ژبه‌ر گرۆپێن چه‌كدار شنگال ژ ئاڤه‌دانی هاتیه بێ به‌هركرن
دهۆك، له‌زگین جوقی
نوونه‌را ئێزدیان ل په‌رله‌مانی كوردستانێ دیار كر:” رێڤه‌برنا ژیانێ دناڤ شنگال دا یا زه‌حمه‌ته، چونكو شنگال بۆ ژیانێ یا گونجایی نینه و چو ته‌ناهی نینه، شنگال ژبه‌ر گرۆپێن چه‌كدار ژ ئاڤه‌دانی هاتیه بێ به‌هركرن”.
هه‌دیه موراد حه‌یده‌ر، نوونه‌را ئێزدیان ل په‌رله‌مانی كوردستانێ راگه‌هاند: “ره‌وشا شنگال ژ هه‌موو ده‌ڤه‌رێن داگیركری یێن كوردستانێ خراپتره، چونكو گه‌له‌ك هێزێن چه‌كدار دناڤ شنگال دا هه‌نه و چو ته‌ناهی ل شنگال نینه، هه‌تا لایه‌نێن چه‌كدار یێن ناڤ شنگالێ دا رێگریێ دابینكرنا ئارامی بۆ شنگال دكه‌ن ئه‌و گرۆپێن ناڤ شنگال دا بووینه ئه‌گه‌ر خزمه‌تگوزاری ل شنگال نه‌هێنه ئه‌نجامدان هه‌تا رێگریێ ل زڤرینا خه‌لكێ شنگال دكه‌ن نۆكه گرۆپێن چه‌كدار بووینه به‌لا و گه‌ڤ ل سه‌ر ژیانا خه‌لكێ شنگال”.
هه‌دیه موراد، ئاشكه‌را كر: چو خزمه‌تگوزاری ل شنگال نینن، ئه‌و خێزانێن چووینه شنگال ژی هه‌ولده‌ن بزڤرن، چونكو ته‌ناهی و خزمه‌تگوزارێ نینن، له‌ورا ئاواره ژیانا كه‌مپان پێ خۆشتره بن ده‌ستهه‌لاتا گرۆپێن چه‌كدار و نه‌شه‌رعی دا”.
گۆت ژی: هه‌ر ده‌مێ ئیدارا شه‌رعیی بزڤرته شنگال و ته‌ناهی ل شنگال بهێته دابینكرن هه‌موو خالێن رێكه‌فتنا ناڤبه‌را حكومه‌تا هه‌رێما كوردستانێ و عێراقی دا بجه هاتن ل وێ ده‌می ئاواره دێ شێن زڤرنه سه‌ر جهێن خۆ”.
ئه‌سكه‌نده‌ر محه‌مه‌د ئه‌مین، رێڤه‌به‌رێ كوچ و كوچبه‌رێن عێراقی ل پارێزگه‌ها دهۆكێ بۆ راگه‌هاند: “ئاوارین شنگال هه‌تا ئه‌ڤرۆ پتریا وان ناڤ كه‌مپێن ئاواران دا ماینه نه‌شیاینه بزڤرنه سه‌ر جهێن خۆ ژبه‌ر خرابیا ره‌وشا شنگال و نه‌بوونا ته‌ناهی و ئاڤه‌دانی راستی ژی نۆكه یا وه‌سا لیهاتی ئێدی ئاوارێن شنگال حه‌ز ناكه‌ن بزڤرنه شنگال ژبه‌ر هه‌بوونا گرۆپێن چه‌كدار و نه‌بوونا ئاڤه‌دانی”.
