ژڤانێ ڤه‌كرنا ده‌رگه‌هێ سه‌رزێرى يێ سنورى هاته دياركرن
ئه‌ڤرۆ نيوز:
خالا گۆمرکا سەرزێری ئێک ژ وان دەرگەھانە یێن کو ل سالا 2013 دناڤبەرا ھەرێما کوردستانێ و تورکیا دا ل ناحیا کانی ماسێ یا سەر ب قەزا ئامێدیێ ڤە ھاتیە ڤەکرن، ل دەستپێکێ رۆژانە گەلەک خەلکێ پارێزگەھا دھۆکێ ب رێیا ڤی دەرگەھی دچوونە وەلاتێ تورکیا و گەلەک کەسان ژ تورکیا سەرەدانا ھەرێمێ دکر، لێ ئەڤە ماوێ دو سالانە، ژ ئەگەرێ پەیدابوونا شەر و ئالۆزیان دناڤبەرا پەکەکێ و تورکیا دا ئەڤ دەرگەھە ژ لایێ حوکمەتا تورکیا ھاتبوو داخستن، لێ ل رۆژا دوشەمبی 5/9/2016 جارەکادی ئەڤ دەرگەھە دێ ھێتە ڤەکرن.
ئیسماعیل مستەفا قائیمقامێ قەزا ئامێدیێ بۆ رۆژناما ئەڤرۆ گۆت: “دەرگەھێ گۆمرکا سەرزێری دێ ب رەنگەکێ سرۆشتی کار کەت دناڤبەرا ھەرێما کورستانێ و وەلاتێ تورکیا، وەکو گۆمرکا ئیبراھیم خەلیل و وەلاتی دشێن ب رێیا ڤیزێ ھاتنوچوونێ دڤی دەرگەھی را بکەن ژ ھەرێمێ بۆ وەلاتێ تورکیا و ھەروەسا ژ وەلاتێ تورکیا بۆ ھەرێما کوردستانێ، لەورا بەری دو سالان ئەڤ دەرگەھە ھاتبوو ڤەکرن و ڤێ جارێ چو رێ و رەسم نابن بۆ ڤەکرنێ”.
گۆتژی ” ژ ئەگەرێ پەیدابوونا شەر و ئالۆزیان و ھندەک تشتێن گرێدای ب تورکیا ڤە ئەڤ دەرگەھە بۆ ماوێ دو سالان ژ لایێ وان ڤە ھاتبوو داخستن، لەورا ل رۆژا دوشەمبی 5/9/2016 جارەکا دی ئەڤ دەرگەھە دێ ھێتە ڤەکرن، وەلاتی دێ شێن ب ئاسایی ھاتنوچوونێ بکەن, ئەڤ دەرگەھە دێ خزمەتەکا مەزن بۆ خەلکێ ڤێ دەڤەرێ و ھەموو خەلکێ پاێزگەھا دھۆکێ کەت”.
قائیمقامێ قەزا ئامێدیێ دیار کر ژی کو وان بەرھەڤیێن باش کرینە بۆ ڤەکرنا ڤی دەرگەھی و چو کێماسی ژ لایێ حوکمەتا ھەرێمێ ڤە نینن، دیسا ل قۆناغا دەستپێکێ دا ترۆمبێلێن بارھەلگر و ئینانا کەل و پەلان و کارێن بازرگانی دڤی دەرگەھی را ناھێنە ئەنجامدان و نوکە ب تنێ خەلک دێ شێن ھاتنوچوونێ لێ کەن بۆ سەرەدان و گەشتکرنێ.
