چو جاران شانازیێ ب خوە نابەم
هەرهین محەمەد:
ئەکتەرێ بەرنیاس و دیارێ پارێزگەها دهۆکێ، جاسم زەینەل، ئەوا کو زێدەتر دناڤ نڤشێ نوی دا ب ناڤێ (جاسم مەمانی) دهێتە نیاسین، ناڤهاتی د دیدارەکا تایبەت دا بۆ بەرپەرێ هونەری یێ ڕۆژنامەیا «ئەڤرۆ تێشتەکا گرنگ ل سەر ژیانا خۆ یا هونەری هەڵدا و ڕاگەهاند کو ئەو بەردەوام ل دووڤ وان ڕۆلان دگەڕێت ئهوێن گونجایبوونەکا مەزن و راستەقینە ل گەل کەسایەتیا وی هەیی، دا کو بشێت کاریگەریەکا سەنگین و کەتوارانە ل سەر هزرا بینەری بجهـ بهێلیت.
جاسمی ئەوچەندەژی گۆت: دەمێ ئەز رۆلەکێ نوی وەردگرم، پێشیا هەر تشتەکێ هەولددەم ب تەمامی بگههمە لۆژیک و ناڤەرۆکا بابەتێ سیناریۆیێ و پشتی تێگەهشتن و هەرسکرنا بابەتێ تەمام دبیت ژ نوی دەست ب ژبەرکرنا ئاخفتنان و ئاڤاکرنا لایەنێ دەروونی و فیزیکی یێ کارەکتەری دکەم، دا کو بشێم ب باشترین و سەردەمیانەترین شێوە پێشکێشی جەماوەری بکەم.
سەبارەت چارچۆڤێ کاریگەرییا رۆلێن وی ل سەر جەماوەری، جاسم زەینەل دووپاتی ل سەر هندێ کر کو هێشتا بەشەکێ زۆر یێ خەڵکی ب ناڤێ کارەکتەرێن درامایان گازی دکەنێ، وەکی ناڤێن تژی بیرهاتن: (محێ)، (رزگار)، و (مام خلیل). ناڤبری ئەڤێ چەندێ بۆ ئاستێ و هشیاریا بینەری و سەرکەفتنا ڕاستەقینە یا وان رۆلان ڤەگەڕاند کو شیانە د ناخێ خەڵکی دا بژین.
ڕزگاری گۆت: «چو جاران من کارەکێ هونەری نەهەلبژارتیە ژبوو ب دەستڤە ئینانا داهاتەکی یان لایەنەکێ دارایی، بەلکو گەلەک جاران کارێن مەزن یێن هونەری من پێشکێشی کرینە و ژ لایێ دارایی ڤە زۆر باش بوینە، بەلێ من ب دلەکێ مەزن ڕەتکرینە، چونکو ئاستێ وان یێ هونەری نە ل ئاستێ پێدڤی و شایستە بوو. ئەڤ کارێ ئەز دکەم فەرە کارەکێ دروست، پیرۆز و پاقژ بیت. ل دەڤ من هەموو کەس نابنە هونەرمەند، و ئەز چ جاران شانازیێ ب خۆ نابەم، بەلكو ئەز بتنێ خزمەتکارەکێ بچووکێ مللەتێ خۆ مە د واری هونەری دا.
جاسمی ل دووماهیا ئاخفتنا خوە دا ئەو چەندە ژی گۆت: ئەز ڕەخنا ئاڤاکر ب سنگەکێ کێشای و فرەهـ وەردگرم، چونکی ڕەخنا دروست وەکو خۆدیکێ یە بۆ ڕاستکرڤەکرنا کێماسیێن هونەرمەندی زێدەتر گۆتژی: جوداهیێ دناڤبەرا چو ئەکتەران ناکەم و هەموو وەکو خوشک و برا دبینم، بەلێ هندەک جاران ژبەر کەمیا تێگەهشتنێ یان نەبوونا هەماهەنگیێ، ئاریشێن تەکنیکی ل سەر دەمێ وێنەگرتنێ چێدبن و ئەڤەژی نەژ ئاریشەیێن مەزنن و ئەڤ تشتە هەرچێدبن و یا نورمالە.
