ژنه‌ك و كچه‌ك هاتنه كوشتن
ئەڤرۆ، حکمەت زێوکی:
بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ دیار کر کو دوھی 16\11\2014 د دو روودانێن جودا دا ژنەکا 23 سالی و کچەکا 18 سالی جانێ خوە ژ دەست دان.
نەقیبێ مافپەروەر ھێمن سلێمان بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ د داخۆیانیەکێ دا بۆ ئەڤرۆ دیار کر کو دوھی دەمژمێر 6:00 سپێدی ل سەر کوشتنا ژنەکێ ل نێزیکی ھۆلا شێخ قوتبەدین یا بەھیا ل سێمێلێ ھاتنە ھیدارکرن و گۆت “دەمێ پۆلیسێن مە گەھشتینە وێرێ و ل دووڤ پشکنینێن دەستپێکی وەسا دیارە کو حالەتێ خوەکوشتنێ یە تەرم بۆ دادوەریا پزیشکی ھاتە ڤەگوھاستن”.
نەقیبێ مافپەروەر ھێمن ئاشکرا ژی کر کو ناڤێ وێ ژنێ (ح ج م) و ژ دایکبوویا سالا 1991ێ یە و سێ زارۆ ھەنە، کو دو کچن و ئێک کوڕە و گۆت “مە ڤەکۆلین ل دۆر روودانێ دەست پێ کریە و چەند ئەندامێن مالباتا وێ ژنێ مە گازیکرینە ژبۆ ڤەکۆلینێ”.
بەرپرسێ پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ ئاماژە ب روودانا دویێ یا کوشتنێ کر کو ھەر دوھی کچا شڤانەکێ عەرەب ل ئاقارەکێ باگێرا مینەکا کەڤن دبینیت و پشتی دەستکاریێ تێدا دکەت ئەو مین پێڤە دپەقیت و د ئەنجام دا جانێ خوە ژ دەست ددەت و گۆت “تەمەنێ وێ کچێ 18 سال بوون ئەو مین ھێشتا ژ پاشمایێن رژێما بەعس بوو”.
ل دووماھیێ نەقیبێ مافپەروەر ھێمن گۆت “ھیڤیدارین ژ ھەمی وەلاتیێن خوە کو ھەر تشتەکی یان مادەکێ غەریب ببینن دەستکاریێ تێدا نەکەن و زوو نێزیکترین بنگەھێ پۆلیسان ھایدار بکەن یان ژی ب ژمارێن 104 و 140 پەیوەندیێ بکەن”.
