چاڤەڕێی بەرسڤا بەغداینە بۆ هنارتنا مووچەیێن سێ مەهان
هاریكارێ سەرۆكێ حوكمەتا هەرێما كوردستانێ ل دۆر دانوستاندنێن حوكمەتا هەرێمێ و وەزارەتا پەترۆلا ئیراقێ یێن تایبەت ب هنارتنا پەترۆلا هەرێما كوردستانێ دبێژیت: وەزیرێ پەترۆلا ئیراقێ بۆ دەمێ دو ڕۆژان ل هەرێما كوردستانێ بوو و ل سەر پتریا بابەتێن تەكنیكی، قانوونی و كارگێری دانوستاندن هاتنە كرن .
ڕێباز حەملان، هاریكارێ سەرۆكێ حوكمەتا هەرێما كوردستانێ گۆت ژی» ئەو بەرپرسیارەتیا ل سەر هەرێما كوردستانێ هەی یا هاتیە بجهئینان, بابەتەك هەبوو ل سەر وی پارەیێ تەرخانكری یێ گرێدای كۆمپانیێن بەهەمئینەرێن پەترۆلێ ل هەرێما كوردستانێ كو مە هەژمارەك گۆتبوو و ئیراقێ هەژمارەك دانابوو. نوكە نێزیكبوونەك د وی بابەتی دا هەیە».
گوت ژی» پشتی زڤرینا وەزیرێ پەترۆلا ئیراقێ بۆ بەغدا دێ ل گەل سەرۆك وەزیرێن ئیراقێ و ئالیێن پەیوەندیدار كۆمبیت و پاشی دێ بەرسڤا مە دەن. ئەوا مە ژ شاندی و بۆچوونا سەرۆك وەزیرێن ئیراقێ دیتی دیاردكەت كو دێ گەهینە ئەنجامەكی و ب زووترین دەم پەترۆل دێ هێتە هنارتن».
هاریكارێ سەرۆكێ حوكمەتا هەرێما كوردستانێ باس ل نامەیەكا مەسرۆر بارزانی، سەرۆكێ حوكمەتا هەرێما كوردستانێ دكەت كو ئاراستەی محەمەد شیاع سۆدانی، سەرۆك وەزیرێن ئیراقێ كربوو و تێدا داخوازا ڕاستڤەكرنا قانوونا بودجەی و دەرئینانا مووچەیێن فەرمانبەران ژ مەزاختیێن ڕاستەقینە هاتیە كرن، هەڤدەم داخواز ژی هاتیە كرن بەغدا مووچەیێن مەهێن 10 و 11 و 12 یێن فەرمانبەرێن هەرێما كوردستانێ ب هنێریت.
ڕێباز حەملان ل دۆر وێ چەندێ دبێژیت» مە داخوازا مووچەیێن شەش مەهێن دوماهیا سالا 2023 كریە، بەلێ حوكمەتا ئیراقێ ڕازیبوون ل سەر هنارتنا مووچەیێن سێ مەهان دا و بۆ هەر مەهەكێ 700 ملیار دینار دیاركرن. نوكە ژی ژ وان سێ مەهان، پارەیێ دو مەهان هنارتیە و بڕیارە ل دووماهیا ڤێ مەهێ ژی 700 ملیارێن دی ب هنێریت».
هاریكارێ سەرۆكێ حوكمەتا هەرێما كوردستانێ دبێژیت» د وێ نامەیێ دا، سەرۆكێ حوكمەتا هەرێما كوردستانێ داخوازا سێ مووچەیێن دی كریە بۆ مەهێن 10 و 11 و 12 و سەرۆك وەزیرێن ئیراقێ، محەمەد شیاع سۆدانی سۆز دایە سەرۆكێ حوكمەتا هەرێما كوردستانێ د كۆمبوونا جڤاتا وەزیرێن ئیراقێ دا و ل ژمێریا دوماهیا یا وەزارەتا دارایی یا ئیراقێ بهێتە باسكرن و دبێژیت» هیڤیەكا مەزن هەیە كو سێ مووچەیێن دی ژی بۆ هەرێما كوردستانێ بهێنە هنارتن و نوكە چاڤەڕێی بەرسڤا حوكمەتا ئیراقێ و وەزارەتا دارایی یا ئیراقێ دكەین».
ئاماژەكر، خالا دویێ یا نامەیا سەرۆكێ حوكمەتا هەرێمێ بۆ سەرۆك وەزیرێن ئیراقێ ل سەر بودجەیە و دبێژیت» داخواز هاتیە كرن ئەو بڕگەیا پەیوەندی ب مووچەیێن فەرمانبەرێن هەرێمی ڤە هەی، ژ مەزاختیێن ڕاستەقینە بهێتە دەركرن و حوكمەتا ئیراقێ ژی سۆز ئەنجامدانا وێ چەندێ دایە».
هەروەسا دیاركر» بۆ سالا 2024 لژنەیەكا هەڤپشك ژ هەردو حوكمەتێن هەرێما كوردستانێ و ئیراقێ دێ هێتە پێكئینان و ل گەل هەردو دیوانێن چاڤدێریا دارایی یا هەرێمێ و ئیراقێ دێ كاركەن بۆ هنارتنا قانوونا بودجەی بۆ جڤاتا نوونەران و ڕاستڤەكرنا وێ بڕگەیێ و پشكەكا مەزن یا ئالیێن شیعی ژی ل سەر وی بابەتێ نەرمی دیاركریە» .
