چه‌كدارێن داعشێ ل نێزيك كه‌ركووكێ خالێن پشكنينێ ددانن
ئه‌ڤرۆنيوز:
رێڤه‌به‌رێ پۆليسێن قه‌زا وناحيێن كه‌ركووكێ ئاشكرا دكه‌ت، چه‌كدارێن رێكخراوا داعش يا تيرۆرستى ل ناڤ باژێرێ كه‌ركووكێ شانێن نڤستى يێن هه‌ين وهه‌ر ده‌مه‌كێ بڤێت دشێن ره‌وشا ئه‌منى يا وى باژێرى تێكبده‌ن.
عه‌ميد (سه‌رحه‌د قادر) رێڤه‌به‌رێ پۆليسێن قه‌زا وناحيێن كه‌ركووكێ گۆت” شوڤا 17/6/2018 چه‌كدارێن داعشێ ل سنوورێ خورماتوو خالا پشكنينێ دانابوو وچه‌ند كه‌س كوشتن وهنده‌ك كه‌س ژى وه‌كو بارمته ل گه‌ل خوه برن، هه‌روه‌سا رۆژانه ل سنوورێ قه‌زا حه‌ويجه كار وچالاكيان دژى هێزێن ئه‌منى ئه‌نجام دده‌ن”.
گۆت ژى” چه‌كدارێن داعشێ ل ده‌رڤه‌ى باژێرێ كه‌ركووكێ هيزا خوه يا هه‌ى، ل گه‌ل وێ چه‌ندێ هێزا سه‌ربازى وشانێن نڤستى ل ناڤ باژێرێ كه‌ركووكێ يێن هه‌ين، به‌لێ زێده‌تر چاڤێ وان يێ ل سه‌ر پشكا سه‌ربازى وب وێ رێ كار وچالاكيێن سه‌ربازى ئه‌نجام دده‌ن”.
عه‌ميد سه‌رحه‌د قادر زێده‌تر بۆ باسنيوز گۆت” هه‌رده‌مێ چه‌كدارێن داعشێ دخوازن، ب رێيا شانێن خوه يێن نڤستى دشێن ره‌وشا ئه‌منى يا كه‌ركووكێ تێكبده‌ن، له‌وما چه‌كدارين داعشێ به‌رده‌وام مه‌ترسيه‌كا مه‌زنن بۆ ناڤ كه‌ركووكێ”.
دياركر ژى” ژبه‌ركو كه‌ركووكێ چه‌ندين تايبه‌تمه‌نديێن خوه يێن هه‌ين، ب تنێ هێزه‌كا دياركرى نه‌شێت ره‌وشا ئه‌منى ل وى باژێرى بپارێزيت ول دووماهيێ هه‌موو پێكهاتێن وێ پێكڤه دشێن ره‌وشا كه‌ركووكێ بپارێزن، به‌لێ بۆ پاراستى باژيرى ژ هه‌ر حاله‌ته‌كا نه چاڤه‌رێكرى، پێدڤيه پێشمه‌رگه وه‌لاتيێن كه‌ركووكێ بپارێزيت”.
