ژبه‌ر گه‌نده‌ليێ پارێزگاره‌ك دهێته لادان
ئه‌ڤرۆ نیوز:
جڤاتا پارێزگه‌ها زیقار ل باشوورێ عیراقێ ئه‌ڤرۆ چارشه‌مبى 26/6/2019 ب پتریا ده‌نگان پارێزگارێ زیقار ژ كارێ وى دوورخست.
ئه‌مین هیلالى، رۆژنامه‌ڤان ژ باژێرێ دیوانیه ( سه‌نته‌رێ پارێزگه‌ها زیقار) بۆ ئه‌ڤرۆ نیوز گۆت” ئه‌ڤرۆ 22 ئه‌ندامێن جڤاتا پارێزگه‌ها زیقار ژ سه‌رجه‌مێ 23 ئه‌ندامان ده‌نگ ل سه‌ر كار دوورخستنا (یه‌حیا ئه‌لناسرى) پارێزگارێ زیقار دا و ب ڤێ چه‌ندێ ب شێوه‌كێ فه‌رمى هاته لادان ژ پۆستێ وى”.
گۆت ژى ” چار كه‌سان خوه به‌ربژار كریه بۆ وه‌رگرتنا پۆستێ پارێزگارێ زیقار كو دو ژ وان سه‌ر ب لیستا ده‌وله‌تا قانوونێ نه و ئێك سه‌ر ب لیستا سائیروون و یێ چارێ ژى كه‌سه‌كێ سه‌ربخوه‌یه”.
ژ لایێ خوه‌ڤه عه‌بدولهادى سه‌عداوى، ئه‌ندامێ په‌رله‌مانێ عیراقێ ژ لیستا ده‌وله‌تا قانوونێ د به‌یاننامه‌كێ دا راگه‌هاند” پیرۆزباهیا خه‌لكێ پارێزگه‌ها زیقار وجڤاتا پارێزگه‌ها زیقار دكه‌م ب لادانا سه‌رێ گه‌نده‌لیێ وگه‌نده‌لكاران ل پارێزگه‌هێ كو ئه‌گه‌رێ سه‌ره‌كى بوو یێ بێ به‌هركرنا خه‌لكێ پارێزگه‌ها زیقار ژ بودجه‌یێن بۆ پارێزگه‌هێ دهاتن ته‌رخانكرن ژ لایێ حوكمه‌تا ناڤه‌ندى ل به‌غدا”.
گۆت ژى” ژ به‌رگه‌نده‌لیێن پارێزگارێ ژكار لاداى، بۆ ده‌مه‌كێ درێژ بوو خزمه‌تگوزارى بۆ پارێزگه‌ها زیقار نه‌هاتبوونه پێشكێشكرن”.