چوونا حەج و عومرێ ھاتە ڕاگرتن
ئەڤرۆ نیوز:
رێڤەبەرێ گشتیێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ئاشکرا کر کو وەلاتێ سعوودیێ ب فەرمی بالیۆزخانا خوە ل عیراقێ ئاگەھدارکریە کو ئێدی ڤیزا نەدەتە وەلاتیێن عیراقێ، ژ ئەگەرێ ڤێ بڕیارا سعوودیێ ژی گەشتێن حەج و عمرێ دێ ھێنە ڕاگرتن.
مەریوان نەقشبەندی، رێڤەبەرێ گشتیێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ د داخویانیەکا رۆژنامەڤانی دا ڕاگەھاند، حوکمەتا سعوودیێ ب فەرمی بالۆزخانا خوە ل عیراقێ ئاگەھدارکریە کو دانا ڤیزێ بۆ وەلاتیێن ھەرێمێ و عیراقێ ڕاگریت و گۆت: “ژ ئەگەرێ ڤێ بڕیارا سعودیێ وەلاتیێن ھەرێمێ و عیراقێ نەشێن گەشتێن حەج و عومرێ بکەن و جارێ دیار نینە کانێ کەنگی دێ ڤیزە بۆ وەلاتیان ھێنە دان، دا کو بشێن گەشتان بکەن”.
ژ لایێ خوە ڤە شێخ قاسم بەرزنجی، رێڤەبەرێ گشتی یێ حەج و عومرێ یێ ھەرێما کوردستانێ دیار کر، ھەتا نوکە ئەو ب فەرمی ل سەر ڕاگرتنا دانا ڤیزێ بۆ وەلاتیان نەھاتینە ئاگەھدارکرن و بۆ NNA گۆت: “ھەتا نوکە کاروبارێن کۆمپانیێن عومرێ ل بەغدا نەھاتینە تمامکرن، لەو نوکە گەشتێن عومرێ بۆ وەلاتێ سعوودیێ گیرۆ بووینە”.
بەری نوکە ژی مەریوان نەقشبەندی، رێڤەبەرێ گشتیێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ خویا کربوو کو ل نێزیک گەشتێن عومرێ دێ دەست پێ کەن.
ئەڤ بڕیارا سعوودیێ د دەمەکی دایە کو ژ ئەگەرێ سێدارەدانا (شێخ نەمر باقر) کەسایەتیێ شیعێن وی وەلاتی، ئالۆزی کەفتیە پەیوەندیێن سعوودیێ و ئیرانێ، سعوودیێ پەیوەندیێن خوە یێن دبلۆماسی د گەل ئیرانێ برینە و چەندین بڕیار ژی دەربارەی پەیوەندیێن خوە یێن دبلۆماسی د گەل وەلاتێن دەڤەرێ دەرئێخستینە.