چاڤدێرەک مەرەما سەرەدانا بارزانی بۆ تورکیا ئاشکەرا دکەت
ئەڤرۆ نیوز:
دوھی سەرۆکێ ھەرێما کوردستانێ مەسعۆد بارزانی سەرەدانا تورکیا کر و ل گەل تەیب رەجەب ئەردوگان سەرۆک کۆمارێ تورکیا و بنالی یەلدرم سەرۆک وەزیرێن تورکیا کۆمبوو، ھەروەسا بریارە سەرۆکێ ھەرێمێ ل گەل جێگرێ سەرۆکێ ئەمریکا (جۆ بایدنی) ل تورکیا کومببیت، زێرەڤان بەرواری ماموستایێ زانکۆیا دھوکێ و شارەزا دکاروبارێن وەلاتێ تورکیا ل دۆر ڤێ سەرەدانێ بۆ رۆژناما ئەڤرۆ دبێژیت، گوھۆڕینێن ھەرێمی و ب تایبەتی ل سەر قەیرانا سووریێ و نێزیکبوونا رووسیا و تورکی و ھەروەسا تورکیا وئیسرائیلێ و گوھۆڕینا سیاسەتا تورکی بەر ب سیاسەتەکا ئەمنی پراکماتیکی و گرنگیا جیۆسیاسی یا ھەرێما کوردستانێ دڤان ھەڤکێشەیان دا بوویە ئەگەرێ داخوازکرنا سەرۆکێ ھەرێما کوردستانێ بۆ ئەنقەرە.
زێرەڤانی گۆت” گەلەک ئەگەر ھەنە کو سەرۆک بارزانی سەرەدانا ئەنقەرە بکەت، وەکو لایەنێ جیۆسیاسی، لەورا گوھۆڕینا بەلانسا ھێزێ د بەرژەوەندا رووسیا و ئیرانێ دایە و لاوازیا ئیدارا ئەمریکا، تورکیا نەچارکریە گوھۆڕینان د سیاسەتا خوە یا دەرڤە دا بکەت و بەر ب کارئینانا میکانزمێن ژیواری ب تایبەتی پراگماتیکیا سیاسی بچیت، ھەروەسا داخوازکرنا سەرۆکێ ھەرێمێ بۆ دیارکرنا چارچۆڤێ سیاسەتا نوو یا تورکیا بەرامبەر کوردان د چارچۆڤێ ھەرێما کوردستانێ دا، دیسا ژلایێ ئەمنی ڤە، بەرفرەھبوون و گرانیا رۆلێ ئەمنی و لەشکەری یێ پەکەکێ و کارتێکرنا نەرێنی ل سەر بەرژەوەندیا تورکیا ھەیە، ھەروەسا ل سەر رۆلێ ھەرێما کوردستانێ و بارزانی ژی ھەیە، لەورا نێزیکبوون و ئارمانجێن ھەردولایی د بوارێ ئەمنی دا، پێدڤی ب پلاندانان و دیارکرنا قۆناغا نوو یا سیاسەتا تورکیا بەرامبەر ھەرێما کوردستانێ ھەیە، لەوما تورکیا دێ پەیوەندیێن خوە ل گەل رووسیا د ڤی چارچۆڤی دا ب کارئینیت”.
ژلایێ ئابووری ڤە ناڤھاتی گۆت” بادەکا پەترۆلا کوردستانێ دێ ئارمانجەکا دی بیت، ب تایبەتی پشتی ئاساییکرنا پەیوەندیێن تورکیا و ئیسرائیلێ و ھەروەسا تورکیا رووسیا و سەرگرتنا پرۆژێ تورکیا یێ تایبەت ب پەترۆلێ و گازا سرۆشتی ڤە کو ئەنقەرە بزاڤان دکەت ببیتە ژێدەرێ ڤەگوھاستنا پەترۆلا رووسیا و ھەرێما کوردستانێ بۆ رۆژئاڤای و ھەروەسا پرۆژێ گازا سرۆشتی یێ تورکیا و ئسرائیلێ، لەوما ئەنقەرە ھەرێما کوردستانێ ب ژێدەرەکێ ئابووریێ گرنگ دزانیت و دێ بەردەوام بیت ل سەر ڤێ گرنگی پێدانێ ژبۆ ب دەستڤەئینانا ئارمانجێن ئابووری و بەردەوامبوونا رێککەفتنا وزێ ل گەل ھەرێما کوردستانێ ھەتاکو سالا 2019″.
