“چێنەر”ی پەیکەرەك بۆ کارەساتا ئەنفالێ دروست کریە
زاخۆ، دلۆڤان هالۆ:
هونەرمەندێ کورد یێ پەیکەرساز (چێنەر نزار) پەیکەرەك بۆ خەم و بیرهاتنا کارەساتا ئەنفالێ دروست کریە بناڤونیشانێ (ژ دایكبوونەکا بیێ حەزا خوە بۆ مرنەكا بیێ حەزا خوە ژ پێخەمەت کوردبوونێ). ئەڤ پەیکەرە هاتیە دروست کرن ب مەرەما ڤەگۆهاستنا بیرهاتنا کارەساتا ئەنفالێ ژ چارچۆڤەیەکێ مێژوویی بۆ کارەکێ هونەری، کو ناسنامە و خوەڕاگریا مرۆڤێ کورد وەکو هێما بەرچاڤ دکەت.
پەیکەرساز (چێنەر نزار) دیارکر کو من ئەڤ پەیکەرە ب قەبارەیێ ٤٥ × ٥٤ × 17 سم دروست کریە. هزرا سەرەکی یا دروستکرنا ڤی پەیکەری ژ وێ چەندێ هات، کو مرۆڤەك بێی حەزا خوە ژ دایك بوویە و بێی حەزا خوە ژی مری یە، بتنێ ژبەر هندێ کو ئەڤ مرۆڤە کوردە. ئەڤ پەیکەرە دبیتە گەنگەشەیەکا هونەری دناڤبەرا ژیان و مرنێ، ناسنامە و بەرزەکرنێ، و ترس و خوەڕاگریێ دا.
ناڤهاتی ئاماژە ب وێ چەندێ ژی کر کو ئەنفال وەکو ئێك ژ تڕاژیدیێن مەزن یێن مێژوویا هەڤچەرخ یا کوردانە. ئەڤ کارەساتە د بیرهاتنێن جڤاکا کوردی دا بتنێ وەکو ڕوودانەکا مێژوویی نەمایە، بەلکو بوویە برینەکا کوور یا جڤاکی و دەروونی. من د ڤی پڕۆژەیێ خوە یێ هونەری دا پێکول کریە کو ڤێ بیرهاتنا خەمگین ب ڕێکا دروستکرنا پەیکەرەکی بگەهینمە چاڤێن بینەری، ب مەرەما وێ چەندێ نە بتنێ مێژوو بهێته خواندن، بەلکو بهێتە دیتن و هەست پێ بهێتە کرن.
گۆت ژی:»ئەڤ پەیکەرە دەربڕینێ ژ مرۆڤەکێ کورد دکەت کو د قۆناغەکا ب ترس و نە دیار دایە، جلوبەرگێن کوردی ل بەرن و چاڤێن وی گرێداینە. گرتنا چاڤێن وی هێمایێ وان قوربانیانە یێن کو نە دزانی دێ چ ب سەرێ وان هێت و دێ بنە کیڤە. بتنێ تاوانا وان ئەوە کو ب کوردی یێن ژ دایك بووین. لەوما من ڤیایە ب ڕێکا ڤی هێمایی وێ پەیامێ بگەهینم کو ئەگەر هوون بشێن دەنگێ مرۆڤان ب ڕاوەستینن، لێ هوون نەشێن ڕاستیا مێژوویێ ڤەشێرن».
زێدەتر ژی گۆت:»من بەشێ پەیکەرسازی یا پەیمانگەها هونەرێن جوان ب دووماهیك ئینایە، من بەشداری د 60 پێشانگەهێن هەڤپشك یێن هونەری دا کرینه ل کوردستانێ. من بەشداری د ٤ پێشانگەهێن هەڤپشك دا کرینە ژ دەرڤەیی کوردستانێ. پێشتر من پەیکەرێ عومەرێ خاوەر هێمایێ کارەساتا حەلەجچە دروست کریە. هەروەسا من چەندین پەیکەرێن کەسایەتی و ناڤدارێن کورد دروست کرینە وەکو سمکۆیێ شکاك، شەریف پاشایێ خەندان، نالی، پیرەمێرد، حاجی قادرێ کۆیی، زێوەر، شێرکۆ بێکەس، و چەندین پەیکەرێن دی».
