چاڤدێرێن سیاسی یێن تورکیا: تورکیا دانپێدان ب دەولەتا کوردی کر
ئەڤرۆ نیوز:
پشتی سەرەدانا سەرۆکێ ھەرێما کوردستانێ و سەرۆک وەزیرێن ھەرێما کوردستانێ بۆ تورکیا د پێشەوازیێ دا ئالایێ کوردستانێ ھاتە دانان و ب رەنگەکێ گەرم پێشەوازی ل سەرۆکێ ھەرێمێ و سەرۆکێ حوکمەتا ھەرێما کوردستانێ ھاتە کرن و چاڤدێرێن سیاسی یێن تورکیا ژی دیار دکەن کو تورکیا ب رەنگەکێ ئاشکرا دانپێدان ب دەولەتا کوردی کریە و ھەکە ل عیراقێ دەولەتا کوردی بھێتە راگەھاندن دێ تورکیا پشتەڤانیێ لێ کەت.
سینان چفت یورەک نڤیسەر و بسپۆرێ کاروبارێن سیاسی یێن تورکیا و رۆژھەلاتا ناڤین دیار دکەت کو تورکیا دبینیت کو ئێدی نەخشێ رۆژھەلاتا ناڤین ھاتیە گوھۆرین و کوردان ل عیراقێ ھەبوونا خوە سەلماندیە و رۆژ ب رۆژێ ژی ب ھێزتر دبن، کورد شیاینە ل گەل جیھانا دەرڤە پەیوەندیێن گەلەک باش دروست بکەن و رۆژانە سەرکردێن ئورۆپا و ئەمریکا سەرەدانا ھەولێرێ دکەن و وەک دەولەتەکێ سەرەدەریێ ل گەل ھەرێما کوردستانی دکەن، ژ بەر ھندێ ژی تورکیا دخوازیت د گوھۆرینێن ل رۆژھەلاتا ناڤین دا مفادار بیت و باش دزانیت کو دڤێت بەری ھەر تشتەکێ راستیا نھا قەبوول بکەت و ئەو ژی ھەبوونا کوردانە و دێ ل عیراقێ دەولەتا کوردی ھێتە راگەھاندن و تورکیا ژی ژ نھا ڤە بەرھەڤیان بۆ وێ یەکێ دکەت و گۆت: (دەمێ سەرۆکێ ھەرێما کوردستانێ مەسعود بارزانی سەرەدانا تورکیا کری و پاشی ژی سەرۆک وەزیرێن ھەرێما کوردستانێ نێچیرڤان بارزانی سەرەدانا تورکیا کری د پێشەوازیێ دا وەک سەرۆکێ دەولەتان پێشەوازی ل وان ھاتە کرن و ئالایێ کوردستانێ ژی ھاتە دانان، ئەو یەک دانپێدانەکا فەرمی یە ب ھەبوونا دەولەتا کوردی و ئەو ھەلویستێ تورکیا دێ کاریگەریا خوە ل وەلاتێن دی یێن رۆژھەلاتا ناڤین ژی کەت و دڤێت کورد مفایەکێ باش ژ رەوشا نھا ل دەڤەرێ ببینن).
ل ئالیێ دی شاھین ئالپای نڤیسەرێ ناڤدارێ تورکیا ژی د نڤیسەکا خوە دا دوھی راگەھاند کو تورکیا ھەست ب رۆلێ گرنگ یێ کوردان ل عیراقێ کریە و دخوازیت خوە پتر نێزیکی کوردان بکەت، ژ بەر ھندێ ژی دەمێ سەرۆکێ ھەرێما کوردستانێ و سەرۆک وەزیرێن وێ ھەرێمێ سەرەدانا تورکیا کرن وەک سەرۆکێ دەولەتان پێشەوازی ل وان ھاتە کرن و ئالایێ کوردستانێ بۆ جارا یەکێ ل کۆچکا سەرۆک کۆماری و سەرۆک وەزیرێن تورکیا ھاتە بلند کرن. ئەو یەک شۆرەشەک مەزن بوو و ھەکە تورکیا شیا ڤێ گوھۆرینێ ل ھەمبەر کوردان بکەت و ئیرادا وان قەبوول کەت دێ ئیران و سووریا ژی نەچار بن دانپێدانێ ب مافێ کوردان بکەن و گۆت: (تورکیا دبینیت کو ھەکە بخوازیت ل رۆژھەلاتا ناڤین خوەدان گۆتن و سەنگ بیت دڤێت پشتەڤانیێ ل کوردان بکەت، چونکو نھا نەخشێ دەڤەرێ دھێتە گوھۆرین و تورکیا و وەلاتێن دی یێن ھەرێمێ نەشێن ئاستەنگیان ل ھەمبەر ئاڤابوونا دەولەتا کوردی دروست بکەن، چونکو ئەمریکا و روسیا ژ بۆ بەرژەوەندیێن خوە نەچارن ھەبوونا کوردان قەبوول بکەن، واتە زۆرداریا کو د چەرخێ بیستێ دا ل کوردان ھاتیە کرن ئێدی ب دووماھی ھات و دێ کورد ژی گەھنە مافێن خوە، ژ بەر ھندێ ژی تورکیا ئەو یەک دیت و دخوازیت پەیوەندیێن خوە ل گەل کوردان باش بکەت، ل گۆر نێرینا من ژی ھەبوونا دەولەتەکا کوردی ل عیراقێ چو مەترسیێن خوە بۆ تورکیا نینن و ئەزموونا چەند سالێن بۆری ژی ئەو یەک سەلماندیە).
ل ئالیێ دی چەندین دەزگەھێن راگەھاندنا تورکیا ژی پشتی سەرەدانا نێچیرڤان بارزانی یا بۆ تورکیا دیار کرن کو تورکیا پێدڤی ب گازا سروشتی و پەترۆلا کوردستانێ ھەیە، پەیوەندیێن تورکیا ل گەل ھەموو جیرانێن وێ خراب بووینە و تنێ جیرانا تورکیا کو دشێت مفایەکێ باش بگەھینتێ ھەرێما کوردستانێ یە و بەرپرسێن نھا یێن تورکیا ژی باش دیتن کو ھەکە وان بڤێت ل دەڤەرێ ب ھێز کەڤن دڤێت ھەبوونا دەولەتا کوردی ل عیراقێ قەبوول بکەن و دانانا ئالایێ کوردستانێ د دەمێ سەرەدانا سەرۆکێ ھەرێما کوردستانێ و سەرۆک وەزیرێن وێ ھەرێمێ ژی دا نیشا ددەت کو ئێدی تورکیا ب رەنگەکێ فەرمی ھەبوونا دەولەتەکا کوردی ل عیراقێ قەبوول کریە.
