ژیان و مرن
زوهێر كۆرەماركی
ژیان و مرن دو ئێدیەمێن هەڤدژن، هندی ژیان هەبیت دێ مرن دناڤ رۆپەلێن وێ دا سەرهلددەت و هەبیت، هندی مرن ژی هەبیت دێ هەر ژیان ژی هەبیت مرن دووماهی وێستگەه نینە، لەورا دهێتە گۆتن (بمرە بۆ ژیانێ و نە ژی بۆ مرنێ) ئانكو ژیان و مرن ژسنەتێن ل سەر ڤێ ئاخێ نە، ئەم هەر بزاڤان دكەین باش و جوان بژین و هەر مە حەفحەفە دگەل ژیانێ و ئەم ل دەلیڤەیێن باش و خۆش دگەڕین، ژیانەكا خۆش بەختەوەر دەستەبەر بكەین بۆ خۆ و زاڕۆك و مالا خۆ ، بەلێ شاشیا مە ئەوە ئەم هند كاری بۆ رۆژا باركرنێ ژڤێ دونیایێ ناكەین، ددەمەكی دا كو ئەم دزانین ژیان درەوەكا شرینە و مرن ژی راستییەكا تەحلە ئەم هەموو دێ تامكەینێ مە بڤێت و نەڤێت.
بلا ئەم دەستان ژ ژیانێ بەرنەدەین كار و خەباتێ بۆ بكەین و خۆ دگەل زڤرۆكێن وێ بگۆنجینین و بزاڤا بكەین سەر ئاستەنگێن وێ بكەڤین و دەرباز ببین شەرێ مانێ دگەل بكەین، لێ ئەڤە وێ چەندێ ناگەهینیت كو ئەم هەموو سنووران دگەل ژیانێ ببەزینین و هەموو بێ وژدانیا دژیانێ دا بكەین ل سەر حسابا مرنێ و چ حسابێ بۆ نەكەین، هەرد دوكا ئادابێن خۆ یێن هەین و دڤێت مرۆڤ هزر تێدا بكەت و هندەك سنووران بۆ خۆ تێدا دانیت، بلا مرۆڤ هزر نەكەت مرن چ نینە و دێ هەموو تشتان دژیانێ دا كەم و گۆه نادەمە مرنێ، یان مرۆڤ بێژیت هەما ژیانە و دێ تێوەرینم ڕاست و چەپ چلێهات بلا وەلێ بهێت، گۆهێ خۆ بدەنە ڤێ دیالۆكێ دناڤبەرا ژیان و مرنێ دا، دبێژن: جارەكێ ژیانێ پرسیار ژ مرنێ كر گۆتێ: بۆچی مرۆڤان تۆ نەڤێی و كەرب ژتە ڤەدبن ؟
مرنێ گۆتێ: چونكی تۆ درەوەكا جوانی و ئەز ژی ڕاستییەكا تەحلم؟خەلك ژمن دڕەڤن و ل تە دگەڕن ! تۆ درەوەكا زیق و دیاری و كەس دگەل تە نابەتە سەری و ئەز ژی ڕاستییەكا تەحلم مرۆڤ ژمن دڕەڤن، باب و باپیرێن مە ژی یا گۆتی : راستی دكولاڤ خارن لێ دێ بزاڤان كەین بژین لێ نە ل سەر حسابا مرنێ هەر ئێكێ ژوان تایبەتمەندییێن خۆ یێن هەین فەرە بپارێزین، فەرە بزانین ل پشت ژیانێ مرنا هەی و ل پشت مرنێ ژی ژیانەكا دی یا هەی هەر تشت دێ زڤڕیتە ئەسلێ خۆ .
