چەند بڕیارێن گرنگ بۆ پاراستنا بەرھەمێ خومالی دھێنە دەرئێخستن
ئەڤرۆ نيوز:
وەزارەتا چاندن و ژێدەرێن ئاڤێ ل حوکمەتا ھەرێما کوردستانێ چەندین بڕیارێن گرنگ بۆ پاراستنا بەرھەمێ خۆمالی و مفا گەھاندنا جۆتیارێن ھەرێما کوردستانێ دەرکرن.
وەزارەتا چاندن و ژێدەرێن ئاڤێ ل حوکمەتا ھەرێما کوردستانێ و پارێزگارێ ھەولێرێ دوھی ١١-٨-٢٠١٥ کۆمبوون و بەحسی پاراستنا بەرھەمێ خومالی و پشتەڤانیا جۆتیاران کر، بۆ ڤێ مەرەمێ ژی وەزارەتا چاندنێ بڕیار دا گومرک ل سەر وان ترۆمبێلێن بارھەلگر ئەوێن ل خالێن سنووری یێن ھەرێما کوردستانێ دھێنە د ناڤ ھەرێمێ دا بھێتە دانان، دیسا ھەر ترۆمبێلەکا بارھەلگر گۆمرکێ نەدەت ئەو بارێ د ناڤ دا دێ ھێتە دەستەسەرکرن و ئەو نڤێسینگەھا ئەو بەرھەم بۆ دچیت ژی بۆ دەمەکی دێ دائێخن.
وەزارەتا ناڤبری ئاماژە دایە وێ چەندێ کو ب مەرەما پاراستنا بەرھەمێن خۆمالی بڕیارە لژنەک بۆ دانانا باجێ ل سەر وان بەرھەمێن ژ دەرڤە دھێنە د ناڤ ھەرێما کوردستانێ دا بھێتە پێکئینان.
د کۆمبوونێ دا دوپاتی ل دائێخستنا ھەموو وان رێیێن قەچاغ ھاتە کرن ئەوێن ب رێیا وان بەرھەمێن بیانی ژ دەرڤە تێدا دھێنە د ناڤ ھەرێما کوردستانێ دا.
