چاڤدێرێن سیاسی: سه‌ره‌دانا بایدنی دێ بیته ئه‌گه‌رێ گوهۆڕینێن مه‌زن ل رۆژهه‌لا ناڤین
ب، سه‌رجان مه‌حمود:
چاڤدێرێن سیاسی دیار دكه‌ن كو سه‌ره‌دانا سه‌رۆكێ ئه‌مریكا بۆ رۆژهه‌لاتا ناڤین و هه‌ڤدیتنێن وی ل گه‌ل سه‌ركردێن عه‌ره‌بی و ئسرائیلێ ئاماژه‌نه بۆ ده‌ستپێكرنا قۆناغه‌كا نوو ل رۆژهه‌لاتا ناڤین و دڤێت چاڤه‌رێی گوهۆڕینێن مه‌زن بین.
جۆ بایدن سه‌رۆكێ ئه‌مریكا پشتی سه‌ره‌دانا خوه یا بۆ ئسرائیلێ و فه‌له‌ستینێ سه‌ره‌دانا سعوودیێ كر و ل گه‌ل به‌رپرسێن وی وه‌لاتی كۆمبوو، د هه‌ر سێ سه‌ره‌دانێن خوه دا ژی سه‌رۆكێ ئه‌مریكا به‌حسێ گه‌فێن ئیران و رۆسیا ل سه‌ر رۆژهه‌لاتا ناڤین كر و ژ ئسرائیلێ و سعوودیێ خواست په‌یوه‌ندیێن خوه د وارێن سیاسی، دبلوماسی و ئابووری دا پێش بخینن و ئاشكرا كر ئه‌و وه‌ك ئه‌مریكا د هه‌ر واری دا حه‌ز دكه‌ن ل گه‌ل سعوودیێ و ئسرائیلێ دناڤ هه‌ماهه‌نگیه‌كا باش دا بن و هه‌كه پێكڤه كار بكه‌ن دشێن گه‌فێن ئیرانێ ل سه‌ر ئسرائیلێ و وه‌لاتێن عه‌ره‌بی ژناڤ ببه‌ن.
جۆ بایدن د پێنگاڤا یه‌كه‌م یا سه‌ره‌دانا خوه دا ل گه‌ل یائیر لاپید سه‌رۆك وه‌زیرێن ئسرائیلێ به‌حسێ ئاشتیا د ناڤبه‌را فه‌له‌ستینێ و ئسرائیلێ دا كر و ژ لاپیدی خواست پرسێن ل گه‌ل فه‌له‌ستینێ ب دیالۆگێ چاره‌سه‌ر بكه‌ت و راگه‌هاند كو د ره‌وشا نها دا ئیران مه‌ترسیه‌كا مه‌زنه ل سه‌ر هه‌رێمێ و گۆت: (بۆ مه ئێمناهیا ئسرائیلێ گه‌له‌ك گرنگه و بۆ ڤێ چه‌ندێ ئه‌م ب هه‌موو هێزا خوه ڤه پشته‌ڤانیا ئسرائیلێ دكه‌ین و دڤێت د هه‌ر واری دا چاڤدێریه‌كا توند ل سه‌ر ئیرانێ هه‌بیت).
جۆ بایدن یێ سه‌رۆكێ ئه‌مریكا هه‌روه‌سا د كۆمبوونا ل گه‌ل مه‌حمود عه‌باس سه‌رۆكێ ده‌ستهه‌لاتا فه‌له‌ستینێ ژی راگه‌هاند كو وه‌ك راستیه‌كا دیرۆكی ئسرائیل و فه‌له‌ستین نه‌چارن پێكڤه بژین و گۆت: (ب سالانه ئاشكرا بوویه كو ب ئالۆزی و توندوتیژیێ چو پرسێن د ناڤبه‌را فه‌له‌ستینێ و ئسرائیلێ دا چاره‌سه‌ر نابن و بۆ ڤێ چه‌ندێ دڤێت هه‌ر دو ب ئالی ب دیالۆگێ هه‌موو پرسێن هه‌ی د ناڤبه‌را خوه دا چاره‌سه‌ر بكه‌ن).
چاڤدێرێن سیاسی ژی دیار دكه‌ن كو سه‌رۆكێ ئه‌مریكا د سه‌ره‌دانا خوه یا ڤێجارێ كار بۆ چاره‌سه‌ركرنا پرسێن د ناڤبه‌را فه‌له‌ستینێ و ئسرائیلێ دا دكه‌ت و د هه‌مان ده‌می بایدنی دڤێت وه‌لاتێن عه‌ره‌بی و ئسرائیل پتر نێزیكی هه‌ڤدو ببن، بزاڤێن بایدنی یێن بۆ ئاساییكرنا په‌یوه‌ندیێن ئسرائیلێ و سعوودیێ ژ بۆ هندێ نه، چونكی ئه‌مریكا دڤێت هێزه‌كا نوو یا سه‌ربازی وه‌كو ناتۆیێ بۆ رۆژهه‌لاتا ناڤین دروست بكه‌ت كو ئارمانجا سه‌ره‌كی یا وێ هێزێ ژی ئارامیا ده‌ڤه‌رێ بیت و هه‌روه‌سا نه‌هێلیت ئیران ل رۆژهه‌لاتا ناڤین ئالۆزیان دروست بكه‌ت، ژ به‌ر هندێ ژی دهێته چاڤه‌رێكرن كو سه‌ره‌دانا بایدنی یا ڤێجارێ بۆ رۆژهه‌لاتا ناڤین ببیته ئه‌گه‌رێ گوهۆرینێن مه‌زن ل ده‌ڤه‌رێ.
