چۆمسکی: ئەمریکا سیاسەتا خوە یا ل ھەمبەر رژێما ئەسەدی و کوردان گوھۆڕی
ئەڤرۆ:
زانایەکێ ناڤدارێ ئەمریکا دیار دکەت کو ئەمریکا سیاسەتا خوە یا ل ھەمبەر رژێما سووریێ د گوھۆرینیت و د دەمەکێ نێزیک دا ناخوازیت رژێما سووریێ ژ ناڤ بچیت و ل دووڤ زانایێن سیاسەتێ ئەمریکا ھەتا د پلانا یەکەم دا دخوازیت رێکخستنێن تیرۆرست یێن وەک قاعیدە و داعش ب تەمامی لاواز بکەت و پاشی پلانا دویەم یا گوھۆرینا رژێما سووریێ ب کریاری بجە بینیت.
نۆم چۆمسکی ڤەکۆلەر و زانایێ سیاسەتێ د داخۆیانیەکی دا بۆ تەلەفزیۆنەکا ئەمریکا راگەھاند کو سەرکەڤتنا کوردان ل کۆبانێ و بەرفرەھبوونا دەستھەلاتا رێکخستنێن تیرۆرست یێن وەک داعش و ئەلنوسرە یا سەر ب قاعیدە ڤە پلانا رێڤەبەریا ئەمریکا ل سەر سووریێ ب تایبەت و رۆژھەلاتا ناڤین و ئەفریقیا ب گشتی دایە گوھۆرین و گۆت: (د دەستپێکێ دا ئەمریکا خواست ژ ھەموو کۆمێن چەکدار یێن ئۆپۆزسیۆنێ مفا وەربگریت و ب وی رەنگی رژێما ئەسەدی ب روخینیت بۆ ڤێ چەندێ ھەم د وار ئابووری و ھەم ژی د وارێ سەربازی دا ھارکاریا وان کر، لێ دەرکەڤت ھۆلێ کو ھەردو رێکخستنێن تیرۆرست ھەموو ئۆپۆزسیۆنا راست یا سووریێ ژناڤبرن و ھێرشی عیراقێ، کوردێن باشور و رۆژئاڤا کرن، ژ بەر ڤێ چەندێ ژی رێڤەبەریا ئەمریکا مەترسیا د پلا یەکەم دا گوھارت و رژێما سووریێ کەڤتە پلانا دویێ).
چۆمسکی ھەروەسا دیار ژی کر سەدەمێ دی یێ گوھۆرینا سیاسەتا ئەمریکا ل ھەمبەر رژێما سووریێ، نەبوونا بەدلێ رژێمێیە و ئۆپۆزسیۆن ژی بێ ھێزە و ئەڤ نێزیکی شەش ھەیڤن پینتاگۆن و دەزگەھێ ھەوالگێریێ ل سەر پلانا نوو گەنگەشە دکەن و پلانا نوو د پێنگاڤا یەکەم دا ژناڤ برنا تیرۆرستێن داعش و قاعیدەیە و پلانا دویەم ژی نەھێلان یانکۆ گوھۆرینا رژێما ئەسەدی یە و گۆت: (ل دووڤ ھزرا من بەرخوەدانا کوردان ل ھەرێما کوردستانا غیراقێ و رۆژئاڤا ژی کاریگەریا خوە ل گوھۆرینا سیاسەتا ئەمریکا کریە و نھا رێڤەبەریا کۆچکا سپی دخوازیت ل سووریێ ژی کورد ب تەمامی بگەھنە مافێن خوە و د سووریا نوو دا جە بگرن و ئەز باوەر دکەم ئەمریکا دێ بۆ گوھۆرینا رژێما سووریێ کوردان بدەتە پێش و ھەرێما کوردان ل رۆژئاڤا بێخیتە ژێر پاراستنێ دا).
چۆمسکی د پشکەکا دی یا ئاخڤتنا خوە دا ژی دیار کر کو دبلۆماسیا سەرکەڤتی یا مەسعود بارزانی سەرۆکێ ھەرێما کوردستانا عیراقێ ژی د قەبوولکرنا کوردێن رۆژئاڤا دا رۆلەکا مەزن دیتیە و ل سەر داخوازا بارزانی ئەمریکا ل گەل ھێزێن ھەڤپەیمانا نێڤدەولەتی ھاریکاریا کۆبانێ کریە و گۆت: (ھەکە سەرکردێن کوردان ڤێ سیاسەتا خوە یا عاقلانە بەردەوام بکەن دێ بشێن خوە بگەھیننە ئارمانجێن خوە و ببنە ھەڤپەیمانێ سەرەکی یێ ئەمریکا و ئورۆپا ل رۆژھەلاتا ناڤین، لێ دڤێت سەرکردێن کورد خوە نەکەنە قوربانیا بەرژەوەندیێن چو ئالیەکی و ھەر پێنگاڤەکا خوە ب زانەبوون و ژیرانە ب ھاڤێژن).
ھەر د ڤێ دەربارێ دا جەنگیز چاندار رۆژنامەڤانێ ناڤدار یێ تورکیا ژی راگەھاند کو توکیا سیاسەتا گەلەک شاش و دوور ژ راستیێ ل ھەمبەر سووریێ و دەرڤە برێڤە بر و د قۆناغا نھا دا ب تنێ مایە و گۆت: (تورکیا دەرفەتەکا زێرین ژ دەست دا و ھەکە ھاریکاریا کوردان کربا و سنۆرێن خوە بۆ تیرۆرستان داخستبا دا ئەڤرۆ کورد پەیوەندیێن کوردان ل تورکیا باشتر با و دا سەرکەڤتنا کۆبانێ ببیتە سەرکەڤتنا گەلێن رۆژھەلاتا ناڤین، لێ تورکیا بەرۆڤاژی ڤێ یەکێ کر و ئەڤرۆ ب تنێیە).
رۆژنامەڤانێ تورکیا د دووماھیا ئاخڤتنا خوە دا ڤێ یەکێ ژی زێدە کر و گۆت: (ئەمریکا، ئورۆپا پیرۆزباھیێ ل سەرکەڤتنا کوردان دکەن لێ سەرۆک کۆمارێ تورکیا دبێژیت ئەو رێ نادەن ھەرێمەکا دی یا وەک ھەرێما کوردستانێ ئاڤا بیت، ئەم قەبوول بکەین یان نە ئەڤرۆ گەلێ کورد بۆ جیھانێ سەلماندیە کو وان مافێ خوە یێ رەوا دڤێت و پێنگاڤ ب پێنگاڤ ب فەرمی رێڤەبەریا رۆژئاڤا قەبوول دکەن، د رەوشا نھا دا ب دەستپێشخەریا بەرێز بارزانی سەرۆکێ ھەرێما کوردستانا عیراقێ دەریێ جیھانێ بۆ کوردێن رۆژئاڤا ژی ڤەدبیت، ڤێجا دڤێت تورکیا ئێدی سیاسەتا خوە یا ھەمبەر کوردا بدەتە گوھۆرین).