ل دۆر گرنگیا ڤێ سەرەدانا سەرۆکێ ھەرێمێ، زێرەڤان بەرواری دیارکر”گرنگیا ڤێ سەرەدانێ بۆ سەرۆکێ ھەرێمێ د چارچۆڤێ رۆلێ ھەرێمی یێ سەرۆکێ ھەرێمێ دا دیار دبیت بۆ قۆناغا داھاتی، چونکی ھەرێما کوردستانێ دێ بیتە ئێک ژ یاریکەرێن سیاسی ب تایبەتی ھەکە پەیوەندیێن ئەمریکا و تورکیا بەر ب ئاقارەکێ سەقامگیردا ڤە چوون، چونکی دوورکەفتنا ئەنقەرە و واشنتۆن کارتێکرنا نەرێنی ل سەر ھەرێمێ ھەیە، لێ ئەڤ رۆلە ھەکە د چارچۆڤێ کوردستانێ دا نەھێتە رێکخستن، دێ ڤەرێژێن نەرێنی ل سەر ناڤخوەیا کوردستانێ کەت”.
ناڤبری خویاکر ژی”تورکیا ھەتا نوکە ھەلویستەکێ فەرمی نینە بۆ سەربەخوەیا کوردستانێ، ھەروەسا لێک نێزیکبوونا تورکیا ل گەل حوکمەتا عێراقێ د بوارێ ئەمنی دا پتر گۆمانێ ل سەر پشتەڤانیا تورکی بۆ پرۆژێ پارتی یێ سەربەخوەیا کوردستانێ دروست دکەت، لێ د سیاسەتا ژیواری و پراگماتیکی دا و ژبۆ لاوازکرنا پەکەکێ و یەپەگێ، تورکیا دێ پشتەڤانیا سەربەخوەیا کوردستانێ کەت بۆ کێمکرنا ھێرشێن ئەمنی ل سەر ئێک پارچەیا ئاخا خوە”.
زێدەتر گۆت”پەیوەندیێن ئەمریکا و تورکیا پشتی کۆدەتایا لەشکری ل تورکیا ل ناڤەراستا مەھا بۆری، د حالەتەکێ پری قەیران دا دبورن، لەورا ب کارئینانا مۆشەکێن دوورھاڤێژ ژلایێ رووسیا ڤە ل دژی خەلکێ سووریێ زەنگەکا مەترسیدار بوو بۆ ئەمریکا و لاوازبوونا وێ ل رۆژھەلاتا ناڤین، ھەروەسا نێزیکبوونا تورکیا و رووسیا و چینێ پتر گڤاشتن ل سەر ئەمریکا کرینە بۆ چارەکرنا ئاریشێن خوە ل گەل ئەنقەرە، دیسا دوورکەفتنا ئەمریکا و تورکیا ل سەر پرۆژێ چارەسەریا قەیرانا سووریێ دروست ببوو، لەوما ئەنقەرە پرۆژێ گوھۆڕینا رژێما سووریێ پەیرەو دکەت، لێ ئەمریکا گرنگیێ پتر ددەتە شەرێ داعشێ و پشتەڤانیا گرۆپێن شەرکەر، ھەروەسا ھاریکاریا کوردان ل سووریێ ژلایێ ئەمریکا ڤە تورکیا ڤێ چەندێ ب ھێرش ل سەر ئاسایشا خوە دزانیت و ئەمریکا ب سیاسەتا دوو روویی گۆنەھبار دکەت”.
ناڤھاتی ئەوژی دیارکرکو ئەمریکا دێ ھەڤکاریا تورکیا کەت ل دژی پەکەکێ و لاوازکرنا پەیوەندیێن راستەوخوە ل گەل پەیەدێ و ئەڤ چەندە دێ کارتێکرنێ ل سەر ھەلویستێ ھەرێمی یێ کوردان کەت و دبیت ئەمریکا ھەرێما کوردستانێ ب بژاردە بزانیت بۆ لێک نێزیکرنا بەرژەوەندیێن خوە ل گەل تورکیا.