چه‌ندین كێشێن قه‌زا شێخان گه‌هاندینه حوکمه‌تا عیراقێ
ئه‌ڤرۆ نیوز، بارزان مزوورى:
سه‌ردار یەحیا عەبدولعەزیز، قایمقامێ قه‌زا شێخان بۆ ئه‌ڤرۆ نیوز گۆت: ب رێیا په‌رله‌مانتارێن به‌غدا یێن سه‌ر ب لیستا پارتى دیموكراتى كوردستان ڤە، ل ئه‌ینیا بورى بۆ ماوێ دو رۆژان ل به‌غدا ل گه‌ل هه‌ر ئێك ژ وه‌زیرێ داد و وه‌زیرێ شاره‌وانى و وه‌كیلێ وه‌زیر شاره‌وانى و رێڤه‌به‌رێ گشتى یێ شاره‌وانیا یێن عێراقێ و وه‌زیرێ پلان دانان و وه‌زیرێ شه‌هیدان و وه‌زیرێ وه‌رزش و لاوان كۆمبووین ل دۆر چه‌ندین پرسێن گرنگ یێن نه‌هاتینه چاره‌سه‌ركرن د وارێن جودا یێن قه‌زا شێخان.
ناڤهاتى خویاكر: ژوان پرسێن گرنگ دوسه‌یا خالد شه‌مۆ ئه‌و گه‌نجێ ئێزدى كو دوباره ڤه‌دیتن بۆ دوسه‌یا وى بهێتە كرن ل دادگه‌هێ ژبه‌ركو ئه‌وى كه‌سى شاهدحال هه‌نە، دڤێت دیتنا وان هه‌موو شاهدحالان بهێتە وه‌رگرتن دیراسه‌یه‌كا باش بهێتە كرن ، پرسا دویێ هه‌تا نوکە سه‌نه‌دێن عه‌ردێ وه‌لاتیێن قه‌زا شێخان بۆ وان نه‌هاتینه دان ل موسلن ئه‌ڤه چه‌ندین ساله عه‌ردێن وان وه‌سا ماینه نه‌هاتینه تاپۆكرن ژبه‌ر نه‌دانا وان سه‌نه‌دێن عه‌ردى یێن وان، ژلایێ خۆڤه وه‌زیرێ شاره‌وانى بریاردا ل نێزیك ئه‌ڤ كێشه بهێته چاره‌سه‌كرن، پرسا سیێ چاره‌سه‌كرنا كێشا عه‌ردێ زێده‌ترى 200 جوتیارا ل ده‌ڤه‌را زێلكان كۆ ئه‌ڤه‌ى 2003 ئه‌ڤ كێشه‌یا مایه هه‌لاویستى نه‌هاتیه چاره‌سه‌ركرن چه‌ندین جارا كێشه دناڤبه‌را وان جوتیارا دروست بوویه مه داخواز ل وان كر كو ئه‌و عه‌رد بیته سه‌نه‌ده بۆ وان جوتیارا، دا ئه‌و جوتیار ژى ژ ڤێ كێشێ دوماهیك بهێن، پرسا چارێ دروستكرن و نووژه‌نكرنا رێیا زێلكان ژبه‌ركو ئه‌و رێك ژ كاركه‌فتیه رێیا چه‌ندین گوندانه ل ده‌ڤه‌را زێلكان بنارا چیایێ مه‌قلوب بریار هاتە دان كۆ داخلى میزانیا 2020 بیت ئه‌و رێك بهێتە دروست كرن، پرسا پێنجێ پێدانا قه‌ر و پێشینه‌یا بۆ گه‌نجێن ده‌ڤه‌رێ بۆ وان گه‌نجێن خودان شیان و خودان پرۆژێن تایبه‌ت بۆ پرۆژێن پیشه‌سازى و چاندنێ ب رێیا وه‌زاره‌تا پلان دانانێ ل به‌غدا ،پرسا شه‌شێ دابینكرنا ئامیرێن مه‌زن بۆ شاره‌وانیا قه‌زا شێخان ژبه‌ركو ڤێ شاره‌وانیه پێدڤى ب ئامیرانه چونكو ئه‌ڤه چه‌ندین ساله ئامیره بۆ نه‌هاتینه دابین كرن.
ناڤهاتى گۆت ژی: ئه‌و پرسێن مه بۆ جهێن شوله‌ژێ گه‌هاندین ب سینگه‌كێ به‌رفره جهێن شوله‌ژێ ره‌زامه‌ندى ل سه‌ر دایە، كو پێداچوون بۆ بهێتە كرن ل نێزیك كار بۆ بهێتە كرن، داکو بهێنە جێبه‌جێ كرن، هەروەسا په‌رله‌مانتار د. خالیدا ل په‌رله‌مانێ عێراقێ گه‌له‌ك یا هاریكار بوو ل گه‌ل وان ژبۆ چاره‌سه‌ركرنا وان كێشێن قه‌زا شێخان .
