ژنه‌ك 40 ساله كارێن ده‌ستى درۆست دكه‌ت و ب دیارى دده‌ته خه‌لكى
ئه‌ڤرۆ نیوز ، نه‌وزاد هلۆرى:
ژنه‌كا مه‌سيحى ل ده‌ڤه‌را به‌روارى بالا زێده‌ترى 40 ساله كارێن ده‌ستى درۆست دكه‌ت، وه‌كو ئه‌و دياردكه‌ت هه‌موو كارێن خوه دده‌ت زارۆك و ژنان ب دیارى و دخوازیت كو لایه‌نێن شوله‌ژێ هاریكاریا وێ بكه‌ن داكو ئه‌و بشێت كچ و ژنێن ده‌ڤه‌رێ فێرى كارێن ده‌ستى بكه‌ت.
ڤیان خوشابا، ئه‌و ژنا مه‌سيحى يه كو ل گوندێ تیشه‌مبیكێ یا سه‌ر ب ده‌ڤه‌را به‌روارى بالا دژیت بۆ ئه‌ڤرۆ نیوز گۆت: (ئه‌ز ژدايكبوويا سالا 1968 مه و دژیێ هه‌شت سالیێ دا من ل گه‌ل دایكا خوه ده‌ست ب كارێن ده‌ستى كریه و هه‌تا نها بێ ڤه‌برین ئه‌ز به‌رده‌وامم و هه‌تا نها هژماره‌كا ئێكجار زۆر یا كارێن ده‌ستى من دروستكرینه).
زێده‌تر گۆت: (چێكرنا كارێن ده‌ستى ژلایێ من ب چو شێوه‌یان بۆ فروتنێ نینه، به‌لكو ئه‌ز ب دیارى دده‌م زارۆك و كچان داكو ئه‌ڤ یه‌ك بۆ وان ببیته پالده‌ر ئه‌و ژى بشێن كارێن ده‌ستى بكه‌ن و كه‌یفا وان بهێت).
ناڤبرى كو فه‌رمانبه‌ره و حه‌زه‌كا زێده بۆ كارێن ده‌ستى هه‌یه هه‌تا نها زێده‌ترى 200 جۆرێن كارێن ده‌ستى درۆستكریه و گۆت ژى: (هه‌تا نها لایه‌نێن شوله‌ژێ چو هاریكارى بۆ من نه‌كرینه و هیڤیا من ئه‌وه كو لایه‌نێن شوله‌ژێ هاریكاریا من بكه‌ن ئه‌ز بشێم خۆل و راهێنانێن پێشه‌يى بۆ كچ و ژنێن ده‌ڤه‌رێ ڤه‌كه‌م، ژبه‌ركو كچ و ژنێن ده‌ڤه‌رێ زۆر حه‌ز هه‌یه فێر ببن و كرینا هه‌ر تشته‌كێ بۆ كارێن ده‌ستى ژلایێ منه و هنده‌ك جاران ژى كه‌سو كارێن من ل ده‌رڤه بۆ من دهنێرن”.
ژ جوانترین كارێن ڤیانێ ئه‌نجامداین، چێكرنا به‌رگێن قورئانا پیرۆزه بۆ موسلمانان ، دیسان چێكرنا مێزه‌كا خوارنێ یه ب خوارن و چه‌ره‌زاتێن كوردى وه‌كو ، باهیف، گویز، گولێر، به‌رى و مازى كو ب شێوازه‌كێ جوان و سه‌رنجراكێش هاتیه چێكرن، دڤى واری دا گۆت: (من مێز ب دارى چێكریه و پاشى باهیف، گویز، گولێر، به‌رى و مازى ل گه‌ل ده‌مژمێره‌كا دیوارى داناینه سه‌ر مێزێ و ب شووشه‌ى گرتیه و دیتنا وان ب چاڤ جوانیه‌كا تایبه‌ت دایه لێنانگه‌هێ و مرۆڤ هه‌ر حه‌ز دكه‌ت ل سه‌ر خوارنێ بخوت و چێكرنا وان ژى هه‌موو ب باهیف، گویز، گولێر، به‌رى و مازیێن ته‌حله ژ به‌ركو هه‌كه دشیرین بن دێ كرمى بن و گه‌له‌ك خوه ناگرن ، به‌لێ هه‌كه د ته‌حل بن، دێ چه‌ندین سالان خوه گرن و هه‌ر كه‌سێ داخوازێ ژمن بكه‌ت دشێم بوو دووباره بكه‌م ڤه).
