چه‌كدارێن داعشێ چووينه گونده‌كێ دناڤبەرا هەولێر و كەركووكێ دا
ئەڤرۆ نیۆز، قائید میرۆ
چەكدارێن داعش ل ناحیا پردێ یا دناڤبەرا هەولێر و كەركووكێ دا چووینە سەر گوندەكێ كوردنشین و ژێدەرەكێ ئەمنی ژی دبێژیت، حەشدا شەعبی ل ناڤا گوندی بووینە و چو هەلویست نەبووینە.
ژێدەرەكی ل ناحیا پردێ بۆ ئەڤرۆ نیۆز دیاركر” شەڤا بۆری هێزەكا چەكدارێن داعش چووینە ناڤا گوندێ نەبیاوا یا سەر ب ناحیا پردێ و پشتی گەهشتنا هێزا داعش بۆ ناڤا ئەڤی گوندێ كوردنشین درۆشمێن خوە لسەر دیوارێن گوندی نڤیسینە و دوڤدا گوندیان تەقە ل ئەڤێ هێزا داعش كریە و نەچاركرینە و بەرەف پاشڤە خوە ڤەكێشن، ل ئەنجامێ ئەڤێ هەوا چەكدارێن داعش بۆناڤا گوندێ نەبیاوا چو زیانێن گیانی نەبووینە و داعش نەڤیایە چو تاوانان ئەنجامبدەت، هەتا جهێ وان ل دەڤەرێ بمینیت.
ئەڤی ژێدەری گۆت ژی” بارەگەهێ حەشدا شەعبی ل گوندێ نەبیاوا و هەموو دەڤەرێ هەیە، بەلێ چو بەرسیڤ بۆ هاتنا داعش نەبووینە بۆناڤا گوندی و داعش بەردەوام ل دەڤەرێ هاتن وچوونێ دكەت و هێزێن حەشدا شەعبی و پۆلیسێن فیدڕال نەشێن بەرسینگا چەكدارێن داعش بگرن.
ژێدەری ئاماژە بڤێ چەندێ كر” بشەڤ گروپا تیرۆرستیا داعش ل ناحیا پردێ و قەزا دبس و دەوروبەرێ كەركووكێ دەستهەلات هەیە و بشەڤ هێزێن عێراقی چو لڤین نینە، تنێ ب رۆژ دەردكەڤن، ئەڤەژی بۆیە دەلیڤە داعش زێدەتر لڤینان بكەت.
ناحیا پردێ دكەڤیتە ناڤبەرا هەولێر و كەركووكێ و ژلایێ ئیداریڤە سەر ب پارێزگەها كەركووكێ یە و پتریا ئاكنجیێن وێ كورد و توركومانن.
