چوونا کوردان بۆ ناڤ باژێڕێ مووسلێ دا کارەکێ خوەکوژیە
ئه‌ڤرۆ نيوز:
پەرلەمانتارەکێ پارتی دیموکراتی کوردستان رەتکر، دەمێ ئۆپەڕاسیۆنا ئازادکرنا مووسلێ نێزیک ببیت و راگەھاند، ئەو پێزانینێن بەحسێ ئازادکرنا مووسلێ دکەن تنێ شەڕەکێ دەروونی یە حوکمەتا عیراقێ ھەمبەر گروپا تیرۆرستیا داعشێ دکەت و پڕۆسا ئازادکرنا مووسلێ پێدڤی ب ھاریکاریا نێڤدەولەتی ھەیە.
دکتۆر عەرەفات کەرەم، پەرلەمانتارێ کورد ل پەرلەمانێ عیراقێ ل سەر لیستا پارتی بۆ رۆژناما ئەڤرۆ گۆت” ئەو پێزانینێن بەحسێ دەستپێکرنا ئۆپەڕاسیۆنا ئازادکرنا مووسلێ دکەن، تنێ شەڕەکێ دەروونی یە حوکمەتا عیراقێ دژی چەکدارێن داعشێ دکەت و چو راستی بۆ نینە، ئەم دزانین ھێشتا چەندین دەڤەرێن گرنگ یێن ماین و نەھاتینە رزگارکرن وەک ئەنبار و بێجی و گەلەک دەڤەرێن دی ژی، راستە پلان یا ھەی بۆ رزگارکرنا مووسلێ، بەلێ ھێشتا پلانەکا نێزیک نینە و ئەوا دھێتە بەلاڤکرن ژی، پڕۆپاگندەیە بۆ نزمکرنا ورەیێن چەکدارێن داعشێ، ئەز دوێ باوەریێ دامە ھەتا دەڤەرێن سونی نەھێنە رزگارکرن، مووسل ناھێتە رزگارکرن، ھەکە ئەنبار و بێجی ب تەمامی رزگار نەبن، چو مفا بۆ رزگارکرنا مووسلێ نابن، کۆنتڕۆلکرنا مووسلێ پڕۆسەیەکا گەلەک ب زەحمەتە و پێدڤی ب ھاریکاریا نێڤدەولەتی ھەیە، ب تایبەتی پشکداریا (حەشد وەتەنی) بۆ رزگارکرنا مووسڵ”.
عەرەفاتی گوت ژی” ئەز ب خوە ل دەڤ سەلیم جبوری سەرۆکێ پەرلەمانێ عیراقێ بووم ل دۆر قانوونا پێکئینانا (حەشد وەتەنی) نەگەھشتنە چو ئەنجامان، چونکی سونی ب چو شێوەیەکی درازی نینن حەشد شەعبی بچیتە دناڤا مووسلێ دا، ھەکە شیعە پشکداری دئازادکرنا مووسلێ دا بکەن، دێ بیتە شەڕێ سونە و شیعان، ھەکە پێشمەرگە پشکداریێ د وی شەڕی دا بکەت، دێ بیتە شەڕێ کورد و عەرەبان”.
زێدەتر گوت” ب دیتنا من مووسل ب ھیڤیا عیراقیان ڤە ناھێتە رزگارکرن، ھەکە پشتەڤانی و ھاریکاریەکا نێڤدەولەتی نەبیت، ئەڤە پتری سالەکێ یە مووسل دبن کۆنترۆلا داعشێ ڤە و نوکە داعشێ خوە بەرھەڤکریە و جھێن خوە گرتینە، پێدڤیە دەمێ دەستپێکرنا پڕۆسا ئازادکرنا مووسلێ، کورد تنێ دەڤەرێن خوە یێن دەوروبەرێ مووسلێ بگرن، چوونا کوردان بۆ ناڤ باژێڕێ مووسلێ دا کارەکێ خوەکوژیە کورد دکەن، ئەمریکا پێخوەش نینە ددەمەکێ زوو دا داعش ل عیراقێ بھێتە ژناڤبرن، ژ بەر کو ھەکە داعش ل عیراقێ نەما، ئەڤە جھێ ئەمریکا ژی ل عیراقێ نامینیت، ئەڤ شەڕە د بەرژەوەندیا ئەمریکا دایە و ئەمریکا ب بەھانەیا داعشێ یا ھاتیە دناڤ عیراقێ دا، شەڕێ نوکە ل گەل داعشێ دھێتەکرن شەڕەکە ب وەکالەت دھێتەکرن، ئەڤە ھەموو پلانن دەمێ دبێژن ئەمریکا بڕیاردایە داعشێ ل عیراقێ ژناڤببەت و رۆسیا ژی ل سووریا داعشێ ژناڤببەت، ھندەک بۆچوونێن ب ھێز یێن ھەین کو دێ شەڕێ سیێ یێ جیھانی دەست پێکەت، بەلێ ئەز ب خوە ل گەل ڤێ بۆچوونێ نیننم کو شەڕێ جیھانی دەست پێبکەت، بەلێ یێ رژدم ل سەر وێ چەندێ ھەتا ھێزەکا نێڤدەولەتی نەھێت و پشتەڤانیێ نەکەت، مووسل ناھێتە ئازادکرن”.
