چۆمسکی: کورد ھەڤپەیمانێن ھەری مەزنێن ئەمریکا و ئەورۆپانە
ئەڤرۆ، سەرجان مەحمود:
ڤەکۆلەرێ ناڤدارێ ئەمریکی د داخۆیانیەکی دا راگەھاند کو ئەمریکا ئێدی ژ ھەردەمی زێدەتر دخوازیت کوردان ل رۆژھەلاتا ناڤین بکەتە ھەڤپەیمانێ خوە و پرۆژێ دەولەتا سەربخوە یا کوردستانێ ل باشور و رۆژئاڤا ل سەر مێزا سەرۆک و کۆنگریسا ئەمریکا دایە و ژ بەر وێ یەکێ ژی نھا گەلەک وەلاتێن ھەرێمێ دژبەریا کوردان دکەن.
نۆم چۆمسکی نڤیسەر و ڤەکۆلەرێ ناڤدارێ ئەمریکا ل سەر رەوشا رۆژھەلاتا ناڤین و ب تایبەت رەوشا کوردستانێ و قۆناغا ئاشتیا ل تورکیا و پاشەرۆژا کوردان و ستراتیژیا ئەمریکا و ئورۆپا ل سەر رۆژھەلاتا ناڤین داخۆیانیێن گرنگ دانە دەزگەھێن راگەھاندنێ و دیار کر کو ئەز ب رەحەتی دبێژم ئەڤ نیڤ سەدسال یا کوردایە و ھەموو شەرت و مەرج بۆ ئاڤاکرنا دەولەتەکا سەربخوە یا کوردان گونجاییە.
ڤەکۆلەرێ ئەمریکی د دەستپێکێ دا ل سەر رەوشا سووریێ، عیراق و تورکیا و ھێرشێن داعشێ بۆ سەر کۆبانێ راوەستیا و دیار کر کو ئالۆزیێن ل وان وەلاتان ئالۆزیێن گەلەک کورن و بنگەھێ خوە ژ ناکۆکیێن مەزھەبی وەردگرن و دو یان سێ ئالیێ ڤان ئالۆزیان ھەنە و گۆت: (یا یەکێ ل ژێر سیاسەتا مەزھەبا سوننە تورکیا، قەتەر و عەرەبستانا سعوودیی نە و ئالیێ دویێ یێ ئالۆزیان ئیران، سووریە و عیراقن و ئالیێ سیێ ژی باکور، باشور و رۆژئاڤا کوردستانێ نە و ئەمریکا و ھەڤپەیمانا نێڤدەولەتی ژی ل گەل کوردان بووینە پشکەک ژ ئالۆزیان و ل دووڤ ھزرا من ئێدی ئەمریکا و ئورۆپا ژ دل ڤە و ل دووڤ بەرنەمەکا دارێتی ل گەل کوردان جە دگرن و کورد ئێدی زێدەتر بووینە ھەڤپەیمانێ ئەمریکا و ئورۆپا و ئەڤ یەک د بەرژەوەندا کوردان دایە).
چۆمسکی ھەروەسا دیار ژی کر کو عیراق، سووریە، ئیران ل ئالیەکی و قەتەر، تورکیا و سعوودیە ل ئالیێ دی، د مەزنبوونا داعشێ دا خوەدان رۆلەکا مەزنن و ھەردو ئالیان ژی خوەستن داعشێ بۆ بەرژەوەندیێن خوە بکار بینن و گۆت: (رێکخستنا تیرۆرست یا ناڤھاتی د ناڤ خوە دا نە یەک خەتە و سێ ھێلێن خوە ھەنە، ھێلەکا وێ ل گەل ھەڤپەیمانا ئیرانێ، ھێلا دی یا وێ ل گەل تورکیا و ھەڤکارێن وێ و ھێلا دیتر ژی جیھادی نە و داعش کارتەکا مەزنە د دەستێ ھەردو ئالیان دا، لێ ئالیێ جیھادی یا د ناڤا داعشێ دا رۆژ ب رۆژ ب ھێزتر دبیت و ئەز باوەر دکەم د دەمەکی کورت دا جیھادی دێ ب تەمامی دەستھەلاتا خوە د ناڤا داعشێ دا بجە بکەن و ئەو یەک دێ ببیتە بنکەڤتنا ھەردو ئالیێن رۆژھەلاتا ناڤین ژی).
ل سەر رەوشا کۆبانێ و ھەموو کوردستانێ ژی ڤەکۆلەرێ ئەمریکی راگەھاند کو ھێرشێن داعشێ بۆ سەر کۆبانێ و شەنگال و دەڤەرێن دی یێن کوردستانێ ب دەستپێشخەریا وان ھەردو ئالیان بوویە و گۆت: (سەدەمێ سەرەکی یا ھێرشێن داعشێ بۆ سەر کوردان ئاستەنگکرنا راگەھاندنا دەولەتا کوردی ل باشور و ھەرێمەکا کوردی ل رۆژئاڤایێ کوردستانێ بوو و ژ ئالیەکی ئیران، سووریە و عیراقێ تیرۆرست ل دژی باشور بکار ئینان و وان دەست ب ھێرشێن درندانە ل کۆبانێ کرن و تورکیا و ھەڤکارێن وێ ژی داعش ل دژی کوردان کرنە د ناڤا ھێرشێن نە مرۆڤی دا و ھەردو ئالیان ژی دخواستن کو ب ڤی رەنگی ئیرادا کوردان تەسلیم بگرن لێ ب وان ھێرشان بنگەھێ ئێکەتیا نەتەوی یا کوردان دروست بوو و کورد دبنە یەک و ئەو یەک سەرکەڤتنا کوردان گەرەنتی دکەت).
چۆمسکی سەبارەت ب کوردستانێ و بزاڤێن یەککرنا ناڤمالا کوردی ژی راگەھاند کو رۆلێ مەسعود بارزانی د یەکگرتنا کوردان رۆلەکی دیرۆکیە و ھەردەم رێزدار بارزانی ھەول دایە کو ئەمریکا و ھەڤپەیمانا نێڤدەولەتی ھاریکاریا باشور و رۆژئاڤایێ کوردستانێ بکەن و گۆت: (نھا ژ ھەر دەمی زێدەتر کورد نێزیکی راگەھاندنا دەولەتا کوردی بووینە و سەرکەڤتنا وان د شەرێ داعشێ دا دێ پشتەڤانیا بۆ راگەھاندنا دەولەتا کوردی ل جیھانێ ژی زێدەتر بکەت، ل ئالیێ دی ھندەک کەس دبێژن پارتا کارکەرێن کوردستانێ و پارتا ئێکەتیا دیمۆکراتیک ل دژی دەولەتا کوردی نە لێ یا راست وەسا نینە و ھەردو پارتێن کوردی ژی وەک ھەرێما کوردستانێ دخوازن دەولەتا سەربخوە یا کوردان بھێتە راگەھاندن و یا راستی ژی ئەڤە کو کورد دەولەتا خوە ئاڤا بکەن).
د دووماھیا ئاخڤتنا خوە دا ژی چۆمسکی راگەھاند کو ئەمریکا و ھەڤپەیمانیا نێڤدەولەتی ژ ھەر دەمی زێدەتر دخوازن بنگەھەکا بھێز یا کوردان ھەبیت و نە ل دژی راگەھاندنا دەولەتا کوردی نە و ل دووڤ ھزرا من نھا ھەڤپەیمانێ ھەری مەزن یێ ئەمریکا و ئورۆپا کوردن و ئەڤ ھەڤپەیمانی د بەرژەوەندا ھەردو ئالیان دایە.
