ڕێژتنا خوینا گه‌نجێن مە ل که‌رکووکێ باجه‌کا گران دێ هه‌بیت

سه‌رۆک مه‌سعود بارزانى پەیامەک ل دۆر ره‌وشا که‌رکووکێ بەلاڤکر و تێدا ھاتیە: ده‌مێ چه‌ند رۆژایه‌ ھەژماره‌کا رێگر و ئاژاوه‌گێران ب بهانه‌یا رێگریێ ل ڤه‌کرنا باره‌گایێن پارتى ل باژێرێ که‌رکووکێ رێیا هه‌ولێر – که‌رکووکێ گرتینه‌ و رێ ناده‌ن وه‌لاتى ژیان و هاتنوچوونا ئاسایى یا خۆ بکه‌ن و ره‌وشه‌کا نه‌گونجاى و گه‌له‌ک مه‌ترسیدار بۆ خه‌لکێ که‌رکووکێ دروستکرینه‌«.
د پشکەکا دی یا پەمێ دا هاتیه‌ «ئه‌م هه‌رده‌م دوپات دکه‌ین کو که‌رکووک پێدڤیه‌ ببیته‌ نموونه‌یا پێکڤه‌ژیانێ و برایه‌تیێ د ناڤبه‌را هه‌مى پێکهاته‌یێن باژێڕێ دا، لێ ئه‌ڤ ره‌فتارا نه‌ د جهێ خۆ دا و نه‌یاسایى بزاڤه‌که‌ بۆ په‌یداکرنا فتنه‌یێ و تێکدانا پێکڤه‌ژیانێ».
سه‌رۆک بارزانى د یا پەیاما خۆ دا دیارکریه‌ «جهێ مەندەھۆشیێ یه‌ د چه‌ند رۆژێن بۆرى دا هێزێن ئه‌منى و پۆلیسێن که‌رکووکێ ب چ شێوه‌یان رێگرى ل ئاژاوه‌گێریێ و ره‌فتارێن نه‌یاسایى نه‌کربوون، دوھی ژى توندوتیژى ل به‌رانبه‌ر گه‌نجێن خۆنیشانده‌رێن کورد هاته‌ بکارئینان و خوینا گه‌نجێن کورد هاته‌ رشتن، ئه‌ڤ ره‌فتاره‌ ب چو شێوه‌یان قابلى قەبوولکرنێ نینه‌ و ئه‌نجامێن گه‌له‌ک خراب دێ په‌یدا که‌ت و ڕێژتنا خوینا گه‌نجێن مە ل که‌رکووکێ باجه‌کا گڕان دێ هه‌بیت».
سه‌رۆک بارزانى داخواز ژ سه‌رۆکوه‌زیرێ ئیراقێ کر کو سنووره‌کی بۆ وان رێگر و ئاژاوه‌گێران بدانیت و دووماهیێ ب ڤێ سته‌مێ و جوداکاریێ و رێگریێ بینیت کو ئێکسه‌ر پێکڤه‌ژیان و سه‌قامگیریا که‌رکووکێ و ده‌ڤه‌رێن دى دکه‌نه‌ ئارمانج.

کۆمێنتا تە