چێروکا ئەو گەنجێ ئێزدیێ راھێنانێن خوەکوژیێ دناڤ داعش وەرگرتین
ئەڤرۆ نیوز ، ھلوری:
پشتی کو داعشێ ئەو ل دەڤەرا شنگاڵ ل گەل چەند کەس و کارێن وی رەڤاندی ، ئەو نەچارکر کو ل گەل چەند ئێزدیەکێن دن خوە فێری کارێن خوەکوژیێ بکەت ، پشتی کو شنگال ھاتیە کونترولکرن و بارودوخێ داعش بەر ب نەمانێ ڤە چوی ئەوی شیا لژێر دەستھەلاتا داعش رزگار ببیت و خوە بگەھینیت کوبانێ.
عاسم قاسم ئیبراھیم ئەو گەنجێ 15 سالیێ پشتی کو ژ دەستێ داعش رزگاربووی بڤی رەنگی چێروکا خوە دناڤا داعش دا ڤەدگێریت.
عاسم بتنێ نەھاتیە رەڤاندن ژلایی َداعشێ بەلکو ئەو ل گەل چەند کەس و کارەکێن وی ھاتیە رەڤاندن کو ئەو ژی دوو خوشک و چەند برازا و ژن برایەک بوون ل شنگالێ ھاتبوونە رەڤاندن ، و نھا ئەو چوو ژ کەس و کارێن خوە نزانیت ، پشتی کو ل رزگاربوونا کەس و کارێن خوە بێ ئومێدبوی شیا خوە بن دەستێن داعشێ رزگار بکەت.
پشتی کو داعش ل رێکەفتی 3/8/2014 ھێرش کریە سەر قەزا شنگال و زێدەتری 400 ھزار کەس ئاوارە بووین و ھژمارەکا زور ژی کەفتینە دەست داعش ژ وانا زێدەتری پێنج ھزار کوردێن ئێزدی و دوڤدا بو موسل و رەقە ھاتینە ڤەگوھاستن.
عاسم ددەتن دیارکرن کو داعشێ چەند خولێن راھێنان و فێرکرنا بنەمایێن ئیسلامی بو زاروکێن وان ڤەکرن ، پشتی ئەڤان خولان دوڤدا خولێن سەربازی و فێرکرنا کارێن خوە کوژی ب وان ددانەکرن.
عاسم کو دناڤا داعشێ دا ب ئەبو ئوسامە شنگالی دھاتە نیاسین ئەو بخوە خەلکێ گوندێ تەل قەسەب یا سەر ب قەزا شنگالێ یە و ژ خێزانەکێ دا دژیت کو ژ پێنج برا و پێنج خوشکان پێکدھێت بەلێ ئەو ل گەل دوو خوشکێن خوە ل گەل ھندەک زاروکێن وان کەفتنە دەستێ داعش و دوڤدا بو سوریێ ھاتنە ڤەگوھاستن.
عاسم دبێژیت پشتی کو ئەم ھاتینە رەڤاندن ئەم برینە د قوتابخانەیەکا قەزا تەلەعفەر کو تایبەت بو ب زیندانیکرنا ئێزدیان ، کو ھژمارامە زێدەتری ھزار کەسان بوون و ماوەیێ دوو ھەیڤان ئەم ماینە ل وێ قوتابخانێ ، پاشان بو گوندێ قزلقیو ھاتنە ڤەگوھاشتن و دوڤدا بوو سوریێ.
عاسمی ل بارا پشکداربوونا خوە د مەشق و راھێنانێن وان دا گوت : ( ئەز نەچاربووم ژبەرکو من دڤیا ب ئەڤێ رێکێ خوشک و برایێن خوە ببینم ، ئەڤە سەرەرای کو ھەرەشەیکا کوشتنێ ژی لسەر من ھەبوون)
پشتی کو عاسمی بو دەما ھەشت ھەیڤان وانەیێن ئاینی خواندین دوڤدا بو ناڤا باژێرکێ رەقە ھاتنە بەلاڤکرن.
عاسم ل گەل 120 کەسێن دن کو 15 ژ وانان ئێزدی بوون دبیتە چەکدارێ داعش و مەشق و راھێنانێن سەربازی و چەک و خوە کوژیێ وەردگریت.
ل گورەی ئاخفتنێن وی ئەوی شیا باوەریا ئەمیرێن داعش دەستڤە بینیت و مولەتێ وەربگریت و ب رەڤیت بو ناڤا رێزێن شەرڤانان و نھا ل کانتونا کوبانێ دژیت و ئومێدا وی ئەوە کو ب دیتنا کەس و کارێن خوە شاد بیت.
