چاڤ و گاڤ
نایف مەحموود
ژیان گەشتەكا بەردەوامە، مرۆڤ د ڤێ گەشتیێ دا ب دو ژ وان دیاردەیێن خودایێ مەزن ب مە بەخشین وەك (چاڤ و گاڤ) ئانكو دیتن و ڕێڤەچوونا ل سەر پێیان، ئەڤ هەردو نیعمەتە هێز و داینەمۆیا ژیانا هەر كەسەكی نە بۆ تەمەنێ دەربازكرنا ژیانێ.
دەمێ ئەم دبێژین خودێ كەسێ ژ چاڤ و گاڤان نەكەت، واتە هەكە ئەڤە نەمان هینگێ مرن ژ وێ ژیانێ خۆشترە یا ئەڤ هەردوكە دگەل نەبن، چونكو بێی هەبوونا دو چاڤێن ڕۆن مرۆڤ ژ دیتن و جوانی و خەملا ڤێ ژیانێ بێ بەهر دبیت و ژ كاركەفتنا پێیان ژی دگەل دا ڕۆژا مرۆڤی یا هیڤی و خۆشییان ئاڤا دبیت.
د قۆناغا گەنجاتیێ دا، ئەڤ هەردو هێزە گۆپیتكا چەلەنگی و جوانیێ نە، گەنجاتی ژی دەربڕینا وزە، نووخوازی و ئۆمێدێ یە. چاڤ ل ڤێرە د تیژ و گەش و دووربینن، گاڤ ژی د سڤك، بلەز و ب هێزن، د ڤێ قۆناغێ دا، تەندروستی وەك تاجا شاهانەیا زێڕینە ل سەر سەرێ هەر مرۆڤەكی، گەلەك جاران مرۆڤ هەست پێ ناكەن هەتا كو ژ دەست نەدەت.
تەندروستیەكا باش دەروونەكێ ساخلەم و بەختەوەریێ پێشكێشی مە دكەت، ل ڤێرە ڕاستە ب بوورینا تەمەنی جەستە ماندیبوونا سالان نیشا ددەت و پیراتیێ دئینیت، بەلێ تەندروستی ئەو پرەیە یا كو گەنجاتیێ ب پیراتیەكا سەرفەراز و ئارام ڤە گرێددەت، پاراستنا لەش و دەروونی د سالێن لاوینیێ دا، دابینكرنا هێزێ یە بۆ هندێ كو د پیراتیێ ژی دا مرۆڤ بشێت ب سەربلندی و ب كێمترین ئازار پێنگاڤان ب هاڤێژیت، بێگومان (چاڤ و گاڤ) فەلسەفەیا تەمەنی نە و خۆشیا ژیانێ نە، ئەڤجا دا گرنگیێ ب تەندرۆستیا خۆ بدەین ژ هەموو لایەكی ڤە تاكو بارێ ڤێ دونیایێ گەلەك ل سەر مە گران نەبیت و بشێین ئەو بەرپرسایەتیا ل سەر ملێن مە ب تەندرۆستیەكا باش ب ڕێ بكەین.