ژڤانێ به‌لاڤكرنا رێنمايێن ڤه‌گوهاستنا مامۆستايان هاته دياركرن
ئه‌ڤرۆ نيوز:
پەیڤدارێ وەزارەتا پەروەردا حوکمەتا ھەرێما کوردستانێ دیار کر کو ڤەگوھاستنا مامۆستایان دێ ل ھەیڤا تەباخا ئەڤ سالە دەستپێکەت و گۆت: “مە داخواز ژ سەرۆکاتیا جڤاتا وەزیران کریە حەفت ھزار مامۆستا بھێنە دامەزراندن ب تایبەتی ئەوێن بسپۆری ھەین”.
سامان سیوەیلی، پەیڤدارێ وەزارەتا پەروەردا حوکمەتا ھەرێما کوردستانێ بۆ رۆژناما ئەڤرۆ ئاشکرا کر کو وەزارەتا پەروەردێ ڤالاھی د مامۆستایێن بسپۆر دا ھەیە ژ بەر ڤێ چەندێ وەزارەتا ناڤھاتی پێدڤی ب دامەزراندنا ھژمارەکا مەزن یا مامۆستایێن وانەیێن بسپۆر ھەیە و گۆت: “وەزارەتا پەروەردێ بۆ ڤێ مەرەمێ داخوازا دامەزراندنا حەفت ھزار مامۆستایێن بسپۆر ژ سەرۆکاتیا جڤاتا وەزیران کریە، بەلێ ھەتا نوکە بەرسڤا ڤێ داخوازێ ژ لایێ جڤاتا ناڤھاتی ڤە نەھاتیە دان، بەلێ ئەم وەکو وەزارەت پێشبینیێ دکەین ل ھەیڤا تەباخا ئەڤ سالە حوکمەت بەرسیڤا وەزارەتێ بدەت”.
ناڤھاتی خویا کر کو ھەکە مامۆستا ل وەزارەتا پەروەردێ بھێنە دامەزراندن دێ ڤەگوھاستنا مامۆستایان ژی ژ دەرڤەی باژێڕان بۆ ناڤ سەنتەرێ باژێڕان دەستپێکەت، چونکی ل گۆرەی رێنمایان دڤێت ئەو مامۆستایێ داخوازا ڤەگوھاستنێ دکەت ھەکە خوە دەمێ قانوونی یێ ڤەگوھاستنا وی ھاتبیت ژی نابیت ڤالاھی پەیدا ببیت و گۆت: “بڕیارە ل ھەیڤا داھاتی رێنمایێن ڤەگوھاستنا مامۆستایان بھێنە دەرکرن و ڤەگوھاستن ژی دێ د دەستھەلاتا رێڤەبەرێن پەروەردێن پارێزگەھان دابیت”.
