ژنه‌بوونا شیانێن ئاڤاكرنا خانیان وه‌لاتى لبادى بكاردئینن
ئه‌ڤرۆ نیۆز، نه‌وزاد هلۆرى:
پشتى وه‌لاتى بێ ئومێدبووى ژ خرابكرنا خانیێن خوه و سه‌رژنوو ئاڤاكرنێ و قه‌یرانا دارایى ب سه‌ردا هاتى ، گه‌له‌ك ژ وه‌لاتیان نه‌چاربوون خانیێن خوه ب لبادى بپارێزن ، ئه‌ڤه سه‌ره‌راى كو هنده‌ك ژ وه‌لاتیان لبادى بۆ گه‌رمێ و سه‌رمايێ و شه‌هێ ژى بكاردئینن.
نه‌سروللا ئه‌حمه‌د وه‌لاتيه‌كێ شێلادزێ یه دیاركر كو ئه‌ڤه چه‌ند ساله ئه‌و ل هيڤیێ خانیێ خوه خراب بكه‌ت و سه‌ر نوو درۆست بكه‌ت ڤه، به‌لێ قه‌یرانا دارایى و نه‌بوونا پاره‌ى بوویه ئه‌گه‌ر كو ئه‌و نه‌كاریت خانیێ خوه خراب بكه‌ت و بۆ ئه‌ڤرۆنيۆز گۆت، هه‌ر چه‌ند خانیێن ئاخێ مه‌ترسیێ ل سه‌ر ژیانا مرۆڤى درۆست دكه‌ن ، به‌لێ هه‌كه مرۆڤ نه‌چاربوو ، ب هه‌ر شێوه‌یێ بیت دڤێت خێزان و زارۆكێن خوه بپارێزیت ، نها ئه‌م لبادى بۆ پاراستنا خانیێ ئاخێ بكاردئینین دا به‌رگریا هه‌ر چ نه‌بیت چه‌ند ساله‌كان بكه‌ت هه‌تاكو مه شیان هه‌بن جاره‌كا دى دووباره خراب دكه‌ین و ئاڤا دكه‌ینه ڤه.
زێده‌تر گۆت، لباد باشتره ژ وێ یه‌كێ كو مرۆڤ هه‌موو سالان نایلونه‌كى بۆ خانیێ ئاخێ بكریت و پاره‌كێ زور پێ بده‌ت و سالا ددوڤ دا ئێكى دى بكریت ، به‌لێ هه‌كه لباد بیت هه‌تا زێده‌ترى 10 سالان ژى ئه‌م چو نایلونان ناكرین و تنێ دێ ئێكجار ژى هێته‌كرین و بڤێ یه‌كێ خانى دێ پاراستى تر بیت و پاره ژى دێ بۆ مرۆڤى زڤریت ڤه.
موجاهد عیسام خودانێ نڤیسینگه‌هه‌كا یا لبادى ل دهۆك و زاخۆ بۆ ئه‌ڤرۆ نيۆز گۆت،هه‌ر چه‌ند لباد رێیه‌كا كه‌ڤنه و چه‌ند ساله ل هه‌رێما كوردستانێ بۆ پاراستنا خانیان ژ سه‌رمايێ و گه‌رمێ و شه‌هێ و هه‌تا خوه بۆ جوانیێ ژى دهێته بكارئینان ، به‌لێ د نهادا ب تایبه‌تى پشتى كو قه‌یرانا دارایى درۆست بوى، خه‌لكه‌كێ زور قه‌ستا كرینا لبادى كریه و بۆ ئێكه‌مین جار ژى خه‌لكه‌كێ زور ئه‌وێن كو خانیێن وان سه‌ر ئاخن به‌رێ خوه دایه كرینا لبادى ، ئه‌ڤه سه‌ره‌راى كو لباد بۆ خانیێن سه‌ر ئاخ نه‌هاتیه چێكرن ، به‌لێ ل گه‌ل بكارئینانا لبادى بۆ خانیێن ئاخێ ژى دهێته بكارئینان و رێیه‌كا تایبه‌ت بۆ دانانا وان هه‌یه.
زێده‌تر گۆت، لباد پێكهاتیه‌كێ قێر و گاز و سفیف و چه‌ند ماده‌یه‌كێن دى یه و پتريا وان ل ئیرانێ و توركیا دهێنه هه‌رێما كوردستانێ و نها ب ره‌نگه‌كێ زۆر به‌ربه‌لاڤ ل سه‌نته‌رێ باژێرێ دهۆكێ و زاخۆ دهێته بكارئینان و نها خه‌لكێ گوندان ژى بكاردئینن و میترا لبادى دناڤبه‌را 5،5 بۆ 10 دولارن دهێته فروتن و دانان و خه‌لك بۆ دیوار و سه‌ربان و ترومبێل و تانكان ژى بكاردئينن.
ناڤبرى دیاركر ژى كو لبادى شیانێن 15 بۆ 40 سالان به‌رگرى ژ سه‌رمايێ و گه‌رمێ هه‌یه و گۆت ژى، دانانا لبادى پێدڤى ب شاره‌زایێ هه‌یه و ل ڤێره ب گه‌رنتیا 15 سالان لباد دهێته دانان ، به‌لێ بۆ كه‌سوكارێن شه‌هیدان گره‌نتى پتره و بهايه‌كێ كێمتر ژێ دهێته وه‌رگرتن.
