب ریێا دانوستاندنێ چاره‌سه‌ر بكه‌ت و به‌رده‌وام ده‌رگه‌هێ پارتی بۆ دانوستاندنێ یێ ڤه‌كریه و بۆ بده‌ستڤه‌ئینانا مافێن خه‌لكێ شنگالێ كاردكه‌ت بۆ ڤێ مه‌ره‌می ژی رێككه‌فتن دناڤبه‌را حوكمه‌تا هه‌رێما كوردستانێ و ئیراقێ دا هاته كرن داكو ره‌وشا شنگالێ چاره‌سه‌ر ببیت، لێ حه‌شدا شه‌عبی و گرۆپێن نه‌شه‌رعی رێگری ل بجهئینانا رێككه‌فتنی كرن چونكو هه‌كه ئه‌و رێككه‌فتن بهێته بجهئینان، به‌رژوه‌ندیێن گرۆپێن چه‌كدار د ناڤ شنگالێ دا نامینن و دێ ته‌ناهی په‌یدابیت و ئاواره ب سه‌ربلندی زڤرنه سه‌ر جهێن خوه كو ئه‌ڤه نه دبه‌رژوه‌ندیا حه‌شدا شه‌عبی وگرۆپێن نه‌شه‌رعی دا نینه”.
زێده‌تر گۆت” بۆ چاره‌سه‌ریا ره‌وشا شنگالێ پێدڤیه رێككه‌فتنا دناڤبه‌را حوكمه‌تا هه‌رێما كوردستانێ و ئیراقی دا بجه بهێت ورێكخراو ڤه‌گه‌رنه شنگالێ داكو ئاڤه‌دانی ده‌ست پێ بكه‌ت و خه‌لكێ زیاندار بهێنه قه‌ره‌بوو كرن و تیرۆرستێن داعشێ وهه‌ڤكار و پشته‌ڤانیێن وێ بهێنه سزادان داكو باوه‌ری بۆ خه‌لكێ شنگالێ دروست ببیت تاكو بشێن ڤه‌گه‌رن”.
