ڕیڤینك هروری: په‌كه‌كه هێزێن توركی ڕادكێشیته دناڤ هه‌رێما كوردستانێ دا
ئه‌ڤرۆ:
سه‌رۆكێ لژنه‌یا كاروبارێن پێشمه‌رگه‌ی ل په‌رله‌مانێ كوردستانێ ڕادگه‌هینیت، په‌كه‌كه ڕێزێ ل قه‌وارێ هه‌رێما كوردستانێ ناگریت، ده‌ستێ خوه ژی دانایه سه‌ر چه‌ند ده‌ڤه‌رێن هه‌رێما كوردستانێ.
ڕیڤینك هروری، سه‌رۆكێ لژنه‌یا كاروبارێن پێشمه‌رگه‌ی ل په‌رله‌مانێ كوردستانێ گوت” په‌كه‌كه ب ئه‌نقه‌ست وه‌دكه‌ت تاكو هێزێن زێده‌تر یێن توركیا بهێنه د ناڤ هه‌رێما كوردستانێ دا، ئه‌گه‌ر نه په‌كه‌كێ دشیا باره‌گه‌هێن سیاسی ل ڤێره هه‌بن و بزاڤا دیتنا ڕێچاره‌یه‌كا ئاشتی بێی چه‌ك دا كه‌ت، هه‌روه‌سا په‌كه‌كێ گه‌له‌ك ده‌ستێوه‌ردانێ دكه‌ت و ده‌ست ب سه‌ر ده‌ڤه‌ره‌كا مه‌زن یا سنوورێن هه‌رێما كوردستانێ دا گرتیه”.
ڕیڤینكی گوت ژی” سه‌رۆك بارزانی و نێچیرڤان بارزانی ل سالێن 2010 و 2013 گه‌له‌ك بزاڤ كرن تاكو پرۆسه‌یا ئاشتیێ دناڤبه‌را په‌كه‌كێ و توركیا به‌رقه‌رار بیت، توركیا و په‌كه‌كه لسه‌ر وێ چه‌ندێ پێكهاتن كو هێزا چه‌كدار یا په‌كه‌كێ ل باكوور نه‌مینیت و بهێته باشووری و ئه‌ڤێ ژی ڕامانه‌ك یا هه‌ی، بوو هێجه‌ت، كو چه‌ند ساله‌كه توركیا توپبارانكرنا باشوورێ كوردستانێ دكه‌ت، بێگومان توركیا ژی مه‌ره‌مێن دی یێن ل پشت، به‌لێ هه‌بوونا باره‌گه‌هێن په‌كه‌كێ ئێك هۆكاره د ده‌ستێ وێ دا”.
خویاكر” یا گرنگه سنووره‌ك بۆ په‌كه‌كێ و هێرشێن توركیا بۆ سه‌ر ئاخا هه‌رێما كوردستانێ بهێته دانان، ب تایبه‌ت ژ ئالیێ به‌غدا ڤه كو بێده‌نگی بهێته شكاندن و جڤاكێ نێڤده‌وله‌تی لسه‌ر بهێته ده‌نگ”.
