چاڤدێرەكێ سیاسی: پێدڤیە ئێكەتی بزڤڕیت كۆمبوونێن جڤاتا وەزیران و بەرنامەیێ حوكمەتێ بجهبینیت
ئەڤرۆ
سلێمانی، عەزیز هەورامی
سامان شالی، چاڤدێرێ سیاسی بۆ ڕۆژنامەیا ئەڤرۆ دبێژیت: ئەركێ حزب و ئالیێن سیاسی یە قەوارەیێ دەستووری یێ هەرێما كوردستانێ بپارێزن و گەشێ پێ بكەن. بەلێ مخابن حزب هەیە دخوازیت قەوارەیا مە بەر ب لاوازیێ ببەت و لاوازبوونا ڤی قەوارەی ئانكو لاوازبوونا هەموو كوردایە.
سامان شالی گوت ژی» بەردەوامیا ناكۆكیان مە لاواز دكەت بەرامبەر بەغدا و پێدڤیە شەرێ ڕاگەهاندنێ بهێتە ڕاوەستاندن، ئەم دەولەت نینین و دڤێت قەوارێ خوە بزانین و هەروەسا بزانین بەرژەوەندیێن وەلاتان ل گەل مە د چاوانن، وەلاتێن هەرێمی كوردستانەكا لاواز دڤێت و دخوازن ئابۆر و چاندن وپیشەسازیا مە لاواز بكەن، بەلێ وەلاتێن ئورۆپی و ئەمریكا داخواز ژ مە دكەن كاربكەین و ئارمانجا وان كوردستانەكا ب هێزە د چارچۆڤەیێ ئیراقێ دا، هەكە ئەڤ هەرێمە ژ دەست مە بچیت هەتا 100 سالێن دی ژی بدەستڤە نائینین».
خویاكر ژی» هەكە مە باوەری ب هەڤدو هەبیت دێ چارەسەری بۆكێشەیان ژی هەبیت و گرنگە تیما ئێكەتیێ بزڤریت بۆ كۆمبوونێن جڤاتا وەزیران و بەرنامەیێ حوكمەتێ بجهبینیت و ل سەر مێزا دانوستاندنێ ل سەر كێشەیان باخڤن ژبەركو كێشە وەسا د مەزن نینن».
سەبارەت هەلبژارتنان ژی دبێژیت» پێدڤیە هەلبژارتن ددەمێ خوە یێ دیاركری دا بهێنە ئەنجامدان، هەروەسا شەرێ ڕاگەهاندنێ ژی بهێتە ڕاگرتن و شاندێن دانوستاندكار بەردەوامبن تاكو دگەهنە ڕێككەفتنێ بۆ پاراستنا قەوارەیێ مە و بەرژەوەندیێن خەلكێ كوردستانێ و جارەكا دی ئێكگرتنا مالا كوردی بهێتە دروستكرن».
ب دیتنا ڤی چاڤدێرێ سیاسی گرنگە لژنەیەكا بلند ژ سەرۆكێن حزبان بهێتە پێكئینان و كۆمبوونێن دەوری هەبن و هەر كێشەیەكا هەبیت د كۆمبوونێن سەرۆك حزبان دا چارەسەری بۆ بهێتە دیتن و پێشنیازێن خوە بۆ حوكمەتێ وپەرلەمانی بهنێرن».
