چه‌ند نوونه‌رێن پارتى ل تلكێفێ ووانكێ ژلايێ چه‌كدارێن ميليشيان دهێنه ده‌سته‌سه‌ركرن
ئه‌ڤرۆنيوز:
ل تلكێفێ ووانكێ، حه‌شدا شه‌عبى رێگريێ ل خه‌لكى دكه‌ت بچنه بنگه‌هێن ده‌نگدانێ وليست وبه‌ربژارێن جهێ باوه‌ريا خوه ب هه‌لبژێرن وچه‌ند نوونه‌رێن پارتى ژى ده‌سته‌سه‌ركرن.
يه‌لدا شه‌موئێل، به‌رپرسێ لژنا ناوچا پارتى ديموكراتى كوردستان ل تلكيێفێ ئاشكراكر” ل تلكێفێ ووانكێ حه‌شدا شه‌عبى رێگريێ ل خه‌لكى دكه‌ت پشكداريێ دهه‌لبژارتنان دا بكه‌ت وهنده‌ك ئه‌ندامێن پارتى ژى ده‌سته‌سه‌ركرينه”.
يه‌لداى، ل دووڤ وشه، زێده‌تر گۆت” حه‌شدا شه‌عبى ب هه‌موو شێوه‌كى گه‌فان ل خه‌لكى دكه‌ت وره‌وشه‌ك په‌يداكريه كو خه‌لك ئازاد نه‌بن ده‌نگ ب چ لايه‌نه‌كى بده‌ن، چونكى ب چه‌ك ڤه دناڤ بنگه‌هێن ده‌نگدانێ دهێنه ديتن”.
دياركر” حه‌شدا شه‌عبى ب ئاشكرايى گه‌فان ل خه‌لكى دكه‌ن ودبێژن پێدڤيه ده‌نگ ب وان بده‌ن ونابيت ده‌نگ ب به‌ربژارێن ليستا پارتى بده‌ن وترسه‌كا مه‌زن ل ده‌ف خه‌لكى په‌يداكريه”.
ئاماژه دا ژى كو ل لايێ به‌نداڤا مووسل به‌ر ب ده‌ڤه‌را وانكێ، حه‌شدا شه‌عبى بۆمبێن چاندى يێن داناين بۆ وێ چه‌ندێ خه‌لك نه‌چيت ده‌نگێ خوه بده‌ت.