چه‌ند رينمايى بۆ مووچه‌خۆران هاتن ده‌ركرن
ئه‌ڤرۆنيۆز:
لژنا بايۆمه‌ترى يا تۆمارا مووچه‌خۆران سه‌باره‌ت كێشا نه‌بوونا ناڤێن فه‌رمانبه‌ران دسيسته‌مى دا وئه‌و مووچه‌خۆرێن هه‌تا نوكه دناڤ وى سيسته‌مى دا نه‌هاتينه تۆماركرن، چه‌ند رێنمايان ده‌ردكه‌ت.
ل دووڤ نڤيساره‌كا لژنا بلند يا بايۆمه‌ترى ل جڤاتا وه‌زيرێن هه‌رێما كوردستانێ كو ل 14/11/2017 هاتيه ده‌ركرن، لژنا بلند يا بايۆمه‌ترى يا مووچه‌خۆران، چه‌ندين رێنما ئاراسته‌ى وه‌زاره‌تان كرن.
دوان رێنمايان دا، ئاماژه ب وێ چه‌ندێ هاتيه كرن، هه‌ر وه‌زاره‌ته‌ك ناڤ وپێزانينێن مووچه‌خۆرى دناڤ سيسته‌مێ بايۆمه‌ترى نه‌هاتيه تۆماركرن، ب شێوێ ليست بۆ سكرتاريه‌تا جڤاتا وه‌زيران بهنێريت ب رێيا نوونه‌رێ فه‌رميێ وه‌زاره‌تێ نه‌كو ب رێيا مووچه‌خۆرى ب خوه.
لژنا بايۆمه‌ترى يا مووچه‌خۆران داخوازكريه ژى، پێدڤيه د نڤيسارێ دا وه‌زيرێ په‌يوه‌نديدار ب رۆهنى ئه‌گه‌رێ پاشڤه‌مان وبه‌رده‌واميا مووچه‌خۆرى ل سه‌ر كارێ خوه ئاماژى پێ بكه‌ت وبه‌رپرسياره‌تيێهه‌لبگريت كو ئه‌ڤ مووچه‌خۆره دده‌مێ دياركرى يێ تۆمارا بايۆمه‌ترى يێ به‌ردوام بوو ل سه‌ر كارێ خوه وهه‌ژى تۆماركرنێ يه.
دپشكه‌كا دى يا رێنمايان دا، ئاگه‌هداريا وان مووچه‌خۆران ژى هاتيه كرن كو خوه تۆماركرى وناڤێن وان دسيسته‌مى دا نينه وباركۆدێن خوه به‌رزه‌كرين، ب هه‌مان شێوه پێدڤيه وه‌زيرێ په‌يوه‌نديدار ناڤێن وان ب نڤيساره‌كا فه‌رمى ب شێوێ ليست بۆ سكرتاريه‌تا جڤاتا وه‌زيران بهنێريت، ئه‌وژى ب رێيا نوونه‌رێ وه‌زاره‌تێ بهێته هنارتن وپێدڤيه بهێته نڤيسين ل بن رۆناهيا بريارا 111 ل 30 گۆلانا 2017 ورێ چاره‌كێ بۆ ببينن وئاماژه ب وێ چه‌ندێ بهێته كرن، ئه‌ڤ كه‌سه جودا ژ كه‌يسا برگه (1) هاتينه تۆماركرن وناڤێن وان دسيسته‌مى دا نينن وباركۆدێن خوه يێن به‌رزه‌كرين.
ديسا تێدا هاتيه رۆهنكرن، ئه‌و مووچه‌خۆرێن خوه تۆماركرى وناڤێن وان دسيسته‌مى دا نينه وباركۆد يێن هه‌ين، دڤێت فۆرما بايۆمه‌ترى يا په‌سه‌ندكرى ل گه‌ل هژمارا باركۆدى ونڤيسارا پشتگيريا فه‌رمانگه‌ها خوه ل گه‌ل به‌لگه‌نامێن فه‌رمى وه‌كو ناسنامه وره‌گه‌زنامه، يان كارتا پێزانينان ببه‌ن بۆ بنگه‌هێن تۆماركرنێ ونابيت بۆ جهه‌كێ دى ببه‌ن.
هه‌ر دوان رێنمايان دا هاتيه كو ئه‌و مووچه‌خۆرێن مۆله‌تا بێ مووچه، يان مۆله‌تا ب مووچه وه‌رگرتى كو دخوازن ده‌ست ب كارى بكه‌ن، پێدڤيه ڤان به‌لگه‌نامان ل گه‌ل خوه به‌ن بۆ بنگه‌هێ خوه تۆماركرنێ، ئه‌وژى فۆرما بايۆمه‌ترى يا په‌سه‌ندكرى، فه‌رمانا پێدانا مۆله‌تێ، فه‌رمانا ده‌ست ژكارى هه‌لگرتن وفه‌رمانا ده‌ست بكاربوونێ.
ل دۆر مووچه‌خۆرێن ل ده‌رڤه‌ى وه‌لاتى، يان ئه‌و مووچه‌خۆرێن مفادارێن پرۆگرامێ تواناسازى ول ده‌ڤه‌ى وه‌زاره‌تا خواندنا بلند، به‌لكو گرێداى وه‌زاره‌تا پلاندانانێ نه، ب هه‌مان شێوه نڤيسارا پشتگيري فه‌رمانگه‌ها خوه ونڤيسارا پشتگيريا وه‌زاره‌تا پلاندانانێ پێشكێشى بنگه‌هێ تۆماركرنێ بكه‌ن وئاماژه ب وێ چه‌ندێ بهێته كرن كو مووچه‌خۆر يێ به‌رده‌وامه ل سه‌ر خواندنێ وده‌ست بكارنه‌بوويه.
بۆ وان فه‌رمانبه‌رێن كو ژنوو دێ هێنه دامه‌زراندن، دڤێت فۆرما بايۆمه‌ترى وفه‌رمانا وه‌زارى يا دامه‌زراندنێ يا سه‌رۆكاتيا جڤاتا وه‌زيران وفه‌رمانا وه‌زاره‌تا دارايى وفه‌رمانا وه‌زارى وفه‌رمانا ده‌ست بكاربوونێ ، ل گه‌ل ناسناما بارێ كه‌سى وره‌گه‌زناما عيراقى دگه‌ل خوه ببه‌ن بۆ بنگه‌هێن تۆماركرنێ، تاكو بهێنه تۆماركرن ومووچێن وان پێ بهێنه دان.