ژڤانێ هاتنا دراڤێ 50 هزار دينارى بۆ ناڤ بازارى هاته دياركرن
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كا جڤاتا نوونه‌رێن عيراقێ راگه‌هاند كو نوكه دشيان دا نينه سفرێن به‌ر دينارێ عيراقى بهێنه لادان يان ژى پاره‌كێ نوو بهێته چێكرن و نوكه مژوولى خستنه ناڤ بازارى يا بهايێ 50 هزار دينارى نه و يێ 100 هزارى ژى ب دووڤ وى دا.
نه‌جيبا نه‌جيب، ئه‌نداما لژنا ئابوورى و وه‌به‌رهێنانێ ل جڤاتا نوونه‌رێن عيراقێ، بۆ ئه‌ڤرۆ نيوز گۆت: “پرۆژه‌ك به‌رى چه‌ند سالان هاتيه ئاماده‌كرن دا كو سفر ل سه‌ر دراڤى بهێنه راكرن، به‌لێ نوكه دشيان دا نينه ئه‌و كاره بهێته كرن، ژ به‌ر ره‌وشا خرابا ئابوورى و ئه‌منى يا وه‌لاتى”.
ده‌رباره‌يى هاتنا پارێ 50 هزار دينارى و 100 هزار دينارى بۆ ناڤ بازارى، نه‌جيبايێ گۆت: “نوكه دينارێ 50 هزار دينارى هاتيه چاپكرن و يێ ئاماده‌يه بكه‌ڤيته د بازارى دا و بڕياره د ڤان دو هه‌يڤێن بهێت دا بكه‌ڤيته د ناڤا بازارى دا”.
زێده‌تر گۆت: “ئاماده‌كارى بۆ دراڤێ 100 هزار دينارى ژى دهێته كرن، به‌لێ ب ديتنا چاڤدێرێن ئابوورى يا باش نينه هه‌ردو دراڤ د ئێك ده‌م دا بكه‌ڤنه د ناڤا بازارى دا، هه‌كه ئه‌و ژى د قووناغێن چاپكرنێ دايه”.
ئه‌نداما لژنا ئابوورى و وه‌به‌رهێنانێ ل جڤاتا نوونه‌رێن عيراقێ دا زانين ژى كو ل سه‌ر ڤان هه‌ردو دراڤان پشتى بزاڤێن مه‌زن شياينه نڤيسينا كوردى ژى ل سه‌ر زێده بكه‌ن وه‌كو مافه‌كێ كودان.
