چو ژڤانێن سەرەدانا شاندێ ھەرێمێ بۆ بەغد نەھاتینە دیار کرن
ئەڤرۆ نیوز:
پەیڤدارێ بناڤێ حوکمەتا ھەرێما کوردستانێ دبێژیت، بەحسێ سەرەدانا شاندێ ھەرێما کوردستانێ بۆ بەغدا ھاتیە کرن، بەلێ ھەتا نوکە چو دەم و بەرنامە بۆ ڤێ سەرەدانێ نەھاتینە دیار کرن.
سەفین دزەیی بۆ مالپەرێ فەرمیێ پارتی دیموکراتی کوردستان راگەھاند، بەحسێ سەرەدانا شاندێ حوکمەتا ھەرێما کوردستانێ بۆ بەغدا ھاتیە کرن، بەلام ھەتا نوکە چو دەم و بەرنامێن تایبەت بۆ ڤێ سەرەدانێ نەھاتیە دارێتن و دیارکرن.
سەفین دزەیی ھەروەسا گۆت: گەلەک کێشە دناڤبەرا ھەردو ئالیان دا ھەنە، کو ئەو کێشە ژی نەیێن رۆژەک و دوو رۆژانینە، بەلێ ئەو لبەراھیا ھەموویان دھێت، ھەماھنگیا د ناڤبەرا ھەردوو ئالیان دایە بۆ روب رووبوونا داعشێ یە، کو ئەڤ کارە ل سەر ھەموو کاران دھێت، ژ ئالیێ ئێمناھیێ ڤە ژی ھەتا رادەکی ھەماھنگی دناڤبەرا ھەولێر و بەغدایێ دا یا ھەی.
سەبارەت ئازادکرنا باژێرێ مووسل ژی و پشکداریا پێشمەرگەی، سەفین دزەیی گۆت: بەری نوکە کومبوون د ناڤبەرا ھەردو ئالیان دا ھاتینە ئەنجامدان، بەلێ ل ڤان نێزیکان بڕیارە کومبونێن ل سەر ئاستەکێ بلند و بەرفرەە بۆ دانوستاندنان سەبارەت پرۆژێن ھەڤپشک و ھاریکاریا ئازادکرنا باژێرێ مووسلێ بھێنە ئەنجامدان.
پەیڤدارێ حوکمەتا ھەرێما کوردستانێ ھەروەسا دیارکر، سەرۆکێ ھەرێما کوردستانێ ب ئاشکرایی گۆتیە بەغدا پێشمەرگە دشێت بۆ رزگارکرنا مووسلێ ھاریکاریا ھەوە بکەت، لێ ل گۆڕ رێککەفتنەکێ دناڤبەرا ھەولێرێ و وەزارەتا بەرەڤانیا ئەمریکا، بەلێ دڤێت پێشوەخت دانوستاندنەکا رژد دڤی بابەتی دا بۆ دارشتنا پلانەکا ھەڤپشک ھەبیت بھێتە کرن.