ژوورەکا ھەڤپشک د ناڤبەرا ھێزێن عیراقی و پێشمەرگەی دا ھاتە پێکئینان
ئەڤرۆ نیوز، فاتما مزووری:
ژێدەرەکێ ئاگەھدار ئاشکەرا کر کو پشتی چەندین کۆمبوونان د ناڤبەرا فەرماندێن پێشمەرگەی و فەرماندارێن ھێزێن ئەمنی یێن عیراقی دا، بڕیار ھاتە دان ژوورەکا ئۆپەراسیۆنان یا ھەڤپشک بھێتە پێکئینان.
وی ژێدەری بۆ مالپەرێ “القدس پرێس” یێ عیراقی راگەھاند کو دوھی کۆمبوونەک د ناڤبەرا بەرپرسێن وەزارەتا پێشمەرگەی و وەزارەتا بەرەڤانیا عیراقێ دا ل داقوق باشوورێ کەرکووک ب رێڤە چوو و د کۆمبوونێ دا بڕیار ھاتە دان کو ژوورەکا ئۆپەراسیۆنێن ھەڤپشک ل دەڤەرا لەیلان پێک بینن.
وی ژێدەری ئاشکەرا ژی کر کو کۆمبوون د چارچۆڤێ ھەماھەنگیا د ناڤبەرا ھەردو لایان ژ بۆ روو ب رووبوونا داعش دا ھات.
بەری دەمەکی قائیمقامێ خورماتو شەلال عەبدولا بۆ ھەمان مالپەر راگەھاند بوو کو چەندین فەرمان ژ وەزارەتا پێشمەگەری ھاتبا دەرکرن، ب گۆرەی وان فەرمانان ژی، پێشمەرگەی ژ سێ لایان ڤە پشکداریا ئۆپەراسیۆنا دوھی ل خورماتۆ و کفری دەسپێکری، کربوو.
پشتی روودانێن 16ی ئوکتۆبەرێ ھێرشا حەشدا شەعبی بۆ سەر دەڤەرێن کوردستانی یێن دەرڤەی ئیدارا ھەرێما کوردستانێ و ڤەکێشانا پێشمەگەی ژ وان دەڤەران رۆژ بۆ رۆژێ رەوشا وان دەڤەران خرابتر لێ دھێت، د ڤێ دووماھیێ دا چەکدارێن داعش ھێرشێ ب رەنگەکێ بەردەوام دکەنە سەر وان دەڤەرا و کریارێن کوشتن و رەڤاندنێ ژی د بەردەوامن.
