ژڤانێ رزگاركرنا “ره‌قه” راگه‌هاند
ئه‌ڤرۆ نيوز:
جۆن کێربی پەیڤدارێ وەزارەتا بەرگیریا ئەمریکا (پینتاگۆن)ێ د داخۆیانیەکی دا ل ناڤەندا وێ وەزارەتێ راگەھاند کو دێ د ڤان رۆژێن نێزیک دا ئۆپەراسیۆنێن پاقژکرنا باژێرێ رەقایێ و دەوروبەرێن وێ ژ تیرۆرستان ھێتە دەستپێکرن و گۆت: (دێ ژ ئەردی ڤە ھێزێن کوردی و ئارتێشا سووریێ یا دیمۆکراتیک ئۆپەراسیۆنا ئازادکرنا رەقایێ و دەوروبەرێن وێ برێڤە بەن و ئەم ژی وەک ھەڤپەیمانان دێ ب ھێزێن ئەسمانی و فرۆکێن شەری پشتەڤانیێ ل ئۆپەراسیۆنا پاقژکرنا رەقایێ کەین).
جۆن کێربی ھەروەسا دیار ژی کر کو ئەو رەخنەیێن تورکیا یێن د دەربارێ پێکئینانا ئۆپەراسیۆنا پاقژکرنا رەقایێ و دەڤەرێن دی ب گرنگ دبینن و گۆت: (ئەم د رژدین کو سووریێ ژ تیرۆرستان پاقژ بکەین و بۆ ڤێ یەکێ ژی نھا ھێزا ھەری ئامادە بۆ ئۆپەراسیۆنا رەقایێ ھێزێن کوردی و ئارتێشا سووریێ یا دیمۆکراتیکە و ئەم دێ ب ھەر رەنگەکی ھەڤکاریا کوردێن رۆژئاڤا و ھێزا وان یا چەکداری کەین و ئەم تورکیا ژی دلنیا دکەین کو ئەو چەکێن ئەم ددەینە YPG و کۆمێن سووریێ ناکەڤنە د دەستێ PKK دا، ئەز دخوازم ڤێ یەکێ ژی ئاشکرا بکەم کو ھەتا نھا ژی ئەم رەخنەیێن تورکیا د ڤی دەرباری دا تێناگەھین).
پەیڤدارێ وەزارەتا بەرگیرییا ئەمریکا د پشکەکا دی یا ئاخاڤتنا خوە دا ژی سەرنج راکێشا سەر رەوشا عیراقێ و ھەرێما کوردستانێ و دیار کر ل دەڤەرێن سەر ب ھەرێما کوردستانێ و ل رومادی و دەڤەرێن کو ھەتا نھا د دەستێ ریکخستنا داعش یا تیرۆرست داینە ئۆپەراسیۆنێن ھێزێن پێشمەرگەی و سەربازێن عیراقێ ب سەرکەڤتی بەردەوام دکەن و گۆت: (ھێزێن ھەڤپەیمانان بەردەوامن د لێدانا بنگەھێن داعشێ ل عیراقێ دا و ئۆپەراسیۆنێن پاقژکرن و ئازادکرنا باژێر و دەڤەرێن د دەستێ تیرۆرستان دا ب سەرکەڤتی بەردەوام دکەن و ھێزێن پێشمەرگەی رۆلەکی گەلەک بەرچاڤ دبینن د ژ ناڤبرنا تیرۆرستان دا).
د دەربارێ دەمێ دیارکرنا ئۆپەراسیۆنا ئازادکرنا موسلێ دا ژی پەیڤدارێ وەزارەتا بەرگیرییا ئەمریکا راگەھاند کو ئەو پێنگاڤ ب پێنگاڤ بەر ب تەمامی ژ راکرنا داعشێ ل مەیدانێ ڤە دچن و گۆت: (ھەموو پێنگاڤێن مە د دیارکرینە و ل دووڤ بەرنامەیەکی دارێتی دھێنە ئاڤێتن، د ڤێ دەربارێ دا چو ئاستەنگی ل پێشیا مە نینن و ھێزێن ھەڤپەیامانان ژی بەردەوام ل بنگەھێن تیرۆرستان ددەن و ھەماھەنگیەکا باش د ناڤبەرا مە و ھێزێن عیراقێ و ھەرێما کوردستانێ دا ھەیە).
ل سەر پرسیارا گەلۆ دێ دەستپێکێ ئۆپەراسیۆنا ئازادکرنا موسلێ یان دێ یا رەقایێ ھێتە دەستپێکرن، جۆن کێربی پەیڤدارێ وەزارەتا بەرگیرییا ئەمریکا دیار کر ل سووریێ و ل عیراقێ ئۆپەراسیۆنێن ل دژی داعشێ دھێنە مەشاندن ب ھەڤرا د گرێداینە و گۆت: (ل ھەردو وەلاتان ژی ئۆپەراسیۆنێن پاقژکرنێ ل ھەرمبەر داعشێ و کۆمێن تیرۆرست بەردەوام دکەن و مەرەما ئۆپەراسیۆنان ئازادکرن و پاقژکرنا ھەموو ئاخا سووریێ و عیراقێیە ژ تیرۆرستان).
