چەپێن شەڕانشێ دێ ھێنە سەخبێرکرن
ئەڤرۆنیوز، عەلی حاجی:
رێڤەبەرێ گەشت و گۆزارێ ل قەزا زاخۆ بۆ ئەڤرۆ نیوز دیار کر، نوکە ئەو چاڤەڕێی ھاتنا پارێ گەشەپێدانا ھەرێمانە، داکو بشێن ب مەرەما پشتەڤانیکرن ل کەرتێ گەشتیاری ل زاخۆ رێیا ھژمارەکا جھێن گەشتیاری ل دروست بکەن.
چیا ئەمین، رێڤەبەرێ گەشت و گۆزارێ ل زاخۆ خویا کر، ئەو د نوکە دا چاڤەڕێی ھاتنا پارێ گەشەپێدانا ھەرێمانە کو بڕیارە ژ لایێ حوکمەتا عیراقێ ڤە بھێتە ھنارتن، داکو رێیا ھژمارەکا پرۆژێن گەشتیاری ئەوێن تێکچووین سەخبێر بکەن و گۆت: “ھژمارەکا پرۆژان ب وێ بودجێ ئامادە کرینە، د پرۆژێ مە دایە ب کوژمێ ١٢٥ ملیۆن دیناران سیلاڤا گوندێ ێوریا ب شێوەکێ مودرن سەخبێریکرن، دیسا ژی دانانا چەندین جھێن خزمەتگۆزاری ل کەلھا شابانیێ و دەڤەرێن باتیفا و ل سەر رێیا تاوکێ، ژ بەرکو ل وان دەڤەران جھێن خزمەتگوزاری نەبوون و د وەرزێ بھاران دا خەلکەکێ زۆر قەستا وان دەڤەران دکەت، ھەردیسا د نوکە دا مە ھندەک ڤەدیتن ژی کرینە بۆ وان رێکێن گەشت و گۆزاری د کەڤنە دەوروبەرێ زاخۆ ب مەرەما سەخبێریکرن و دروستکرنا جاددێن سەرەکی”.
ناڤھاتی گۆتژی: “ب رێیا رێڤەبەریا سەخبَریکرنا رێک و پران ل پارێزگەھا دھۆکێ جاددا ژ گوندێ دێمکا ھەتا دگەھیتە گوندێ شیلانێ بھێتە سەخبێریکرن، ژ بەرکو چەندین جھێن گەشت و گۆزاری ل سەر وێ رێیێ ھەنە”.
چیایی خویا ژی کر کو بڕیارە پشتی گەھشتنا پارێ گەشەپێدانا ھەرێمان چەپێن شەڕانشێ ھەتا دگەھیتە دەشتە تەخێ بھێتە سەخبێریکرن، ژ بەرکو ئەو رێیە ببوو ئاریشەکا مەزن ل بەرامبەر ھاتنا گەشتیاران بۆ وان دەڤەران، زێدەباری وێ چەندێ ژی مە ڤەدیتن کریە رێیا ژ سەر جاددا گشتی ھەتا دگەھیتە شکەڤتا بھێرێ کو ٥٠٠ مەترن ب شێوەکێ مودرن ژ لایێ رێڤەبەریا رێک و پران بھێتە دروستکرن، ھەردیسا رێیا دچیتە سیلاڤا شەڕانشێ کو ھزار مەترن ب وی پارەیێ گەشەپێدانێ بھێتە دروستکرن.
