چەکێ پارێ گەنمێ جۆتیاران یێ سالا 2018 گەھشتە دھۆکێ
ئه‌ڤرۆ نيوز:
رێڤەبەرێ بازرگانیا دەخلودانی تایێ دھۆکێ دیار کر کو چەکێ پارێ گەنمێ جۆتیارێن پارێزگەھا دھۆکێ یێ سالا 2018ێ ب رێژا 100% گەھشتە دھۆکێ و ھەموو جۆتیار دێ پارێ خوە ھەموویێ وەرگرن.
نازم محەمەد، رێڤەبەرێ بازرگانیا دەخلودانی تایێ دھۆکێ بۆ ئەڤرۆ دیار کر کو ئەڤرۆ 2/9/2018 دێ چەکێ پارێ گەنمێ جۆتیارێن پارێزگەھا دھۆکێ بۆ بەنکا داسنیا ھێتە رەوانەکرن، ل دووڤ دا ژی دێ بۆ بەنکا مەرکەزی یا عیراقێ تایێ ھەولێر ھێتە رەوانەکرن و گۆت: “ئەو دێ پارەی دابین کەن، دەمێ دگەھتە بەنکێن دھۆکێ دێ ل سەر ھەموو جۆتیاران ھێتە بەلاڤکرن، نوکە ب تنێ چەکێ پارێ جۆتیاران یێ گەھشتی، ئەڤ سالە ھەر جۆتیارەکێ گەنمێ خوە دابیتە سایلۆیان دێ پارێ خوە ھەموویێ وەرگریت”.
ئاشکرا ژی کر، چەکێ شایستێن جۆتیاران ب کۆژمێ 43 ملیار و 192 ملیۆن و 500 ھزار دیناران گەھشتە رێڤەبەریا بازرگانیا دەخلودانی تایێ دھۆکێ و گۆت: “ئەم دێ چەکی دەینە بەنکا بۆ دابینکرنا ڤی کۆژمێ پارەی و ھەموو جۆتیارێن پارێزگەھا دھۆکێ 100% دێ پارێ خوە وەرگرن، ئانکو چو پارێ وان یێ گەنمێ سالا 2018ێ نامینیت و دێ ھەموو پارێ خوە وەرگرن”.
ناڤھاتی ئاماژە دا وێ چەندی ژی کو 874 ملیۆن دینار بۆ وەزارەتا چاندنێ یێ ھاتیە تەرخانکرن، ئەڤە ئەو پارەیە یێ ب رێژا 2% ژ جۆتیاران ھاتیە بڕین و گۆت: “ئەڤە جارا ئێکێ یە ئەڤ پارە بۆ وەزارەتا چاندنێ دھێتە رەوانەکرن، پشتی دابینکرنا پارەی، نڤیسیارەکا فەرمی ب چەکەکی بۆ وەزارەتا چاندنێ ل ھەرێما کوردستانێ دێ ھێتە رەوانەکرن، ئەڤ پارێ جۆتیاران بەھرا پتر بۆ کڕینا گەنمێ باوەر پێ کری یە”.
زێدەتر گۆت: “وەکو دیار ئەڤ سالە ل سایلۆیێن دھۆکێ ب تنێ 81 ھزار و 495 تەنێن گەنمی ل ھەر سێ سایلۆیێن دھۆکێ ھاتینە وەرگرتن.
نازم محەمەد خویا ژی کر کو پارێ گەنمێ جۆتیاران یێ سالێن 2014 و 2015 و 2016 ھێشتا ھەموو ژ لایێ بەغداڤە نەھاتیە مەزاختن، بەری چەند ھەیڤان چەک ھاتبوونە رێکخستن بۆ دانا شایستێن جۆتیاران بۆ ڤان سالان، ئانکو جۆتیارێن پارێزگەھا دھۆکێ بۆ سالا 2014ێ 18 ملیار دینار مابوون، ب تنێ شەش ملیار دینار د چەکەکی دا ھاتینە دان و ھیشتا 12 ملیار دینار یێن ماین، بۆ سالا 2015ێ ژی 71ملیار دینار مابوون، ب تنێ چەکەک ب کۆژمێ 26 ملیار دیناران ھاتبوو و ھێشتا 45 ملیار دینار یێن ماین و بۆ سالا 2016ێ 88 ملیار دینار بوون، چەکەک ب کۆژمێ 53 ملیار دیناران ھاتبوو رێکخستن و ھێشتا 35 ملیار دینارێن ماین و گۆت: “ئەم ژ لایێ وەزارەتا بازرگانیی و پشتەسازیا حکومەتا ھەرێما کوردستانێ ڤە یێن ھاتینە ئاگەھدارکرن کو ئەڤ چەکێن پارەی یێن نەھێنە وەرگرتن و ھەتا نوکە ل بەغدا نە، سکالا ل سەر وەزارەتا بازرگانیا عیراقێ ل دادگەھا فیدرالی یا عیراقی ھاتە تۆمارکرن بۆ مەزاختنا ھەموو شایستێن جۆتیاران بێ کێماسی کو ھەموو ب دروستاھی بھێنەدان”.
